Trump Assassination Attempt | ಟ್ರಂಪ್‌ ಮೇಲಿನ ದಾಳಿಗೂ ಮುನ್ನವೇ ರವಾನೆಯಾಗಿತ್ತು 'ಡೆತ್ ಮ್ಯಾನಿಫೆಸ್ಟೋ'!

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಪ್ರಥಮ ಮಹಿಳೆ ಸೇರಿದಂತೆ ಸುಮಾರು 2,500 ಗಣ್ಯರು ಪಾಲ್ಗೊಂಡಿದ್ದ ಹೈ-ಪ್ರೊಫೈಲ್ 'ವೈಟ್ ಹೌಸ್ ಕರೆಸ್ಪಾಂಡೆಂಟ್ಸ್ ಅಸೋಸಿಯೇಷನ್ ಡಿನ್ನರ್' ವೇಳೆ ನಡೆದ ಭೀಕರ ದಾಳಿಗೆ ಸಂಚು ರೂಪಿಸಿದ್ದ ವ್ಯಕ್ತಿಯೊಬ್ಬನನ್ನು ಪೊಲೀಸರು ಬಂಧಿಸಿದ್ದಾರೆ.

ಕ್ಯಾಲಿಫೋರ್ನಿಯಾದ ಟೊರೆನ್ಸ್ ನಿವಾಸಿ ಕೋಲ್ ಟೋಮಸ್ ಅಲೆನ್ (31) ಬಂಧಿತ ಆರೋಪಿ. ವಾಷಿಂಗ್ಟನ್ ಹಿಲ್ಟನ್ ಹೋಟೆಲ್‌ನಲ್ಲಿ ಗಣ್ಯರು ಜಮಾಯಿಸಿದ್ದ ಬಾಲ್‌ರೂಮ್ ಪ್ರವೇಶಿಸಲು ಯತ್ನಿಸುತ್ತಿದ್ದಾಗ ಭದ್ರತಾ ಸಿಬ್ಬಂದಿಗಳು ಈತನನ್ನು ತಡೆದಿದ್ದಾರೆ. ಈ ವೇಳೆ ಹೋಟೆಲ್‌ನ ಹೊರಭಾಗದಲ್ಲಿ ಈತ ಗುಂಡಿನ ದಾಳಿ ನಡೆಸಿದ್ದು, ತಕ್ಷಣವೇ ಆತನನ್ನು ವಶಕ್ಕೆ ಪಡೆಯಲಾಗಿದೆ.

ಗುಂಡಿನ ದಾಳಿ ನಡೆಸುವುದಕ್ಕೆ ಕೇವಲ ಹತ್ತು ನಿಮಿಷಗಳ ಮೊದಲು ಅಲೆನ್ ತನ್ನ ಕುಟುಂಬಸ್ಥರಿಗೆ ಸುದೀರ್ಘವಾದ 'ಟ್ರಂಪ್ ವಿರೋಧಿ ಮ್ಯಾನಿಫೆಸ್ಟೋ' (ಘೋಷಣಾಪತ್ರ) ಒಂದನ್ನು ಕಳುಹಿಸಿದ್ದನು. ಇದರಲ್ಲಿ ಆತ ಟ್ರಂಪ್ ಆಡಳಿತದ ಹಿರಿಯ ಅಧಿಕಾರಿಗಳನ್ನು ಹತ್ಯೆ ಮಾಡುವ ಪಟ್ಟಿಯನ್ನು ಸಿದ್ಧಪಡಿಸಿದ್ದ ಎನ್ನಲಾಗಿದೆ.

ಮ್ಯಾನಿಫೆಸ್ಟೋದಲ್ಲೇನಿದೆ?

ಹಿಟ್ ಲಿಸ್ಟ್: ಟ್ರಂಪ್ ಆಡಳಿತದ ಹಿರಿಯ ಅಧಿಕಾರಿಗಳನ್ನು ಅವರ ಹುದ್ದೆಯ ಆಧಾರದ ಮೇಲೆ ಹತ್ಯೆ ಮಾಡಲು ನಿರ್ಧರಿಸಿದ್ದ ಅಲೆನ್, ಆ ಪಟ್ಟಿಯಿಂದ ಎಫ್‌ಬಿಐ ನಿರ್ದೇಶಕ ಕಾಶ್‌ ಪಟೇಲ್ ಅವರನ್ನು ಮಾತ್ರ ಹೊರಗಿಟ್ಟಿದ್ದನು.

ಭದ್ರತಾ ಲೋಪದ ವ್ಯಂಗ್ಯ: "ನಾನು ಶಸ್ತ್ರಾಸ್ತ್ರಗಳೊಂದಿಗೆ ಹೋಟೆಲ್ ಒಳಗೆ ಬಂದರೂ ಯಾರೂ ನನ್ನನ್ನು ಪ್ರಶ್ನಿಸಲಿಲ್ಲ. ಅಧಿಕಾರಿಗಳ ಅಹಂಕಾರ ಮತ್ತು ಭದ್ರತಾ ವೈಫಲ್ಯ ಕಂಡು ನನಗೆ ಆಶ್ಚರ್ಯವಾಯಿತು," ಎಂದು ಆತ ಬರೆದುಕೊಂಡಿದ್ದಾನೆ.

ಧಾರ್ಮಿಕ ಸಮರ್ಥನೆ: "ಅನ್ಯಾಯ ನಡೆದಾಗ ಸುಮ್ಮನಿರುವುದು ಕ್ರಿಶ್ಚಿಯನ್ ಧರ್ಮದ ಲಕ್ಷಣವಲ್ಲ, ಅದು ಅಪರಾಧಕ್ಕೆ ಬೆಂಬಲ ನೀಡಿದಂತೆ," ಎಂದು ತನ್ನ ಕೃತ್ಯವನ್ನು ಸಮರ್ಥಿಸಿಕೊಂಡಿದ್ದಾನೆ.

ಪತ್ತೆಯಾಗಿದ್ದು ಹೇಗೆ?

ಅಲೆನ್ ಕಳುಹಿಸಿದ ಸಂದೇಶವನ್ನು ಕಂಡು ಬೆಚ್ಚಿಬಿದ್ದ ಆತನ ಸಹೋದರ ತಕ್ಷಣವೇ ಕನೆಕ್ಟಿಕಟ್ ಪೊಲೀಸರಿಗೆ ಮಾಹಿತಿ ನೀಡಿದ್ದಾನೆ. ಇತ್ತ ಮೇರಿಲ್ಯಾಂಡ್‌ನಲ್ಲಿ ವಾಸವಿದ್ದ ಆತನ ಸಹೋದರಿಯನ್ನು ಸೀಕ್ರೆಟ್ ಸರ್ವಿಸ್ ಅಧಿಕಾರಿಗಳು ವಿಚಾರಣೆ ನಡೆಸಿದಾಗ, ಅಲೆನ್ ಮೊದಲಿನಿಂದಲೂ ತೀವ್ರಗಾಮಿ ರಾಜಕೀಯ ವಿಚಾರಗಳನ್ನು ಹೊಂದಿದ್ದನು ಎಂಬ ವಿಷಯ ಬೆಳಕಿಗೆ ಬಂದಿದೆ.

ಭದ್ರತಾ ವೈಫಲ್ಯದ ಪ್ರಶ್ನೆ

ಈ ಘಟನೆಯು ಅಮೆರಿಕದ ಅತ್ಯುನ್ನತ ಭದ್ರತಾ ವ್ಯವಸ್ಥೆಯ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಪ್ರತಿಭಟನಾಕಾರರು ಮತ್ತು ಹೊಸದಾಗಿ ಬರುವವರ ಮೇಲೆ ಗಮನ ಹರಿಸುವ ಭದ್ರತಾ ಪಡೆಗಳು, ಒಂದು ದಿನ ಮುಂಚಿತವಾಗಿಯೇ ಹೋಟೆಲ್‌ಗೆ ಬಂದು ತಂಗುವವರ ಬಗ್ಗೆ ನಿರ್ಲಕ್ಷ್ಯ ವಹಿಸುತ್ತಿವೆ ಎಂದು ಸ್ವತಃ ಆರೋಪಿಯೇ ತನ್ನ ಮ್ಯಾನಿಫೆಸ್ಟೋದಲ್ಲಿ ಲೇವಡಿ ಮಾಡಿದ್ದಾನೆ.

ಸದ್ಯ ಆರೋಪಿಯನ್ನು ತೀವ್ರ ವಿಚಾರಣೆಗೆ ಒಳಪಡಿಸಲಾಗಿದ್ದು, ಈತನ ಹಿಂದೆ ಯಾವುದಾದರೂ ಸಂಘಟನೆಗಳ ಕೈವಾಡವಿದೆಯೇ ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ.