ಕೆನಡಾದಿಂದ ಭಾರತೀಯರ ಗಡೀಪಾರು ಹೆಚ್ಚಳ: 2026ರ ಮೊದಲಾರ್ಧದಲ್ಲೇ 3,323 ಮಂದಿ ವಾಪಸ್

ಕೆನಡಾದಿಂದ ಭಾರತೀಯರನ್ನು ಗಡೀಪಾರು ಮಾಡುವ ಪ್ರಮಾಣ 2026ರಲ್ಲಿ ಗಣನೀಯವಾಗಿ ಹೆಚ್ಚಾಗಿದ್ದು, ವರ್ಷದ ಮೊದಲ ಆರು ತಿಂಗಳಲ್ಲೇ 3,323 ಭಾರತೀಯರನ್ನು ದೇಶದಿಂದ ಹೊರಹಾಕಲಾಗಿದೆ. ಈ ಪ್ರಮಾಣವು 2025ರ ಇಡೀ ವರ್ಷದಲ್ಲಿ ಗಡೀಪಾರು ಮಾಡಲಾದ 3,779 ಭಾರತೀಯರ ಸಂಖ್ಯೆಯ ಶೇ.88ರಷ್ಟಾಗಿದೆ. ಇದೇ ವೇಗ ಮುಂದುವರಿದರೆ, 2026ರಲ್ಲಿ ಕಳೆದ ಹಲವು ವರ್ಷಗಳಲ್ಲೇ ಅತಿ ಹೆಚ್ಚು ಭಾರತೀಯರ ಗಡೀಪಾರಿಗೆ ಒಳಗಾದ ವರ್ಷವಾಗುವ ಸಾಧ್ಯತೆಯಿದೆ.

ಕೆನಡಾ ತನ್ನ ವಲಸೆ ವ್ಯವಸ್ಥೆಯನ್ನು ಕಟ್ಟುನಿಟ್ಟುಗೊಳಿಸುತ್ತಿರುವ ಸಂದರ್ಭದಲ್ಲಿ ಭಾರತೀಯರ ಗಡೀಪಾರು ಪ್ರಮಾಣದಲ್ಲಿ ಈ ಏರಿಕೆ ಕಂಡುಬಂದಿದೆ. 2021ರಿಂದ 2024ರವರೆಗೆ ಯಾವುದೇ ಪೂರ್ಣ ವರ್ಷದಲ್ಲಿ ಗಡೀಪಾರುಗೊಂಡ ಭಾರತೀಯರ ಸಂಖ್ಯೆ 2026ರ ಮೊದಲ ಆರು ತಿಂಗಳ ಸಂಖ್ಯೆಯನ್ನು ಮೀರಿರಲಿಲ್ಲ.

ಆರು ತಿಂಗಳಲ್ಲೇ ಹಿಂದಿನ ನಾಲ್ಕು ವರ್ಷಗಳ ದಾಖಲೆ ಮೀರಿದ ಸಂಖ್ಯೆ

ಕೆನಡಾದ ಅಂಕಿ-ಅಂಶಗಳ ಪ್ರಕಾರ, 2021ರಲ್ಲಿ 603 ಭಾರತೀಯರನ್ನು ಗಡೀಪಾರು ಮಾಡಲಾಗಿತ್ತು. 2022ರಲ್ಲಿ ಈ ಸಂಖ್ಯೆ 786ಕ್ಕೆ ಏರಿತ್ತು. 2023ರಲ್ಲಿ 1,132 ಹಾಗೂ 2024ರಲ್ಲಿ 2,004 ಭಾರತೀಯರನ್ನು ಕೆನಡಾದಿಂದ ಹೊರಹಾಕಲಾಗಿತ್ತು.

2025ರಲ್ಲಿ ಗಡೀಪಾರು ಪ್ರಮಾಣ ಮತ್ತಷ್ಟು ಏರಿಕೆಯಾಗಿ 3,779ಕ್ಕೆ ತಲುಪಿತ್ತು. ಆದರೆ 2026ರ ಜನವರಿಯಿಂದ ಜೂನ್‌ವರೆಗೆ ಕೇವಲ ಆರು ತಿಂಗಳ ಅವಧಿಯಲ್ಲೇ 3,323 ಭಾರತೀಯರನ್ನು ಗಡೀಪಾರು ಮಾಡಲಾಗಿದೆ. ಹೀಗಾಗಿ 2026ರ ಮೊದಲಾರ್ಧದಲ್ಲಿನ ಸಂಖ್ಯೆ 2021ರಿಂದ 2024ರವರೆಗಿನ ಪ್ರತಿಯೊಂದು ಪೂರ್ಣ ವರ್ಷದ ಸಂಖ್ಯೆಯನ್ನೂ ಮೀರಿದೆ.

ಈ ವರ್ಷ ಕೆನಡಾದಿಂದ ಅತಿ ಹೆಚ್ಚು ಗಡೀಪಾರುಗೊಂಡ ವಿದೇಶಿ ಪ್ರಜೆಗಳ ಪಟ್ಟಿಯಲ್ಲಿ ಭಾರತ ಮೊದಲ ಸ್ಥಾನಕ್ಕೇರಿದೆ. ಜನವರಿಯಿಂದ ಜೂನ್‌ವರೆಗೆ 3,323 ಭಾರತೀಯರನ್ನು ಹೊರಹಾಕಲಾಗಿದ್ದರೆ, ಇದೇ ಅವಧಿಯಲ್ಲಿ ಮೆಕ್ಸಿಕೊದ 1,573 ಪ್ರಜೆಗಳನ್ನು ಗಡೀಪಾರು ಮಾಡಲಾಗಿದೆ. ಕಳೆದ ಐದು ವರ್ಷಗಳಲ್ಲಿ ಮೆಕ್ಸಿಕೊ ಈ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿತ್ತು ಮತ್ತು ಭಾರತ ಸಾಮಾನ್ಯವಾಗಿ ಎರಡನೇ ಸ್ಥಾನದಲ್ಲಿತ್ತು. 2020ರಲ್ಲಿ ಮಾತ್ರ ಭಾರತ 1,424 ಗಡೀಪಾರುಗಳೊಂದಿಗೆ ಮೊದಲ ಸ್ಥಾನದಲ್ಲಿತ್ತು.

ಯಾವ ಕಾರಣಕ್ಕೆ ಭಾರತೀಯರನ್ನು ಗಡೀಪಾರು ಮಾಡಲಾಗುತ್ತಿದೆ?

ಕೆನಡಾದಲ್ಲಿ ಭಾರತೀಯ ಪ್ರಜೆಗಳನ್ನು ವಿವಿಧ ವಲಸೆ ನಿಯಮ ಉಲ್ಲಂಘನೆಗಳ ಹಿನ್ನೆಲೆಯಲ್ಲಿ ದೇಶದಿಂದ ಹೊರಹಾಕಲಾಗುತ್ತಿದೆ. ವೀಸಾ ಅವಧಿ ಮುಗಿದ ಬಳಿಕವೂ ದೇಶದಲ್ಲಿ ಉಳಿಯುವುದು, ಆಶ್ರಯ ಅಥವಾ ನಿರಾಶ್ರಿತ ಸ್ಥಾನಮಾನಕ್ಕೆ ಸಲ್ಲಿಸಿದ ಅರ್ಜಿ ತಿರಸ್ಕೃತವಾಗುವುದು, ವಲಸೆ ನಿಯಮಗಳನ್ನು ಪಾಲಿಸದಿರುವುದು ಹಾಗೂ ವೀಸಾ ಸಂಬಂಧಿತ ವಂಚನೆ ಪ್ರಕರಣಗಳು ಪ್ರಮುಖ ಕಾರಣಗಳಾಗಿವೆ.

ಆದರೆ ಯಾವ ರಾಷ್ಟ್ರೀಯತೆಯ ಎಷ್ಟು ಮಂದಿಯನ್ನು ಯಾವ ನಿರ್ದಿಷ್ಟ ಕಾರಣಕ್ಕಾಗಿ ಗಡೀಪಾರು ಮಾಡಲಾಗಿದೆ ಎಂಬ ವಿವರವನ್ನು ಕೆನಡಾದ ಗಡಿ ಸೇವಾ ಸಂಸ್ಥೆ ಪ್ರತ್ಯೇಕವಾಗಿ ಪ್ರಕಟಿಸುವುದಿಲ್ಲ. ಹೀಗಾಗಿ 3,323 ಭಾರತೀಯರ ಗಡೀಪಾರಿಗೆ ಮೇಲಿನ ಎಲ್ಲ ಕಾರಣಗಳ ಪೈಕಿ ಯಾವುದು ಎಷ್ಟು ಪ್ರಮಾಣದಲ್ಲಿ ಕಾರಣವಾಗಿದೆ ಎಂಬುದು ಸ್ಪಷ್ಟವಾಗಿಲ್ಲ.

ಇನ್ನೂ 7,669 ಭಾರತೀಯರು ಗಡೀಪಾರಿಗೆ ಕಾಯುತ್ತಿದ್ದಾರೆ

ಕೆನಡಾದ ಅಧಿಕೃತ ಮಾಹಿತಿಯ ಪ್ರಕಾರ, ಗಡೀಪಾರು ಪ್ರಕ್ರಿಯೆ ಆರಂಭಗೊಂಡು ಇನ್ನೂ ಪೂರ್ಣಗೊಳ್ಳದ ಪ್ರಕರಣಗಳ ಪಟ್ಟಿಯಲ್ಲೂ ಭಾರತೀಯರೇ ಅತಿ ಹೆಚ್ಚು ಸಂಖ್ಯೆಯಲ್ಲಿದ್ದಾರೆ. ಒಟ್ಟು 7,669 ಭಾರತೀಯರು ‘ರಿಮೂವಲ್ ಪ್ರೊಗ್ರೆಸ್​’ ಪಟ್ಟಿಯಲ್ಲಿದ್ದಾರೆ.

ಇದರಿಂದ ಮುಂದಿನ ದಿನಗಳಲ್ಲೂ ಭಾರತೀಯರ ಗಡೀಪಾರು ಪ್ರಮಾಣ ಹೆಚ್ಚಾಗುವ ಸಾಧ್ಯತೆ ಇದೆ. ಪ್ರಸ್ತುತ ದಾಖಲೆಗಳ ಪ್ರಕಾರ, ಈ ಏರಿಕೆ ಇನ್ನೂ ಗರಿಷ್ಠ ಮಟ್ಟ ತಲುಪಿಲ್ಲ ಎಂಬ ಸೂಚನೆ ದೊರೆಯುತ್ತಿದೆ.

ಗಡೀಪಾರಿಗೆ ಮೂರು ರೀತಿಯ ಆದೇಶ

ಕೆನಡಾದಲ್ಲಿ ವಲಸೆ ನಿಯಮ ಉಲ್ಲಂಘನೆಗೆ ಸಂಬಂಧಿಸಿದಂತೆ ಮೂರು ಪ್ರಮುಖ ರೀತಿಯ ರಿಮೂವಲ್ ಆರ್ಡರ್​ ಜಾರಿಯಲ್ಲಿವೆ. ಆ ವೇಳೆ 30 ದಿನಗಳೊಳಗೆ ಸ್ವಯಂಪ್ರೇರಿತವಾಗಿ ದೇಶ ತೊರೆಯಬೇಕು. ಹಾಗೆ ಮಾಡದಿದ್ದರೆ ಅದು ರಿಪೋರ್ಷನ್​​ ಆಗಿ ಪರಿವರ್ತನೆಯಾಗಬಹುದು.

ಎಕ್ಸ್​​ಕ್ಲೂಷನ್ ಆರ್ಡರ್​ ಜಾರಿಯಾದರೆ ನಿರ್ದಿಷ್ಟ ಅವಧಿಗೆ, ಸಾಮಾನ್ಯವಾಗಿ ಒಂದರಿಂದ ಐದು ವರ್ಷಗಳವರೆಗೆ, ಕೆನಡಾಕ್ಕೆ ಮರಳುವುದಕ್ಕೆ ನಿರ್ಬಂಧವಿರುತ್ತದೆ. ಡಿಪೋರ್ಶನ್​ ಆರ್ಡರ್​ ಜಾರಿಯಾದರೆ ಕೆನಡಾಕ್ಕೆ ಮರುಪ್ರವೇಶಕ್ಕೆ ಶಾಶ್ವತ ನಿರ್ಬಂಧ ವಿಧಿಸಲಾಗುತ್ತದೆ. ವಿಶೇಷ ಅನುಮತಿ ಪಡೆದರೆ ಮಾತ್ರ ಅಂತಹ ವ್ಯಕ್ತಿ ಮತ್ತೆ ಕೆನಡಾಕ್ಕೆ ಪ್ರವೇಶಿಸಲು ಸಾಧ್ಯವಾಗುತ್ತದೆ.

ಅಮೆರಿಕಕ್ಕಿಂತಲೂ ಕೆನಡಾದಲ್ಲಿ ಹೆಚ್ಚು ಭಾರತೀಯರ ಗಡೀಪಾರು

ಕೆನಡಾದಲ್ಲಿನ ಭಾರತೀಯರ ಗಡೀಪಾರು ಪ್ರಮಾಣ ಅಮೆರಿಕದ ಅಂಕಿ-ಅಂಶಗಳಿಗಿಂತಲೂ ಹೆಚ್ಚಾಗಿದೆ. ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಪ್ರಕಾರ, 2026ರ ಜನವರಿ 1ರಿಂದ ಜುಲೈ 22ರವರೆಗೆ ಅಮೆರಿಕದಿಂದ 1,273 ಭಾರತೀಯರನ್ನು ಗಡೀಪಾರು ಮಾಡಲಾಗಿದೆ.

ಇದಕ್ಕೆ ಹೋಲಿಸಿದರೆ ಕೆನಡಾ ವರ್ಷದ ಮೊದಲ ಆರು ತಿಂಗಳಲ್ಲೇ 3,323 ಭಾರತೀಯರನ್ನು ಗಡೀಪಾರು ಮಾಡಿದೆ. ಅಂದರೆ ಅಮೆರಿಕದಿಂದ ಗಡೀಪಾರುಗೊಂಡ ಭಾರತೀಯರ ಸಂಖ್ಯೆಗೆ ಹೋಲಿಸಿದರೆ ಕೆನಡಾದ ಸಂಖ್ಯೆ ಎರಡೂವರೆ ಪಟ್ಟು ಹೆಚ್ಚಾಗಿದೆ.

ಭಾರತೀಯ ವಿದ್ಯಾರ್ಥಿಗಳ ಕೆನಡಾ ಆಸಕ್ತಿಯಲ್ಲೂ ಕುಸಿತ

ಭಾರತೀಯರ ಗಡೀಪಾರು ಹೆಚ್ಚುತ್ತಿರುವ ಸಂದರ್ಭದಲ್ಲೇ ಕೆನಡಾಕ್ಕೆ ತೆರಳುವ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆಯಲ್ಲೂ ಗಮನಾರ್ಹ ಕುಸಿತ ಕಂಡುಬಂದಿದೆ. ಕೆನಡಾದ ಆಡಿಟರ್ ಜನರಲ್ ಸಂಸತ್ತಿಗೆ ಸಲ್ಲಿಸಿದ ವರದಿ ಪ್ರಕಾರ, 2025ರ ಸೆಪ್ಟೆಂಬರ್‌ನಲ್ಲಿ ಕೆನಡಾಕ್ಕೆ ಹೊಸದಾಗಿ ಆಗಮಿಸಿದ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ಪೈಕಿ ಭಾರತೀಯರ ಪಾಲು ಕೇವಲ ಶೇ.8.1ರಷ್ಟಿತ್ತು. 2023ರಲ್ಲಿ ಇದೇ ಪ್ರಮಾಣ ಶೇ.51.6ರಷ್ಟಿತ್ತು.

ಭಾರತದ ಕೇಂದ್ರ ಶಿಕ್ಷಣ ಸಚಿವಾಲಯದ ಅಂಕಿ-ಅಂಶಗಳೂ ಇದೇ ಪ್ರವೃತ್ತಿಯನ್ನು ತೋರಿಸುತ್ತವೆ. ಕೆನಡಾವನ್ನು ಆಯ್ಕೆ ಮಾಡಿಕೊಂಡ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆ 2023ರಲ್ಲಿ 2,33,532 ಇದ್ದರೆ, 2024ರಲ್ಲಿ ಅದು 1,37,608ಕ್ಕೆ ಇಳಿದಿದೆ. ಅಂದರೆ ಒಂದು ವರ್ಷದಲ್ಲಿ ಸುಮಾರು ಶೇ.41ರಷ್ಟು ಕುಸಿತ ದಾಖಲಾಗಿದೆ.

ಕಠಿಣ ವಲಸೆ ನೀತಿಯಿಂದ ಹೊಡೆತ

ಕೆನಡಾ ಸರ್ಕಾರ ಕಳೆದ ಕೆಲವು ವರ್ಷಗಳಿಂದ ತಾತ್ಕಾಲಿಕ ನಿವಾಸಿಗಳ ಸಂಖ್ಯೆಯನ್ನು ಕಡಿಮೆ ಮಾಡಲು ಹಾಗೂ ವಲಸೆ ವ್ಯವಸ್ಥೆಯನ್ನು ನಿಯಂತ್ರಿಸಲು ಹಲವು ಕ್ರಮಗಳನ್ನು ಕೈಗೊಂಡಿದೆ. ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ಅಧ್ಯಯನ ಪರವಾನಗಿ ನಿಯಮಗಳನ್ನು ಕಠಿಣಗೊಳಿಸುವುದು, ಅರ್ಜಿಗಳ ಪರಿಶೀಲನೆಯನ್ನು ಹೆಚ್ಚಿಸುವುದು ಮತ್ತು ವಿದ್ಯಾರ್ಥಿಗಳ ಸಂಖ್ಯೆಗೆ ಮಿತಿ ವಿಧಿಸುವುದು ಈ ನೀತಿಯ ಪ್ರಮುಖ ಭಾಗವಾಗಿದೆ.

2024ರ ಆರಂಭದಲ್ಲಿ ಪದವಿ ಮತ್ತು ಡಿಪ್ಲೊಮಾ ಕೋರ್ಸ್‌ಗಳಿಗೆ ಸೇರುವ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ಅಧ್ಯಯನ ಪರವಾನಗಿಗೆ ಎರಡು ವರ್ಷಗಳ ಮಿತಿಯನ್ನು ಕೆನಡಾ ವಿಧಿಸಿತ್ತು. ಇದರೊಂದಿಗೆ ಜೀವನ ವೆಚ್ಚ ಹೆಚ್ಚಳ, ಬಾಡಿಗೆ ದರಗಳ ಏರಿಕೆ, ಆರ್ಥಿಕ ಸಾಮರ್ಥ್ಯಕ್ಕೆ ಸಂಬಂಧಿಸಿದ ಕಠಿಣ ನಿಯಮಗಳು ಮತ್ತು ವಿದ್ಯಾರ್ಥಿಗಳಿಗೆ ಅರೆಕಾಲಿಕ ಉದ್ಯೋಗಾವಕಾಶಗಳ ಕುಸಿತವೂ ಕೆನಡಾಕ್ಕೆ ತೆರಳುವವರ ಮೇಲೆ ಪರಿಣಾಮ ಬೀರಿವೆ.

2023ರಲ್ಲಿ ಭಾರತ ಮತ್ತು ಕೆನಡಾ ನಡುವಿನ ರಾಜತಾಂತ್ರಿಕ ಸಂಬಂಧಗಳಲ್ಲಿ ಉಂಟಾದ ಬಿಕ್ಕಟ್ಟು ಕೂಡ ವಿದ್ಯಾರ್ಥಿಗಳ ಆಯ್ಕೆಯ ಮೇಲೆ ಪರಿಣಾಮ ಬೀರಿದ ಪ್ರಮುಖ ಅಂಶಗಳಲ್ಲಿ ಒಂದಾಗಿದೆ.

ವಿದ್ಯಾರ್ಥಿಗಳ ಆಗಮನದಲ್ಲಿ ಶೇ.60ರಷ್ಟು ಕುಸಿತ

ಕೆನಡಾ ಪ್ರಧಾನಿ ಮಾರ್ಕ್ ಕಾರ್ನಿ ಜೂನ್‌ನಲ್ಲಿ ನೀಡಿದ ಹೇಳಿಕೆಯ ಪ್ರಕಾರ, ದೇಶಕ್ಕೆ ಆಗಮಿಸುತ್ತಿರುವ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ಸಂಖ್ಯೆ ಸುಮಾರು ಶೇ.60ರಷ್ಟು ಕುಸಿದಿದೆ. ವಲಸೆ ವ್ಯವಸ್ಥೆಯ ಮೇಲಿನ ನಿಯಂತ್ರಣವನ್ನು ಕೆನಡಾ ಮರಳಿ ಸಾಧಿಸಿದೆ ಎಂದು ಅವರು ಹೇಳಿದ್ದರು.

ಕೆನಡಾದ ವಲಸೆ, ನಿರಾಶ್ರಿತರು ಮತ್ತು ಪೌರತ್ವ ಇಲಾಖೆಯ ಅಂಕಿ-ಅಂಶಗಳ ಪ್ರಕಾರ, 2025ರ ಜನವರಿಯಿಂದ ಅಕ್ಟೋಬರ್‌ವರೆಗೆ ಹೊಸ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ಆಗಮನ ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಸುಮಾರು ಶೇ.60ರಷ್ಟು ಕುಸಿದಿತ್ತು. ಇದರ ಪರಿಣಾಮವಾಗಿ 1.5 ಲಕ್ಷಕ್ಕೂ ಹೆಚ್ಚು ವಿದ್ಯಾರ್ಥಿಗಳಷ್ಟು ಇಳಿಕೆ ಕಂಡುಬಂದಿತ್ತು.

2025ರ ಆಗಸ್ಟ್‌ನಲ್ಲಿ ಸುಮಾರು 45,000 ಹೊಸ ಅಧ್ಯಯನ ಪರವಾನಗಿಗಳನ್ನು ನೀಡಲಾಗಿತ್ತು. 2024ರ ಆಗಸ್ಟ್‌ನಲ್ಲಿ ಈ ಸಂಖ್ಯೆ ಸುಮಾರು 80,000ರಷ್ಟಿತ್ತು. ಅಕ್ಟೋಬರ್ ವೇಳೆಗೆ ಹೊಸ ವಿದ್ಯಾರ್ಥಿಗಳ ಆಗಮನ 3,000ಕ್ಕೂ ಸ್ವಲ್ಪ ಹೆಚ್ಚು ಮಟ್ಟಕ್ಕೆ ಇಳಿದಿತ್ತು.

ಹೀಗಾಗಿ ಕೆನಡಾದಲ್ಲಿ ಭಾರತೀಯರ ಗಡೀಪಾರು ಹೆಚ್ಚುತ್ತಿರುವುದು ಕೇವಲ ಪ್ರತ್ಯೇಕ ಪ್ರಕರಣಗಳ ಪರಿಣಾಮವಲ್ಲ. ತಾತ್ಕಾಲಿಕ ನಿವಾಸಿಗಳು ಮತ್ತು ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ಸಂಖ್ಯೆಯನ್ನು ನಿಯಂತ್ರಿಸುವ ಕೆನಡಾ ಸರ್ಕಾರದ ವ್ಯಾಪಕ ವಲಸೆ ನೀತಿ ಬದಲಾವಣೆಯ ಭಾಗವಾಗಿ ಈ ಬೆಳವಣಿಗೆಯನ್ನು ನೋಡಲಾಗುತ್ತಿದೆ.