‘ಟಾಕ್ಸಿಕ್’ಗೆ ಬಿಗ್ ಶಾಕ್; 300 ಕೋಟಿ ರೂ. ನಷ್ಟ?

ಯಶ್ ಅಭಿನಯದ ‘ಟಾಕ್ಸಿಕ್: ಎ ಫೇರಿಟೇಲ್ ಫಾರ್ ಗ್ರೋನ್-ಅಪ್ಸ್’ ಸಿನಿಮಾ ಭರ್ಜರಿ ಓಪನಿಂಗ್ ಪಡೆದರೂ ಬಾಕ್ಸ್ ಆಫೀಸ್‌ನಲ್ಲಿ ನಿರೀಕ್ಷಿತ ಮಟ್ಟದ ಗಳಿಕೆ ಕಾಣದೆ ಭಾರೀ ಹಿನ್ನಡೆ ಅನುಭವಿಸಿದೆ. ಸಿನಿಮಾ ಬಿಡುಗಡೆಯಾಗಿ ಎರಡು ವಾರಗಳಿಗೂ ಹೆಚ್ಚು ಸಮಯ ಕಳೆದರೂ ವಿಶ್ವಾದ್ಯಂತ ಗಳಿಕೆ ಸುಮಾರು 340 ಕೋಟಿ ರೂ.ಗೆ ಸೀಮಿತವಾಗಿದೆ ಎಂದು ವರದಿಯಾಗಿದೆ. ಟ್ರೇಡ್ ವಿಶ್ಲೇಷಕ ರಮೇಶ್ ಬಾಲಾ ಅವರ ಅಂದಾಜಿನಂತೆ ಚಿತ್ರದ ನಷ್ಟ 300ರಿಂದ 350 ಕೋಟಿ ರೂ.ವರೆಗೆ ಇರಬಹುದು ಎಂದು ಅಂದಾಜಿಲಾಗಿದೆ.

ನಾಲ್ಕು ವರ್ಷಗಳ ಬಳಿಕ ಯಶ್ ತೆರೆಮೇಲೆ ಮರಳಿದ್ದರಿಂದ ‘ಟಾಕ್ಸಿಕ್’ ಬಗ್ಗೆ ಭಾರೀ ನಿರೀಕ್ಷೆ ಇತ್ತು. ನಯನತಾರಾ, ಕಿಯಾರಾ ಅಡ್ವಾಣಿ ಹಾಗೂ ನಿರ್ದೇಶಕಿ ಗೀತು ಮೋಹನ್‌ದಾಸ್ ಅವರ ಕಾರಣದಿಂದಲೂ ಸಿನಿಮಾದ ಹೈಪ್ ಹೆಚ್ಚಾಗಿತ್ತು. ಮೊದಲ ದಿನ ವಿಶ್ವಾದ್ಯಂತ ಸುಮಾರು 140 ಕೋಟಿ ರೂ. ಗಳಿಕೆ ಕಂಡಿದ್ದ ಸಿನಿಮಾ, ಭಾರತದಲ್ಲಿ ಸುಮಾರು 101 ಕೋಟಿ ರೂ. ಗಳಿಸಿತ್ತು ಎಂದು ವರದಿಯಾಗಿದೆ. ಆದರೆ ಎರಡನೇ ದಿನವೇ ಚಿತ್ರದ ಗಳಿಕೆಯಲ್ಲಿ ಭಾರೀ ಕುಸಿತಗೊಂಡಿತ್ತು. ಎರಡನೇ ದಿನ ಭಾರತದಲ್ಲಿ ಸುಮಾರು 37 ಕೋಟಿ ರೂ. ಗಳಿಸಿದ ಸಿನಿಮಾ, ಮೊದಲ ಸೋಮವಾರದ ವೇಳೆಗೆ ದಿನದ ಗಳಿಕೆ 10 ಕೋಟಿ ರೂ.ಗಿಂತ ಇಳಿಕೆ ಕಂಡಿತ್ತು.

340 ಕೋಟಿ ರೂ. ಬಳಿ ನಿಂತ ‘ಟಾಕ್ಸಿಕ್’ ಗಳಿಕೆ

ಚಿತ್ರದ ಥಿಯೇಟ್ರಿಕಲ್ ರನ್ ಮುಂದುವರಿದಂತೆ ಗಳಿಕೆ ಮತ್ತಷ್ಟು ಕುಸಿದಿದೆ. 15ನೇ ದಿನಕ್ಕೆ ‘ಟಾಕ್ಸಿಕ್’ನ ವಿಶ್ವಾದ್ಯಂತ ಒಟ್ಟು ಗಳಿಕೆ ಸುಮಾರು 339.32 ಕೋಟಿ ರೂ. ಆಗಿತ್ತು. 16ನೇ ದಿನ ಭಾರತದಲ್ಲಿ ಕೇವಲ 39 ಲಕ್ಷ ರೂ. ಗಳಿಸಿದೆ ಎಂದು ವರದಿಯಾಗಿದೆ. ಇದರೊಂದಿಗೆ ದೇಶೀಯ ನೆಟ್ ಗಳಿಕೆ ಸುಮಾರು 248.24 ಕೋಟಿ ರೂ.ಗೆ ತಲುಪಿದೆ.

ಟ್ರೇಡ್ ವಿಶ್ಲೇಷಕ ರಮೇಶ್ ಬಾಲಾ ಪ್ರಕಾರ, ಚಿತ್ರದ ವಿಶ್ವಾದ್ಯಂತ ಥಿಯೇಟ್ರಿಕಲ್ ಶೇರ್ ಸುಮಾರು 150 ಕೋಟಿ ರೂ. ಮಾತ್ರ. ಇಷ್ಟು ದೊಡ್ಡ ಮಟ್ಟದ ಸಿನಿಮಾಗೆ ಇದು ಬಹಳ ಕಡಿಮೆ ಮೊತ್ತವಾಗಿದ್ದು, ಸಿನಿಮಾ ಬ್ರೇಕ್ ಈವನ್ ಹಂತ ತಲುಪಲು ಸಾಧ್ಯವಾಗಿಲ್ಲ ಎಂದು ಅವರು ಹೇಳಿದ್ದಾರೆ.

450ರಿಂದ 500 ಕೋಟಿ ರೂ. ಬಜೆಟ್?

‘ಟಾಕ್ಸಿಕ್’ ಸಿನಿಮಾದ ನಿರ್ಮಾಣ ವೆಚ್ಚ ಸುಮಾರು 450 ಕೋಟಿ ರೂ. ಎಂದು ಕೆಲವು ವರದಿಗಳು ಹೇಳಿವೆ. ಪ್ರಚಾರ, ಬಿಡುಗಡೆ ವೆಚ್ಚ, ಬಡ್ಡಿ ಸೇರಿದಂತೆ ಒಟ್ಟು ಹೂಡಿಕೆ 500 ಕೋಟಿ ರೂ. ಅಥವಾ ಅದಕ್ಕಿಂತಲೂ ಹೆಚ್ಚಿರಬಹುದು ಎಂಬ ಅಂದಾಜುಗಳೂ ಇವೆ.

ಆದರೆ ವಿಶ್ವಾದ್ಯಂತ ಸುಮಾರು 340 ಕೋಟಿ ರೂ. ಗಳಿಕೆ ಮಾತ್ರ ಬಂದಿರುವುದು ಸಿನಿಮಾದ ಲಾಭ-ನಷ್ಟದ ಲೆಕ್ಕಾಚಾರವನ್ನು ತಲೆಕೆಳಗಾಗಿಸಿದೆ. ವಿಶ್ವಾದ್ಯಂತ ಗಳಿಸಿದ ಮೊತ್ತವನ್ನೇ ಬಜೆಟ್‌ನೊಂದಿಗೆ ಹೋಲಿಸಿ ನೇರವಾಗಿ ನಷ್ಟ ಲೆಕ್ಕ ಹಾಕಲು ಸಾಧ್ಯವಿಲ್ಲ. ಥಿಯೇಟರ್ ಮಾಲೀಕರು, ವಿತರಕರು ಹಾಗೂ ನಿರ್ಮಾಪಕರ ನಡುವೆ ಆದಾಯ ಹಂಚಿಕೆಯಾಗುವುದರ ಜೊತೆಗೆ ಸ್ಯಾಟಲೈಟ್, ಡಿಜಿಟಲ್, ಮ್ಯೂಸಿಕ್ ಸೇರಿದಂತೆ ಇತರೆ ಹಕ್ಕುಗಳ ಆದಾಯವೂ ಪರಿಗಣಿಸಬೇಕಾಗುತ್ತದೆ.

‘ಗೇಮ್ ಚೇಂಜರ್’, ‘ಆದಿಪುರುಷ್’ ಸಾಲಿಗೆ ‘ಟಾಕ್ಸಿಕ್’

ಭಾರೀ ಬಜೆಟ್‌ನ ಸಿನಿಮಾಗಳ ವೈಫಲ್ಯಕ್ಕೆ ಉದಾಹರಣೆಯಾಗಿರುವ ರಾಮ್ ಚರಣ್ ಅಭಿನಯದ ‘ಗೇಮ್ ಚೇಂಜರ್’ ಮತ್ತು ಪ್ರಭಾಸ್ ನಟನೆಯ ‘ಆದಿಪುರುಷ್’ ಚಿತ್ರಗಳ ಜತೆಗೆ ಇದೀಗ ‘ಟಾಕ್ಸಿಕ್’ ಹೆಸರೂ ಕೇಳಿಬರುತ್ತಿದೆ.

‘ಟಾಕ್ಸಿಕ್’ ಬಜೆಟ್ 450ರಿಂದ 500 ಕೋಟಿ ರೂ. ಅಥವಾ ಅದಕ್ಕಿಂತ ಹೆಚ್ಚಿರಬಹುದು ಎಂದು ವರದಿಗಳಿದ್ದು, ವಿಶ್ವಾದ್ಯಂತ ಗಳಿಕೆ ಸುಮಾರು 340 ಕೋಟಿ ರೂ. ಆಗಿದೆ. ‘ಗೇಮ್ ಚೇಂಜರ್’ ಬಜೆಟ್ 300ರಿಂದ 400 ಕೋಟಿ ರೂ. ನಡುವೆ ಇದ್ದು, ವಿಶ್ವಾದ್ಯಂತ ಸುಮಾರು 186 ಕೋಟಿ ರೂ. ಗಳಿಸಿತ್ತು ಎಂದು ವರದಿಯಾಗಿದೆ. ‘ಆದಿಪುರುಷ್’ ಬಜೆಟ್ 500ರಿಂದ 700 ಕೋಟಿ ರೂ. ಎಂದು ಅಂದಾಜಿಸಲಾಗಿದ್ದು, ವಿಶ್ವಾದ್ಯಂತ ಸುಮಾರು 350 ಕೋಟಿ ರೂ. ಗಳಿಸಿತ್ತು.

ಆದರೆ ಈ ಎಲ್ಲಾ ಸಿನಿಮಾಗಳ ನಿಖರ ನಷ್ಟದ ಮೊತ್ತ ಅಧಿಕೃತವಾಗಿ ದೃಢಪಟ್ಟಿಲ್ಲ. ಡಿಜಿಟಲ್, ಸ್ಯಾಟಲೈಟ್ ಹಾಗೂ ಇತರ ಹಕ್ಕುಗಳಿಂದ ಸಿಗುವ ಆದಾಯದ ಆಧಾರದ ಮೇಲೆ ಅಂತಿಮ ನಷ್ಟ ಬದಲಾಗಬಹುದು.

ಓಟಿಟಿ ಹಕ್ಕುಗಳ ನಿರ್ಧಾರವೂ ದುಬಾರಿಯಾಯಿತೇ?

‘ಟಾಕ್ಸಿಕ್’ ನಿರ್ಮಾಪಕರು ಬಿಡುಗಡೆಗೂ ಮುನ್ನ ಓಟಿಟಿ ಹಕ್ಕುಗಳನ್ನು ಮಾರಾಟ ಮಾಡದೆ, ಸಿನಿಮಾ ಬ್ಲಾಕ್‌ಬಸ್ಟರ್ ಆಗಿ ಯಶಸ್ವಿಯಾದ ಬಳಿಕ ಹೆಚ್ಚಿನ ಮೊತ್ತಕ್ಕೆ ಡಿಜಿಟಲ್ ಹಕ್ಕುಗಳನ್ನು ಮಾರಾಟ ಮಾಡುವ ನಿರೀಕ್ಷೆಯಲ್ಲಿದ್ದರು ಎಂಬ ವರದಿಗಳಿವೆ.

ಆದರೆ ಥಿಯೇಟರ್‌ನಲ್ಲಿ ಸಿನಿಮಾ ನಿರೀಕ್ಷಿತ ಮಟ್ಟದಲ್ಲಿ ಪ್ರದರ್ಶನ ಕಾಣದ ಕಾರಣ ಓಟಿಟಿ ಹಕ್ಕುಗಳ ಮೌಲ್ಯವೂ ಕುಸಿದಿದೆ ಎನ್ನಲಾಗಿದೆ. ಆರಂಭದಲ್ಲಿ ಸುಮಾರು 200 ಕೋಟಿ ರೂ. ಆಫರ್ ನಿರೀಕ್ಷಿಸಲಾಗಿತ್ತು ಎಂಬ ವರದಿಗಳಿದ್ದರೆ, ಇದೀಗ ಓಟಿಟಿ ಹಕ್ಕುಗಳ ಮೌಲ್ಯ ಸುಮಾರು 30 ಕೋಟಿ ರೂ.ಗೆ ಇಳಿದಿದೆ ಎಂಬ ವರದಿಗಳೂ ಹರಿದಾಡುತ್ತಿವೆ. ಈ ಮೊತ್ತ ಇನ್ನೂ ಅಧಿಕೃತವಾಗಿ ದೃಢಪಟ್ಟಿಲ್ಲ.

ಮೊದಲ ದಿನದ ಭರ್ಜರಿ ಓಪನಿಂಗ್ ಬಳಿಕ ಸಂಪೂರ್ಣ ಕುಸಿತ

‘ಟಾಕ್ಸಿಕ್’ ವೈಫಲ್ಯದ ಪ್ರಮುಖ ಕಾರಣ ಅದರ ಮೊದಲ ದಿನದ ನಂತರದ ಭಾರೀ ಕುಸಿತ. ಸಾಮಾನ್ಯವಾಗಿ ಸಿನಿಮಾ ನಿಧಾನವಾಗಿ ಆರಂಭವಾಗಿ ಉತ್ತಮ ಮೌತ್‌ ಪಬ್ಲಿಸಿಟಿಯಿಂದ ಗಳಿಕೆ ಹೆಚ್ಚಿಸಿಕೊಳ್ಳಬಹುದು. ಆದರೆ ‘ಟಾಕ್ಸಿಕ್’ ವಿಚಾರದಲ್ಲಿ ಇದಕ್ಕೆ ವಿರುದ್ಧವಾದ ಬೆಳವಣಿಗೆ ನಡೆದಿದೆ.

ಮೊದಲ ದಿನದ ಭರ್ಜರಿ ಗಳಿಕೆ ಸಿನಿಮಾ ದೊಡ್ಡ ಬ್ಲಾಕ್‌ಬಸ್ಟರ್ ಆಗಲಿದೆ ಎಂಬ ನಿರೀಕ್ಷೆ ಮೂಡಿಸಿತ್ತು. ಆದರೆ ನಂತರದ ದಿನಗಳಲ್ಲಿ ಗಳಿಕೆ ನಿರಂತರವಾಗಿ ಕುಸಿಯಿತು. ಇದೇ ಸಂದರ್ಭದಲ್ಲಿ ‘ಮಿರ್ಜಾಪುರ: ದಿ ಮೂವಿ’ ಮತ್ತು ‘ಹನುಮಾನ್ ಅಂಶ್’ ಸೇರಿದಂತೆ ಇತರ ಸಿನಿಮಾಗಳ ಸ್ಪರ್ಧೆಯೂ ಎದುರಾಯಿತು. ಪರಿಣಾಮವಾಗಿ ‘ಟಾಕ್ಸಿಕ್’ ಹಲವು ಕಡೆಗಳಲ್ಲಿ ಶೋಗಳು ಮತ್ತು ಸ್ಕ್ರೀನ್‌ಗಳನ್ನು ಕಳೆದುಕೊಂಡಿತು.

ಯಶ್‌ ಸಿನಿಮಾಗೆ ಭಾರೀ ನಿರಾಶೆ

‘ಕೆಜಿಎಫ್: ಚಾಪ್ಟರ್ 2’ ಬಳಿಕ ಯಶ್ ಅವರ ಮುಂದಿನ ಸಿನಿಮಾವಾಗಿ ‘ಟಾಕ್ಸಿಕ್’ ಮೇಲೆ ನಿರೀಕ್ಷೆ ಹೆಚ್ಚಾಗಿತ್ತು. ನಾಲ್ಕು ವರ್ಷಗಳ ಬಳಿಕ ಯಶ್ ಮರಳಿರುವುದು, ಪ್ಯಾನ್ ಇಂಡಿಯಾ ಮಟ್ಟದ ಬಿಡುಗಡೆ ಹಾಗೂ ದೊಡ್ಡ ಬಜೆಟ್ ಸಿನಿಮಾ ಎಂಬ ಅಂಶಗಳು ಚಿತ್ರದ ಬಾಕ್ಸ್ ಆಫೀಸ್ ಯಶಸ್ಸಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದ್ದವು.

ಆದರೆ ಭರ್ಜರಿ ಆರಂಭದ ಹೊರತಾಗಿಯೂ ಸಿನಿಮಾ ನಿರೀಕ್ಷಿತ ಮಟ್ಟದಲ್ಲಿ ಗಳಿಕೆ ಮಾಡಲು ವಿಫಲವಾಗಿದೆ. ಥಿಯೇಟ್ರಿಕಲ್ ಕಲೆಕ್ಷನ್, ದೀರ್ಘಕಾಲದ ಪ್ರದರ್ಶನ ಮತ್ತು ಡಿಜಿಟಲ್ ಹಕ್ಕುಗಳಿಂದ ಸಿಗಬಹುದಾದ ಆದಾಯದ ಲೆಕ್ಕಾಚಾರಗಳು ನಿರೀಕ್ಷೆಯಂತೆ ನಡೆಯದಿರುವುದು ‘ಟಾಕ್ಸಿಕ್’ ಅನ್ನು 2026ರ ಪ್ರಮುಖ ಆರ್ಥಿಕ ವೈಫಲ್ಯಗಳಲ್ಲಿ ಒಂದಾಗಿ ಮಾಡಿದೆ ಎಂಬ ವಿಶ್ಲೇಷಣೆ ಕೇಳಿಬರುತ್ತಿದೆ.