ಯಶ್ 'ಟಾಕ್ಸಿಕ್' ಚಿತ್ರದ 'ಮನಮೋಹಕ' ಸಾಂಗ್ ರಿಲೀಸ್

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ, ಬಹುನಿರೀಕ್ಷಿತ 'ಟಾಕ್ಸಿಕ್: ಎ ಫೇರಿಟೇಲ್ ಫಾರ್ ಗ್ರೋನ್-ಅಪ್ಸ್' ಚಿತ್ರತಂಡವು ಪ್ರೇಕ್ಷಕರಿಗೆ ಭರ್ಜರಿ ಸರ್ಪ್ರೈಸ್ ನೀಡಿದ್ದು, ಚಿತ್ರದ ಮೆಲೋಡಿಯಸ್ ವೀಡಿಯೋ ಹಾಡನ್ನು ಇಂದು ಅಧಿಕೃತವಾಗಿ ಬಿಡುಗಡೆ ಮಾಡಿದೆ. ಪ್ರೀತಿಯು ತರ್ಕವನ್ನು ಮೀರಿ ಪ್ರಾರಂಭವಾಗುತ್ತದೆ ಎಂಬ ಸುಂದರ ಸಾಲಿನೊಂದಿಗೆ ಚಿತ್ರತಂಡ ಈ ಹಾಡನ್ನು ಪ್ರೇಕ್ಷಕರ ಮುಂದಿಟ್ಟಿದೆ.

ಕನ್ನಡದಲ್ಲಿ 'ಮನಮೋಹಕ' ಎಂಬ ಶೀರ್ಷಿಕೆಯಡಿ ಈ ಮಧುರವಾದ ವೀಡಿಯೋ ಗೀತೆ ಮೂಡಿಬಂದಿದೆ. ಇದರೊಂದಿಗೆ ಭಾರತೀಯ ಚಿತ್ರರಂಗದ ಇತರೆ ಪ್ರಮುಖ ಭಾಷೆಗಳಲ್ಲೂ ಹಾಡು ಲಭ್ಯವಿದ್ದು, ಹಿಂದಿಯಲ್ಲಿ 'ಮಧೋಷ್', ತೆಲುಗಿನಲ್ಲಿ 'ಮನಸಗಧೆ', ತಮಿಳಿನಲ್ಲಿ 'ತಡುಮಾರುಧೆಯ್ಯ್' ಹಾಗೂ ಮಲಯಾಳಂನಲ್ಲಿ 'ಮಧುಮೋಹಿನಿ' ಹೆಸರಿನಲ್ಲಿ ಏಕಕಾಲಕ್ಕೆ ಆಡಿಯೋ-ವೀಡಿಯೋ ಯೂಟ್ಯೂಬ್‌ನಲ್ಲಿ ಧೂಳೆಬ್ಬಿಸುತ್ತಿದೆ.

ಈ ಹೊಸ ಹಾಡು ಯಶ್ ಮತ್ತು ತಾರಾ ಸುತಾರಿಯಾ ನಡುವಿನ ಕೆಮಿಸ್ಟ್ರಿಯನ್ನು ಅನಾವರಣಗೊಳಿಸಿದೆ. ತನಿಷ್ಕ್ ಬಾಗ್ಚಿ, ಫಹೀಮ್ ಅಬ್ದುಲ್ಲಾ ಮತ್ತು ಅರ್ಸ್ಲಾನ್ ನಿಜಾಮಿ ಸಂಯೋಜಿಸಿರುವ ಈ ಗೀತೆಗೆ ಸಿದ್ಧಾರ್ಥ್ ಬಸ್ರೂರ್ ಧ್ವನಿಯಾಗಿದ್ದಾರೆ. 'ಕೆಜಿಎಫ್: ಚಾಪ್ಟರ್ 1' ಚಿತ್ರದ 'ಗಲಿ ಗಲಿ' ಹಾಡಿನ ಬಳಿಕ ಯಶ್ ಮತ್ತು ತನಿಷ್ಕ್ ಬಾಗ್ಚಿ ಅವರ ಎರಡನೇ ಕಾಂಬಿನೇಷನ್ ಇದಾಗಿದ್ದು, ಸದ್ಯ ಹೊಸ ಪೋಸ್ಟರ್ ಕೂಡ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.

ಗೀತು ಮೋಹನ್‌ದಾಸ್ ನಿರ್ದೇಶನದ ಈ ಗ್ಯಾಂಗ್‌ಸ್ಟರ್ ಆಕ್ಷನ್ ಡ್ರಾಮಾದಲ್ಲಿ ಯಶ್ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ. ಚಿತ್ರದಲ್ಲಿ ನಯನತಾರಾ, ಕಿಯಾರಾ ಅಡ್ವಾಣಿ, ರುಕ್ಮಿಣಿ ವಸಂತ್ ಹಾಗೂ ಹುಮಾ ಖುರೇಷಿ ಮುಖ್ಯ ಪಾತ್ರಗಳಲ್ಲಿದ್ದಾರೆ. ಕನ್ನಡ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ನಿರ್ಮಾಣಗೊಂಡಿರುವ ಈ ಸಿನಿಮಾ ಹಿಂದಿ, ತಮಿಳು, ತೆಲುಗು ಮತ್ತು ಮಲಯಾಳಂ ಭಾಷೆಗಳಲ್ಲಿ ಆಗಸ್ಟ್ 26ರಂದು ಜಗತ್ತಿನಾದ್ಯಂತ ಅದ್ಧೂರಿಯಾಗಿ ತೆರೆಗೆ ಬರಲಿದೆ.