ಬೆಲ್ಲಾ ಚಾವೊ ಸದ್ದು ಮತ್ತೆ ಶುರು; ಮನಿ ಹೈಸ್ಟ್ ಬಗ್ಗೆ ನೆಟ್‌ಫ್ಲಿಕ್ಸ್ ಅಪ್‌ಡೇಟ್

ವಿಶ್ವದಾದ್ಯಂತ ಅಪಾರ ಜನಪ್ರಿಯತೆ ಗಳಿಸಿರುವ ಸ್ಪ್ಯಾನಿಷ್ ಸರಣಿ 'ಮನಿ ಹೈಸ್ಟ್' ಸರಣಿಯ ಅಧಿಕೃತ ಮುಂದುವರಿಕೆಯನ್ನು ನೆಟ್‌ಫ್ಲಿಕ್ಸ್ ಹೊಸ ಟೀಸರ್ ಬಿಡುಗಡೆ ಮಾಡುವ ಮೂಲಕ ಖಚಿತಪಡಿಸಿದೆ. ಮೂಲ ಸರಣಿಯು ಮುಕ್ತಾಯಗೊಂಡು ಸುಮಾರು ಐದು ವರ್ಷಗಳೇ ಕಳೆದಿದ್ದರೂ, ಈ ರೋಚಕ ಕಥೆಯ ಜಗತ್ತು ಇನ್ನು ಮುಗಿದಿಲ್ಲ ಎನ್ನುವ ಸ್ಪಷ್ಟ ಸಂದೇಶವನ್ನು ಸಂಸ್ಥೆಯು ನೀಡಿದೆ.

ಮನಿ ಹೈಸ್ಟ್‌ನ ಪ್ರಮುಖ ಪಾತ್ರ 'ಬರ್ಲಿನ್' ಕುರಿತಾದ ಸರಣಿಯ ಎರಡನೇ ಭಾಗ ಅಂದರೆ 'ಬರ್ಲಿನ್ ಸೀಸನ್ 2' ಇದೇ ಮೇ 15 ರಂದು ಬಿಡುಗಡೆಯಾಗಲಿದೆ. ಇದರ ಬೆನ್ನಲ್ಲೇ 'ದಿ ವರ್ಲ್ಡ್ ಆಫ್ ಮನಿ ಹೈಸ್ಟ್ ಕಂಟಿನ್ಯೂಸ್' ಎಂಬ ಹೆಸರಿನ ಟೀಸರ್ ಬಿಡುಗಡೆ ಮಾಡಿರುವುದು ಕುತೂಹಲ ಮೂಡಿಸಿದೆ. ಈ ಮುಂದಿನ ಭಾಗವು ಕಥೆಯ ನೇರ ಮುಂದುವರಿಕೆಯಾಗಲಿದೆಯೇ ಅಥವಾ ಹೊಸ ಸ್ಪಿನ್-ಆಫ್ ಸರಣಿಯಾಗಲಿದೆಯೇ ಎನ್ನುವುದನ್ನು ನೆಟ್‌ಫ್ಲಿಕ್ಸ್ ಇನ್ನೂ ಗುಟ್ಟಾಗಿರಿಸಿದೆ.

ಈ ಘೋಷಣೆಯನ್ನು ಕೇವಲ ಸಾಮಾಜಿಕ ಜಾಲತಾಣಗಳಿಗೆ ಸೀಮಿತಗೊಳಿಸದ ನೆಟ್‌ಫ್ಲಿಕ್ಸ್, ಸ್ಪೇನ್‌ನ ಸೆವಿಲ್ಲೆ ನಗರದಲ್ಲಿ ಅದ್ಧೂರಿ ಪ್ರಚಾರ ಕಾರ್ಯಕ್ರಮವನ್ನು ಆಯೋಜಿಸಿತ್ತು. ಗ್ವಾಡಲ್ಕ್ವಿವಿರ್ ನದಿಯಲ್ಲಿ ಕೆಂಪು ಜಂಪ್‌ಸೂಟ್ ಧರಿಸಿದ ಮತ್ತು ಡಾಲಿ ಮಾಸ್ಕ್ ಹಾಕಿದ ನೂರಾರು ಜನರು ದೋಣಿಯಲ್ಲಿ ಸಾಗುವ ಮೂಲಕ ಅಭಿಮಾನಿಗಳನ್ನು ರಂಜಿಸಿದರು. ನದಿ ತೀರದಲ್ಲಿ ನೆರೆದಿದ್ದ ಸಾವಿರಾರು ಅಭಿಮಾನಿಗಳು 'ಬೆಲ್ಲಾ ಚಾವೊ' ಗೀತೆಯನ್ನು ಹಾಡುತ್ತಾ ಈ ಸುದ್ದಿಯನ್ನು ಸಂಭ್ರಮಿಸಿದರು.

ಅಲೆಕ್ಸ್ ಪಿನಾ ಸೃಷ್ಟಿಸಿದ ಈ ಸರಣಿಯು ನೆಟ್‌ಫ್ಲಿಕ್ಸ್ ಇತಿಹಾಸದಲ್ಲಿ ಅತಿ ಹೆಚ್ಚು ವೀಕ್ಷಣೆ ಕಂಡ ಇಂಗ್ಲಿಷ್ ಅಲ್ಲದ ಸರಣಿಗಳಲ್ಲಿ ಒಂದಾಗಿದೆ. ಪ್ರೊಫೆಸರ್ ಮತ್ತು ಅವರ ತಂಡದ ಬ್ಯಾಂಕ್ ಲೂಟಿ ಮತ್ತು ಕ್ರಾಂತಿಕಾರಿ ಹೋರಾಟದ ಕಥೆಯು ವಿಶ್ವದಾದ್ಯಂತ ಕ್ರಾಂತಿ ಮತ್ತು ಪ್ರತಿರೋಧದ ಸಂಕೇತವಾಗಿ ಮಾರ್ಪಟ್ಟಿದೆ. ಈಗ ಮತ್ತೆ ಅದೇ ರೋಚಕತೆ ಆರಂಭವಾಗುತ್ತಿರುವುದು ಸಿನಿಮಾ ಪ್ರೇಮಿಗಳಲ್ಲಿ ಹೊಸ ಭರವಸೆ ಮೂಡಿಸಿದೆ.