ಗುಲ್ಲಕ್ 5| ವೈಭವ್ ಜಾಗಕ್ಕೆ ಅನಂತ್ ಜೋಶಿ ಬಂದಾಗ ಸೆಟ್‌ನಲ್ಲಿ ನಡೆದಿದ್ದೇನು?

ಖ್ಯಾತ ವೆಬ್ ಸರಣಿ 'ಗುಲ್ಲಕ್' ತನ್ನ ನಾಲ್ಕು ಯಶಸ್ವಿ ಸೀಸನ್‌ಗಳ ನಂತರ ಇದೀಗ 5ನೇ ಸೀಸನ್ ಮೂಲಕ ಪ್ರೇಕ್ಷಕರ ಮುಂದೆ ಮರಳಿದೆ. ಈ ಸೀಸನ್‌ನಲ್ಲಿ ಅಮನ್ ಮಿಶ್ರಾ ಪಾತ್ರದಲ್ಲಿ ಹರ್ಷ್ ಮಯಾರ್ ಮತ್ತೊಮ್ಮೆ ನಟಿಸಿದ್ದು, ಜಮೀಲ್ ಖಾನ್ ಮತ್ತು ಗೀತಾಂಜಲಿ ಕುಲಕರ್ಣಿ ಅವರು ಎಂದಿನಂತೆ ಅಮ್ಮ ಹಾಗೂ ಅಪ್ಪ ಮಿಶ್ರಾ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಆದರೆ ಈ ಬಾರಿ ಸರಣಿಯಲ್ಲಿ ಒಂದು ಪ್ರಮುಖ ಬದಲಾವಣೆ ನಡೆದಿದೆ. ಸರಣಿಯ ಜನಪ್ರಿಯ ಪಾತ್ರವಾದ ಆನಂದ್ ಮಿಶ್ರಾ ಅಲಿಯಾಸ್ 'ಅಣ್ಣು ಭೈಯಾ' ಪಾತ್ರವನ್ನು ಈ ಹಿಂದೆ ಮಾಡುತ್ತಿದ್ದ ವೈಭವ್ ರಾಜ್ ಗುಪ್ತಾ ಅವರ ಜಾಗಕ್ಕೆ ನಟ ಅನಂತ್ ಜೋಶಿ ಹೊಸದಾಗಿ ಸೇರ್ಪಡೆಯಾಗಿದ್ದಾರೆ. ಈ ದೊಡ್ಡ ಪಾತ್ರದ ಬದಲಾವಣೆ ಮತ್ತು ಸಹ-ನಟನೊಂದಿಗಿನ ಕೆಮಿಸ್ಟ್ರಿ ಬಗ್ಗೆ ನಟ ಹರ್ಷ್ ಮಯಾರ್ ಇತ್ತೀಚೆಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಹಲವು ಸ್ವಾರಸ್ಯಕರ ಸಂಗತಿಗಳನ್ನು ಹಂಚಿಕೊಂಡಿದ್ದಾರೆ.

ಹೊಸ ಅಣ್ಣು ಭೈಯಾ ಜೊತೆ ನಟನಾ ಹೊಂದಾಣಿಕೆ ಮಾಡಿಕೊಳ್ಳುವುದು ತಮಗೆ ಕಷ್ಟವಾಗಲಿಲ್ಲ ಎಂದು ಹರ್ಷ್ ತಿಳಿಸಿದ್ದಾರೆ. ಇದಕ್ಕೆ ಮುಖ್ಯ ಕಾರಣ ಅನಂತ್ ಜೋಶಿ ಮತ್ತು ತಾವು ಈ ಹಿಂದೆ 'ಒನ್ ಟು ಚಾ ಚಾ ಚಾ' ಎಂಬ ಸಿನಿಮಾದಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದು, ಅಲ್ಲಿಯೇ ಇಬ್ಬರ ನಡುವೆ ಉತ್ತಮ ಪರಿಚಯವಿತ್ತು. ವೈಭವ್ ಅವರ ಬದಲಿಗೆ ಬೇರೆ ನಟನನ್ನು ಹುಡುಕುತ್ತಿದ್ದಾಗ ಕೆಲವು ಹೆಸರುಗಳು ಕೇಳಿಬಂದಿದ್ದವು ಮತ್ತು ಅದರಲ್ಲಿ ಅನಂತ್ ಅವರ ಹೆಸರೂ ಇತ್ತು. ಒಂದು ವೇಳೆ ಅಣ್ಣು ಭೈಯಾ ಪಾತ್ರಕ್ಕೆ ಬದಲಾವಣೆ ಅನಿವಾರ್ಯ ಎಂದಾದರೆ ಅನಂತ್ ಅವರನ್ನೇ ಆಯ್ಕೆ ಮಾಡಿ ಎಂದು ತಾವೇ ಚಿತ್ರತಂಡಕ್ಕೆ ಸಲಹೆ ನೀಡಿದ್ದಾಗಿ ಹರ್ಷ್ ಹೇಳಿದ್ದಾರೆ.

ಆದರೂ ಶೂಟಿಂಗ್ ಸೆಟ್‌ನಲ್ಲಿ ಹಳೆಯ ಅಣ್ಣು ಭೈಯಾ ಅಂದರೆ ವೈಭವ್ ಅವರನ್ನು ತಾವು ತುಂಬಾ ಮಿಸ್ ಮಾಡಿಕೊಂಡಿದ್ದಾಗಿ ಅವರು ಒಪ್ಪಿಕೊಂಡಿದ್ದಾರೆ. ಸೆಟ್‌ನಲ್ಲಿ ಅನಂತ್ ಜೋಶಿ ಕೂಡ ತಮ್ಮ ಬಳಿ ಬಂದು, ತಮಗೂ ವೈಭವ್ ನೆನಪಾಗುತ್ತಿರುವುದಾಗಿ ಮತ್ತು ಅವರ ಜಾಗದಲ್ಲಿ ತಾವು ನಿಂತಿರುವುದಕ್ಕೆ ಸ್ವಲ್ಪ ಮುಜುಗರವಾಗುತ್ತಿದೆ ಎಂದು ಹೇಳಿಕೊಳ್ಳುತ್ತಿದ್ದರಂತೆ. ಮತ್ತೊಬ್ಬ ನಟ ಈಗಾಗಲೇ ಜನಪ್ರಿಯಗೊಳಿಸಿರುವ ಪಾತ್ರಕ್ಕೆ ಜೀವ ತುಂಬುವುದು ಸಣ್ಣ ವಿಷಯವಲ್ಲ ಮತ್ತು ಸೋಷಿಯಲ್ ಮೀಡಿಯಾದಲ್ಲಿ ಎದುರಾಗಬಹುದಾದ ಟ್ರೋಲ್‌ಗಳ ಭಯವಿಲ್ಲದೆ ಈ ಸವಾಲನ್ನು ಸ್ವೀಕರಿಸಿದ ಅನಂತ್ ನಿಜಕ್ಕೂ ಧೈರ್ಯಶಾಲಿ ಎಂದು ಹರ್ಷ್ ಶ್ಲಾಘಿಸಿದ್ದಾರೆ.

ಇದೇ ಸಂದರ್ಭದಲ್ಲಿ ದೆಹಲಿಯ ದಕ್ಷಿಣಪುರಿಯ ಮಧ್ಯಮ ವರ್ಗದ ಕುಟುಂಬದಿಂದ ಬಂದ ಹರ್ಷ್, ತಮ್ಮ ನಿಜ ಜೀವನದ ಅನುಭವಗಳು ಈ ಸರಣಿಗೆ ಹೇಗೆ ಸಹಾಯ ಮಾಡಿದವು ಎಂಬುದನ್ನು ನೆನಪಿಸಿಕೊಂಡಿದ್ದಾರೆ. ತಾವು ಯಶ್ ರಾಜ್ ಫಿಲ್ಮ್ಸ್ ಸಂಸ್ಥೆಯ 'ಹಿಚ್ಕಿ' ಸಿನಿಮಾದಲ್ಲಿ ನಟಿಸಿದ ನಂತರ 'ಗುಲ್ಲಕ್' ಸರಣಿ ಒಪ್ಪಿಕೊಂಡಾಗ, ಅನೇಕರು ಇಷ್ಟೊಂದು ಸಣ್ಣ ಪಾತ್ರ ಮಾಡಬೇಡ ಎಂದು ಸಲಹೆ ನೀಡಿದ್ದರಂತೆ. ಆದರೆ ಈ ಕಥೆಯಲ್ಲಿ ಬರುವ ನೀರಿನ ಮೋಟಾರ್ ಆಫ್ ಮಾಡುವುದು, ಹಾಲು ತರುವುದು, ಕರೆಂಟ್ ಬಿಲ್ ಕಟ್ಟುವುದು ಮುಂತಾದ ಮಧ್ಯಮ ವರ್ಗದ ದೈನಂದಿನ ವಿಷಯಗಳು ತಮಗೆ ತುಂಬಾ ಹತ್ತಿರವಾಗಿದ್ದವು. ಭಾರತದ ಶೇಕಡಾ 80 ರಷ್ಟು ಕುಟುಂಬಗಳು ಇಂತಹದ್ದೇ ವಾತಾವರಣದಲ್ಲಿ ಬದುಕುತ್ತಿರುವುದರಿಂದ ಈ ಸರಣಿ ಖಂಡಿತವಾಗಿಯೂ ಜನರ ಮನಸ್ಸನ್ನು ತಲುಪುತ್ತದೆ ಎಂಬ ನಂಬಿಕೆ ತಮಗಿತ್ತು ಎಂದು ಅವರು ವಿವರಿಸಿದ್ದಾರೆ.

ಹಲವು ಬಾರಿ ತಮ್ಮ ಹೆತ್ತವರೇ ಫೋನ್ ಮಾಡಿ, ನಮ್ಮ ಮನೆಯ ಕಥೆಯನ್ನೇ ಸರಣಿಯಲ್ಲಿ ತೋರಿಸುತ್ತಿದ್ದೀರಾ ಎಂದು ಆಶ್ಚರ್ಯ ಪಡುತ್ತಾ ಇಡೀ ಕುಟುಂಬ ಪ್ರೀತಿಯಿಂದ ಈ ಶೋ ವೀಕ್ಷಿಸುತ್ತದೆ ಎಂದು ಹರ್ಷ್ ಹೆಮ್ಮೆಯಿಂದ ಹೇಳಿದ್ದಾರೆ.