ಟಾಕ್ಸಿಕ್‌ ಚಿತ್ರದ ಪ್ರಮುಖ ಪಾತ್ರಗಳ ಬಗ್ಗೆ ಹೊಸ ಮಾಹಿತಿ ರಿವೀಲ್‌

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ‘ಟಾಕ್ಸಿಕ್: ಆ ಫೇರಿ ಟೇಲ್ ಫಾರ್ ಗರೌನ್-ಯುಪಿಎಸ್’ ಸಿನಿಮಾ ಆಗಸ್ಟ್ 26ರಂದು ವಿಶ್ವಾದ್ಯಂತ ತೆರೆಗೆ ಬರಲು ಸಜ್ಜಾಗಿದೆ. ಚಿತ್ರದ ಬಿಡುಗಡೆಗೆ ದಿನಗಣನೆ ಆರಂಭವಾಗಿರುವ ಬೆನ್ನಲ್ಲೇ ಸಿನಿಮಾದ ಪ್ರಮುಖ ಪಾತ್ರಗಳ ಕುರಿತು ಮತ್ತಷ್ಟು ಮಾಹಿತಿ ಬಹಿರಂಗವಾಗಿದೆ.

‘ಟಾಕ್ಸಿಕ್’ನಲ್ಲಿ ಯಶ್ ಎರಡು ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅವರು ರಾಯಾ ಎಂಬ ತಂದೆಯ ಪಾತ್ರ ಹಾಗೂ ಅವರ ಮಗ ರುಮಿ ಅಲಿಯಾಸ್ ‘ಟಿಕೆಟ್’ ಪಾತ್ರವನ್ನು ನಿರ್ವಹಿಸಿದ್ದಾರೆ. ತಂದೆ-ಮಗನ ನಡುವಿನ ಸಂಬಂಧವೇ ಚಿತ್ರದ ಕಥೆಯಲ್ಲಿ ಪ್ರಮುಖ ಭಾವನಾತ್ಮಕ ಅಂಶವಾಗಿರಲಿದೆ ಎನ್ನಲಾಗಿದೆ.

ಕಿಯಾರಾ ಪಾತ್ರವೇನು? ನಯನತಾರಾ ಯಾರಾಗಿ ಕಾಣಿಸಿಕೊಳ್ಳುತ್ತಾರೆ?

ಚಿತ್ರದಲ್ಲಿ ಕಿಯಾರಾ ಅಡ್ವಾಣಿ ನಾಡಿಯಾ ಪಾತ್ರದಲ್ಲಿ ನಟಿಸಿದ್ದು, ಅವರು ರುಮಿ ಅಲಿಯಾಸ್ ಟಿಕೆಟ್‌ನ ತಾಯಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಮತ್ತೊಂದೆಡೆ ನಯನತಾರಾ ಗಂಗಾ ಎಂಬ ಪಾತ್ರವನ್ನು ನಿರ್ವಹಿಸಿದ್ದು, ರಾಯಾ ಅವರ ಸಹೋದರಿಯಾಗಿ ಕಥೆಯ ಪ್ರಮುಖ ಕೊಂಡಿಯಾಗಿದ್ದಾರೆ. ಹುಮಾ ಖುರೇಷಿ ಎಲಿಜಬೆತ್ ಪಾತ್ರದಲ್ಲಿ, ತಾರಾ ಸುತಾರಿಯಾ ರೆಬೆಕ್ಕಾ ಪಾತ್ರದಲ್ಲಿ ಹಾಗೂ ರುಕ್ಮಿಣಿ ವಸಂತ್ ಮೆಲಿಸಾ ಪಾತ್ರದಲ್ಲಿ ನಟಿಸಿದ್ದಾರೆ. ಇವರೊಂದಿಗೆ ಹಲವು ಅಂತಾರಾಷ್ಟ್ರೀಯ ಕಲಾವಿದರು ಕೂಡ ಚಿತ್ರದಲ್ಲಿ ಅಭಿನಯಿಸಿದ್ದಾರೆ.

ಅಪರಾಧ ಜಗತ್ತಿನ ಹಿನ್ನೆಲೆಯ ಕಥೆ

ಗೀತು ಮೋಹನ್‌ದಾಸ್ ನಿರ್ದೇಶನದ ‘ಟಾಕ್ಸಿಕ್’ ಕಥೆ ಸ್ವಾತಂತ್ರ್ಯೋತ್ತರ ಗೋವಾದ ಹಿನ್ನೆಲೆಯಲ್ಲಿದೆ. ವಸಾಹತುಶಾಹಿ ಆಡಳಿತ ಅಂತ್ಯಗೊಂಡ ಬಳಿಕದ ಸಾಮಾಜಿಕ ಬದಲಾವಣೆಗಳ ನಡುವಿನ ಅಪರಾಧ ಜಗತ್ತನ್ನು ಚಿತ್ರವು ಪರಿಚಯಿಸಲಿದೆ.

ಗ್ಯಾಂಗ್‌ಸ್ಟರ್ ಕಥಾಹಂದರ ಹೊಂದಿದ್ದರೂ, ಸಿನಿಮಾ ಕೇವಲ ಹಿಂಸೆ ಮತ್ತು ಸೇಡಿನ ಕಥೆಗೆ ಸೀಮಿತವಾಗಿಲ್ಲ. ನಿಷ್ಠೆ, ನೈತಿಕತೆ, ಅಸೂಯೆ, ಪ್ರೀತಿ ಮತ್ತು ವಿಮೋಚನೆಯಂತಹ ಅಂಶಗಳನ್ನೂ ಕಥೆ ಒಳಗೊಂಡಿದೆ. ಯಶ್ ನಿರ್ವಹಿಸಿರುವ ರಾಯಾ ಮತ್ತು ರುಮಿ ಪಾತ್ರಗಳ ನಡುವಿನ ಸಂಬಂಧವು ಅಧಿಕಾರ, ಗುರುತು ಮತ್ತು ಸಿದ್ಧಾಂತಗಳ ಸಂಘರ್ಷದೊಂದಿಗೆ ಬೆಸೆದುಕೊಂಡಿದೆ.

ಭರ್ಜರಿ ಬಜೆಟ್‌ನಲ್ಲಿ ನಿರ್ಮಾಣ

‘ಟಾಕ್ಸಿಕ್’ ಚಿತ್ರವನ್ನು ಸುಮಾರು 500ರಿಂದ 600 ಕೋಟಿ ರೂ. ಬಜೆಟ್‌ನಲ್ಲಿ ನಿರ್ಮಿಸಲಾಗುತ್ತಿದೆ ಎಂದು ವರದಿಯಾಗಿದೆ. ಕೆವಿಎನ್ ಪ್ರೊಡಕ್ಷನ್ಸ್‌ನ ವೆಂಕಟ್ ಕೆ. ನಾರಾಯಣ ಹಾಗೂ ಯಶ್ ಅವರ ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್ ಸಂಸ್ಥೆಗಳು ಚಿತ್ರವನ್ನು ನಿರ್ಮಿಸಿವೆ. 2024ರ ಆಗಸ್ಟ್‌ನಲ್ಲಿ ಆರಂಭವಾದ ಚಿತ್ರೀಕರಣ 2025ರ ಅಕ್ಟೋಬರ್‌ವರೆಗೆ ನಡೆದಿದ್ದು, ಬೆಂಗಳೂರು, ಮುಂಬೈ, ಗೋವಾ, ತೂತ್ತುಕುಡಿ ಮತ್ತು ಜೈಪುರ ಸೇರಿದಂತೆ ಹಲವು ಸ್ಥಳಗಳಲ್ಲಿ ಚಿತ್ರೀಕರಣ ನಡೆಸಲಾಗಿದೆ.

ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ‘ಟಾಕ್ಸಿಕ್’ ಬಿಡುಗಡೆ

ಚಿತ್ರದ ಸಂಗೀತಕ್ಕೆ ವಿಶಾಲ್ ಮಿಶ್ರಾ, ರವಿ ಬಸ್ರೂರ್, ತನಿಷ್ಕ್ ಬಾಗ್ಚಿ, ಫಹೀಮ್ ಅಬ್ದುಲ್ಲಾ ಮತ್ತು ಅರ್ಸ್ಲಾನ್ ನಿಜಾಮಿ ಸೇರಿದಂತೆ ಹಲವು ಸಂಗೀತ ನಿರ್ದೇಶಕರು ಕೊಡುಗೆ ನೀಡಿದ್ದಾರೆ. ರವಿ ಬಸ್ರೂರ್ ಹಿನ್ನೆಲೆ ಸಂಗೀತವನ್ನೂ ಸಂಯೋಜಿಸಿದ್ದಾರೆ.

‘ಜಾನ್ ವಿಕ್’ ಮತ್ತು ‘ಫಾಸ್ಟ್ & ಫ್ಯೂರಿಯಸ್’ ಸರಣಿಯಂತಹ ಚಿತ್ರಗಳಲ್ಲಿ ಕೆಲಸ ಮಾಡಿರುವ ಅಂತಾರಾಷ್ಟ್ರೀಯ ಸ್ಟಂಟ್ ಕೋಆರ್ಡಿನೇಟರ್ ಜೆಜೆ ಪೆರ್ರಿ ಕೂಡ ಚಿತ್ರದ ಆ್ಯಕ್ಷನ್ ದೃಶ್ಯಗಳಿಗೆ ಕೆಲಸ ಮಾಡಿದ್ದಾರೆ. ಭಾರತೀಯ ಆ್ಯಕ್ಷನ್ ನಿರ್ದೇಶಕರಾದ ಅನ್ಬರಿವ್ ಸೇರಿದಂತೆ ಹಲವರು ಅವರಿಗೆ ಸಾಥ್ ನೀಡಿದ್ದಾರೆ.

‘ಕೆಜಿಎಫ್‌: ಚಾಪ್ಟರ್ 2’’ ಬಳಿಕ ಯಶ್ ಪ್ರಮುಖ ಪಾತ್ರದಲ್ಲಿ ತೆರೆಗೆ ಬರುತ್ತಿರುವ ಚಿತ್ರ ಇದಾಗಿದೆ. ಈ ಸಿನಿಮಾ ಈ ಹಿಂದೆ ಮಾರ್ಚ್ 19 ಹಾಗೂ ಜೂನ್ 4ರಂದು ಬಿಡುಗಡೆಯಾಗಬೇಕಿತ್ತು. ಆದರೆ ಹಲವು ಕಾರಣಗಳಿಂದ ಬಿಡುಗಡೆ ದಿನಾಂಕ ಮುಂದೂಡಲ್ಪಟ್ಟು ಇದೀಗ ಆಗಸ್ಟ್ 26ರಂದು ವಿಶ್ವಾದ್ಯಂತ ತೆರೆಗೆ ಬರಲು ಸಜ್ಜಾಗಿದೆ. ‘ಟಾಕ್ಸಿಕ್’ ಅನ್ನು ಕನ್ನಡ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ಏಕಕಾಲದಲ್ಲಿ ಚಿತ್ರೀಕರಿಸಲಾಗಿದ್ದು, ಹಿಂದಿ, ತೆಲುಗು, ತಮಿಳು ಮತ್ತು ಮಲಯಾಳಂ ಭಾಷೆಗಳಲ್ಲೂ ಡಬ್ ಅಥವಾ ಸಬ್‌ಟೈಟಲ್‌ಗಳೊಂದಿಗೆ ಬಿಡುಗಡೆ ಮಾಡಲು ಸಿದ್ಧತೆ ನಡೆದಿದೆ.