ಚಿತ್ರಗಳಲ್ಲಿ ಮಹಿಳೆಯರನ್ನು ಚಿತ್ರಿಸಿರುವ ರೀತಿಯ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ನಡೆಯುತ್ತಿದೆ. ಈ ವಿವಾದದ ನಡುವೆಯೇ ನಟಿ ತಾಪ್ಸಿ ಪನ್ನು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
‘ಟಾಕ್ಸಿಕ್’, ‘ಪೆದ್ದಿ’ ಸಿನಿಮಾಗಳಲ್ಲಿ ಮಹಿಳೆಯರ ಚಿತ್ರಣದ ಬಗ್ಗೆ ತಾಪ್ಸಿ ಪನ್ನು ಕಿಡಿ
ಸಿನಿಮಾ ಉದ್ಯಮದಲ್ಲಿ ‘ಜನರಿಗೆ ಇದು ಬೇಕು, ಹಾಗಾಗಿ ನಾವು ಅದನ್ನೇ ಕೊಡಬೇಕು’ ಎಂಬ ಮನಸ್ಥಿತಿ ಇದೆ ಎಂದು ತಾಪ್ಸಿ ಹೇಳಿದ್ದಾರೆ. ಈ ರೀತಿಯ ಬೇಡಿಕೆ-ಪೂರೈಕೆ ಲೆಕ್ಕಾಚಾರದಲ್ಲಿ ಕಲೆ ಮತ್ತು ಸಿನಿಮಾದ ತಂತ್ರಗಾರಿಕೆ ಹಿಂದೆ ಸರಿಯುತ್ತಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
‘ಟಾಕ್ಸಿಕ್’ ಮತ್ತು ‘ಪೆಡ್ಡಿ’ ಚಿತ್ರಗಳಲ್ಲಿ ಮಹಿಳೆಯರ ಚಿತ್ರಣದ ಕುರಿತು ಟೀಕೆ ವ್ಯಕ್ತವಾಗುತ್ತಿರುವ ನಡುವೆ ತಾಪ್ಸಿ ಪನ್ನು, ಪ್ರೇಕ್ಷಕರ ಬೇಡಿಕೆ ನೆಪದಲ್ಲಿ ಕಲೆ ರಾಜಿಯಾಗಬಾರದು ಎಂದಿದ್ದಾರೆ.
ಇತ್ತೀಚಿನ ದೊಡ್ಡ ಬಜೆಟ್ ಚಿತ್ರಗಳಾದ ಯಶ್ ಅಭಿನಯದ ‘ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್-ಅಪ್ಸ್’ ಹಾಗೂ ರಾಮ್ ಚರಣ್ ಅಭಿನಯದ ‘ಪೆಡ್ಡಿ’ ಚಿತ್ರಗಳಲ್ಲಿ ಮಹಿಳೆಯರನ್ನು ಚಿತ್ರಿಸಿರುವ ರೀತಿಯ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ನಡೆಯುತ್ತಿದೆ. ಈ ವಿವಾದದ ನಡುವೆಯೇ ನಟಿ ತಾಪ್ಸಿ ಪನ್ನು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ಸಂದರ್ಶನವೊಂದರಲ್ಲಿ ಮಾತನಾಡಿದ ತಾಪ್ಸಿ, ಸಿನಿಮಾಗಳಲ್ಲಿನ ಮಹಿಳೆಯರ ವಸ್ತುವೀಕರಣದ ಬಗ್ಗೆ ಉದ್ಯಮವು ಹಲವು ಬಾರಿ ಪ್ರೇಕ್ಷಕರನ್ನೇ ಹೊಣೆ ಮಾಡುತ್ತದೆ ಎಂದು ಹೇಳಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಎಷ್ಟೇ ಟೀಕೆ, ಆಕ್ಷೇಪ ವ್ಯಕ್ತವಾದರೂ, ಅದರಿಂದ ಮಾಸ್ ಸಿನಿಮಾಗಳ ಮೇಲೆ ದೊಡ್ಡ ಪರಿಣಾಮ ಬೀರುವುದಿಲ್ಲ ಎಂದಿದ್ದಾರೆ.
‘ಇದು ಬೇಡಿಕೆ ಮತ್ತು ಪೂರೈಕೆಯ ವಿಚಾರ’
ಸಿನಿಮಾ ಉದ್ಯಮದಲ್ಲಿ ‘ಜನರಿಗೆ ಇದು ಬೇಕು, ಹಾಗಾಗಿ ನಾವು ಅದನ್ನೇ ಕೊಡಬೇಕು’ ಎಂಬ ಮನಸ್ಥಿತಿ ಇದೆ ಎಂದು ತಾಪ್ಸಿ ಹೇಳಿದ್ದಾರೆ. ಈ ರೀತಿಯ ಬೇಡಿಕೆ-ಪೂರೈಕೆ ಲೆಕ್ಕಾಚಾರದಲ್ಲಿ ಕಲೆ ಮತ್ತು ಸಿನಿಮಾದ ತಂತ್ರಗಾರಿಕೆ ಹಿಂದೆ ಸರಿಯುತ್ತಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಕೊರೊನಾ ನಂತರದ ಅವಧಿಯಲ್ಲಿ ಭಾರತೀಯ ಚಿತ್ರರಂಗ ಉತ್ತಮ ಮಟ್ಟಕ್ಕೆ ಸಾಗಿತ್ತು. ಆದರೆ ಇದೀಗ ಮತ್ತೆ ಸಿನಿಮಾಗಳ ಗುಣಮಟ್ಟದಲ್ಲಿ ಹಿನ್ನಡೆ ಕಾಣಿಸುತ್ತಿದೆ ಎಂದು ತಾಪ್ಸಿ ಹೇಳಿದ್ದಾರೆ. ಪ್ರೇಕ್ಷಕರ ಬೇಡಿಕೆಯನ್ನೇ ನೆಪ ಮಾಡಿಕೊಂಡು ನಿರ್ಮಾಪಕರು ಮತ್ತು ನಿರ್ದೇಶಕರು ಜವಾಬ್ದಾರಿಯನ್ನು ಪ್ರೇಕ್ಷಕರ ಮೇಲೆ ಹಾಕುತ್ತಾರೆ. ಈ ವಿಚಾರದಲ್ಲಿ ನಟರು ತಮ್ಮ ಪಾತ್ರವನ್ನು ಸಮರ್ಥವಾಗಿ ನಿಭಾಯಿಸಲು ಸಾಧ್ಯವಾಗುತ್ತಿಲ್ಲ ಎಂದಿದ್ದಾರೆ.
‘ಈ ಹೋರಾಟ ಗೆಲ್ಲಲು ಪ್ರೇಕ್ಷಕರ ಬೆಂಬಲ ಬೇಕು’
ಸಿನಿಮಾದಲ್ಲಿ ಬದಲಾವಣೆ ತರಲು ನಟರು ಮಾತ್ರ ಹೋರಾಡಿದರೆ ಸಾಕಾಗುವುದಿಲ್ಲ. ಪ್ರೇಕ್ಷಕರ ಬೆಂಬಲವೂ ಅಗತ್ಯ ಎಂದು ತಾಪ್ಸಿ ಹೇಳಿದ್ದಾರೆ. ಪ್ರೇಕ್ಷಕರು ಯಾವ ರೀತಿಯ ಸಿನಿಮಾಗಳನ್ನು ಬೆಂಬಲಿಸುತ್ತಾರೆ ಎಂಬುದು ಉದ್ಯಮದ ಮುಂದಿನ ದಿಕ್ಕನ್ನು ನಿರ್ಧರಿಸುತ್ತದೆ ಎಂಬ ಸಂದೇಶವನ್ನು ಅವರು ನೀಡಿದ್ದಾರೆ.
‘ಪೆದ್ದಿ’ಯಲ್ಲಿ ಜಾನ್ವಿ ಪಾತ್ರದ ಬಗ್ಗೆ ಟೀಕೆ
ರಾಮ್ ಚರಣ್ ಅಭಿನಯದ ‘ಪೆದ್ದಿ’ ಚಿತ್ರದಲ್ಲಿ ಜಾನ್ವಿ ಕಪೂರ್ ನಿರ್ವಹಿಸಿರುವ ಅಚಿಯಮ್ಮ ಪಾತ್ರದ ಚಿತ್ರಣದ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಟೀಕೆ ವ್ಯಕ್ತವಾಗಿತ್ತು. ವಿಶೇಷವಾಗಿ ಕ್ಯಾಮೆರಾ ಕೆಲಸ, ಪ್ರಣಯ ದೃಶ್ಯಗಳು ಹಾಗೂ ಪಾತ್ರದ ವ್ಯಕ್ತಿತ್ವಕ್ಕಿಂತ ದೈಹಿಕ ಸೌಂದರ್ಯಕ್ಕೆ ಹೆಚ್ಚಿನ ಒತ್ತು ನೀಡಲಾಗಿದೆ ಎಂಬ ಆರೋಪ ಕೇಳಿಬಂದಿತ್ತು. ಬಳಿಕ ಚಿತ್ರದ ನಿರ್ದೇಶಕರು ಕೆಲವು ದೃಶ್ಯಗಳನ್ನು ತೆಗೆದುಹಾಕಿ ಕ್ಷಮೆಯಾಚಿಸಿದ್ದರು.
‘ಟಾಕ್ಸಿಕ್’ ಮೇಲೂ ವಸ್ತುವೀಕರಣದ ಆರೋಪ
ಯಶ್ ಮತ್ತು ಗೀತು ಮೋಹನ್ದಾಸ್ ಕಾಂಬಿನೇಷನ್ನ ‘ಟಾಕ್ಸಿಕ್’ ಚಿತ್ರ ಬಿಡುಗಡೆಯಾಗುವ ಮೊದಲೇ ಮಹಿಳಾ ಪಾತ್ರಗಳ ಚಿತ್ರಣದ ಬಗ್ಗೆ ಚರ್ಚೆ ಆರಂಭವಾಗಿತ್ತು. ಚಿತ್ರ ಬಿಡುಗಡೆಯಾದ ಬಳಿಕವೂ ಮಹಿಳಾ ಪಾತ್ರಗಳನ್ನು ಗ್ಲಾಮರ್, ಸೆನ್ಸುವಾಲಿಟಿ ಹಾಗೂ ನಾಯಕನೊಂದಿಗಿನ ಸಂಬಂಧಗಳ ಮೂಲಕವೇ ಮುಖ್ಯವಾಗಿ ತೋರಿಸಲಾಗಿದೆ ಎಂದು ಕೆಲ ಪ್ರೇಕ್ಷಕರು ಟೀಕಿಸಿದ್ದರು.
ಇದೀಗ ತಾಪ್ಸಿ ಪನ್ನು ಅವರ ಹೇಳಿಕೆಗಳು ಈ ಚರ್ಚೆಗೆ ಮತ್ತಷ್ಟು ಕಾವು ನೀಡಿವೆ. ತಾಪ್ಸಿಯ ಇತ್ತೀಚಿನ ಚಿತ್ರ ‘ಗಾಂಧಾರಿ’ಯನ್ನು ದೇವಾಶಿಶ್ ಮಖಿಜಾ ನಿರ್ದೇಶಿಸಿದ್ದು, ಕನಿಕಾ ಧಿಲ್ಲೋನ್ ಬರೆದು ನಿರ್ಮಿಸಿದ್ದಾರೆ. ಚಿತ್ರದಲ್ಲಿ ತಾಪ್ಸಿ ಪನ್ನು, ಇಶ್ವಾಕ್ ಸಿಂಗ್, ಛಾಯಾ ಕದಮ್, ಸ್ವಸ್ತಿಕಾ ಮುಖರ್ಜಿ ಮತ್ತು ಮಿತಾ ವಶಿಷ್ಠ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಚಿತ್ರ ನೆಟ್ಫ್ಲಿಕ್ಸ್ನಲ್ಲಿ ಸ್ಟ್ರೀಮಿಂಗ್ ಆಗುತ್ತಿದೆ.
