‘ಬ್ಲಿಂಕ್’ ಮತ್ತು ‘ಜೆರಾಕ್ಸ್’ ಸಿನಿಮಾಗಳ ಬಳಿಕ ನಿರ್ದೇಶಕ ಶ್ರೀನಿಧಿ ಬೆಂಗಳೂರು ಇದೀಗ ‘ವಿಡಿಯೋ’ ಮೂಲಕ ವಿಭಿನ್ನ ಪ್ರಯೋಗಕ್ಕೆ ಮುಂದಾಗಿದ್ದಾರೆ.
‘ಬ್ಲಿಂಕ್’ ನಿರ್ದೇಶಕ ಶ್ರೀನಿಧಿ ಬೆಂಗಳೂರು ಅವರ ಹೊಸ ಪ್ರಯೋಗ: 'ವಿಡಿಯೋ' ಸಿನಿಮಾ ಸೆಪ್ಟೆಂಬರ್ 11ಕ್ಕೆ ತೆರೆಗೆ
‘ವಿಡಿಯೋ’ ಮೂಲಕ ಹೊಸ ಬಗೆಯ ಹಾರರ್ ಅನುಭವ ನೀಡಲು ನಿರ್ದೇಶಕ ಶ್ರೀನಿಧಿ ಬೆಂಗಳೂರು ಮುಂದಾಗಿದ್ದಾರೆ. 12 ಆ್ಯಕ್ಷನ್ ಕ್ಯಾಮೆರಾ, ಸಹಜ ಅಭಿನಯ ಮತ್ತು ಆ್ಯಂಬಿಯೆಂಟ್ ಸೌಂಡ್ ಬಳಸಲಾಗಿದೆ.
ಬ್ಲಿಂಕ್’ ಮತ್ತು ‘ಜೆರಾಕ್ಸ್’ ಸಿನಿಮಾಗಳ ಬಳಿಕ ನಿರ್ದೇಶಕ ಶ್ರೀನಿಧಿ ಬೆಂಗಳೂರು ಇದೀಗ ‘ವಿಡಿಯೋ’ ಮೂಲಕ ವಿಭಿನ್ನ ಪ್ರಯೋಗಕ್ಕೆ ಮುಂದಾಗಿದ್ದಾರೆ. ಫೌಂಡ್-ಫುಟೇಜ್ ಹಾರರ್ ಶೈಲಿಯಲ್ಲಿ ಮೂಡಿಬಂದಿರುವ ಈ ಸಿನಿಮಾ ಸೆಪ್ಟೆಂಬರ್ 11ರಂದು ಬಿಡುಗಡೆಯಾಗಲಿದೆ. ಸಾಮಾನ್ಯ ಹಾರರ್ ಸಿನಿಮಾಗಳಿಗಿಂತ ವಿಭಿನ್ನ ಅನುಭವವನ್ನು ಪ್ರೇಕ್ಷಕರಿಗೆ ನೀಡುವುದು ತಮ್ಮ ಉದ್ದೇಶ ಎಂದು ಶ್ರೀನಿಧಿ ಹೇಳಿದ್ದಾರೆ.
‘ವಿಡಿಯೋ’ ಸಿನಿಮಾದ ಚಿತ್ರೀಕರಣದಲ್ಲಿ 12 ಆ್ಯಕ್ಷನ್ ಕ್ಯಾಮೆರಾಗಳನ್ನು ಬಳಸಲಾಗಿದೆ. ಪಾತ್ರಗಳ ಸಹಜ ಅಭಿನಯ, ಓವರ್ಲ್ಯಾಪಿಂಗ್ ಸಂಭಾಷಣೆ ಮತ್ತು ಸುತ್ತಲಿನ ನೈಜ ಶಬ್ದಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ. ಸಿನಿಮಾದಲ್ಲಿ ಸಾಂಪ್ರದಾಯಿಕ ಹಿನ್ನೆಲೆ ಸಂಗೀತವನ್ನು ಬಳಸದೆ, ಆ್ಯಂಬಿಯೆಂಟ್ ಸೌಂಡ್ ಮೂಲಕವೇ ಭಯದ ವಾತಾವರಣ ಕಟ್ಟಲಾಗಿದೆ.
‘ಹೊಸದೇನಾದರೂ ಮಾಡಬೇಕು’ ಎಂಬ ಆಲೋಚನೆ
‘ಬ್ಲಿಂಕ್’ ಬಳಿಕವೇ ‘ವಿಡಿಯೋ’ ಕಥೆಯನ್ನು ಬರೆದಿದ್ದಾಗಿ ಶ್ರೀನಿಧಿ ತಿಳಿಸಿದ್ದಾರೆ. ಪ್ರೀತಿ ಹಾಗೂ ಈಗಾಗಲೇ ಪರಿಚಿತವಾಗಿರುವ ಕಥಾವಸ್ತುಗಳ ನಡುವೆ ತಮ್ಮ ಸಿನಿಮಾವೂ ಅದೇ ದಾರಿಯಲ್ಲಿ ಸಾಗಿದರೆ ಪ್ರೇಕ್ಷಕರ ಗಮನ ಸೆಳೆಯುವುದು ಕಷ್ಟವಾಗಬಹುದು ಎಂಬ ಕಾರಣಕ್ಕೆ ಹೊಸ ಪ್ರಕಾರವನ್ನು ಆಯ್ಕೆ ಮಾಡಿಕೊಂಡಿದ್ದಾಗಿ ಹೇಳಿದ್ದಾರೆ. ಅಪರೂಪದ ಪ್ರಕಾರದಲ್ಲಿ ಪ್ರಯತ್ನಿಸಿದರೆ ಸಿನಿಮಾಕ್ಕೊಂದು ವಿಭಿನ್ನ ಗುರುತು ಸಿಗಬಹುದು ಎಂಬುದು ಅವರ ನಂಬಿಕೆ.
ಆರಂಭದಲ್ಲಿ ಸಂಭಾಷಣೆಯೇ ಇರಲಿಲ್ಲ
‘ವಿಡಿಯೋ’ದ ಆರಂಭಿಕ ಸ್ಕ್ರಿಪ್ಟ್ನಲ್ಲಿ ಘಟನೆಗಳನ್ನು ಮಾತ್ರ ಬರೆದಿದ್ದ ಶ್ರೀನಿಧಿ, ಸಂಭಾಷಣೆ ಮತ್ತು ಪಾತ್ರಗಳ ನಿರೂಪಣೆಯನ್ನು ಸೆಟ್ನಲ್ಲೇ ರೂಪಿಸಲು ಯೋಚಿಸಿದ್ದರು. ಆದರೆ ಈ ಪ್ರಯೋಗದಲ್ಲಿ ನಟರು ಗೊಂದಲಕ್ಕೀಡಾದ ಹಿನ್ನೆಲೆಯಲ್ಲಿ, ಸಹಜ ಅಭಿನಯಕ್ಕೆ ಹತ್ತಿರವಾದ ಶೈಲಿಯನ್ನು ಅಳವಡಿಸಿಕೊಂಡರು. ಸ್ನೇಹಿತರು ಸಹಜವಾಗಿ ಮಾತನಾಡುವ ರೀತಿಯಲ್ಲೇ ಸಂಭಾಷಣೆಗಳನ್ನು ರೂಪಿಸಲಾಯಿತು.
‘ತರ್ಲೆ ಬಾಯ್ಸ್’ನಿಂದ ಕಥೆ ವಿಸ್ತರಣೆ
ಚಿತ್ರದ ಆರಂಭದಲ್ಲಿ ಮೂರು ಬ್ಲಾಗರ್ಗಳ ಪಾತ್ರಗಳಿದ್ದು, ಅವರನ್ನು ‘ತರ್ಲೆ ಬಾಯ್ಸ್’ ಎಂದು ಕರೆಯಲಾಗುತ್ತಿತ್ತು. ಬಳಿಕ ತಂಡಕ್ಕೆ ಮತ್ತಿಬ್ಬರು ಪಾತ್ರಗಳನ್ನು ಸೇರಿಸಲಾಯಿತು. ಚಿತ್ರದ ಮೊದಲ ಭಾಗದಲ್ಲಿ ಹಾಸ್ಯ ಮತ್ತು ಹಗುರವಾದ ವಾತಾವರಣವಿದ್ದು, ನಂತರ ಕಥೆ ನಿಧಾನವಾಗಿ ಹಾರರ್ನತ್ತ ತಿರುಗುತ್ತದೆ.
ಅಪರಿಚಿತ ಸ್ಥಳವೇ ಭಯಕ್ಕೆ ಕಾರಣ
ಅಪರಿಚಿತ ಸ್ಥಳದಲ್ಲಿ ಉಂಟಾಗುವ ಭಾವನೆಗಳಿಂದ ‘ವಿಡಿಯೋ’ದ ಭಯದ ಪರಿಕಲ್ಪನೆಗೆ ಸ್ಫೂರ್ತಿ ಪಡೆದಿದ್ದಾಗಿ ನಿರ್ದೇಶಕರು ಹೇಳಿದ್ದಾರೆ. ಆಂಧ್ರಪ್ರದೇಶದ ಗ್ರಾಮವೊಂದರಲ್ಲಿ ಮಧ್ಯರಾತ್ರಿ ಅನುಭವಿಸಿದ ಭಯವೂ ತಮ್ಮ ಆಲೋಚನೆಗೆ ಪ್ರಭಾವ ಬೀರಿದೆ. ಸ್ಥಳ, ವಾತಾವರಣ ಮತ್ತು ಸುತ್ತಮುತ್ತಲಿನ ಜನರು ಪರಿಚಿತರಲ್ಲದಾಗ ಮೂಡುವ ಅನ್ಯತೆಯ ಭಾವನೆಯೇ ಭಯಕ್ಕೆ ಕಾರಣವಾಗಬಹುದು ಎಂಬುದನ್ನು ಅವರು ಗಮನಿಸಿದ್ದಾರೆ.
ಕನ್ನಡದ ‘ಆಪ್ತಮಿತ್ರ’ ಸಿನಿಮಾದಲ್ಲಿನ ಭಾಷೆ ಮತ್ತು ಅಪರಿಚಿತತೆಯ ಮೂಲಕ ಭಯವನ್ನು ಹೆಚ್ಚಿಸುವ ಅಂಶವೂ ತಮ್ಮ ಆಲೋಚನೆಗೆ ಪ್ರೇರಣೆಯಾಗಿದೆ ಎಂದು ಶ್ರೀನಿಧಿ ತಿಳಿಸಿದ್ದಾರೆ. ದೀಕ್ಷಿತ್ ಶೆಟ್ಟಿ ನಿರ್ಮಾಣದ ಬ್ಯಾನರ್ ‘ಧೀ ಸಿನಿಮಾಸ್’ ಅಡಿಯಲ್ಲಿ ಮೊದಲ ಬಾರಿಗೆ ನಿರ್ಮಾಪಕರಾಗಿ ಸಿನಿಮಾ ಮೂಡಿಬರುತ್ತಿದ್ದು, ಭರತ್ ಸಾಗರ್ ಕಾರ್ಯಕಾರಿ ನಿರ್ಮಾಪಕರಾಗಿದ್ದಾರೆ.
