ರಮೇಶ್ ಅರವಿಂದ್, ಮೈಕಲ್ ಜಾಕ್ಸನ್ ನಡುವಿನ ಸಂಬಂಧ ಏನು ಗೊತ್ತಾ?

ಪ್ರಸ್ತುತ ಮೈಕಲ್ ಜಾಕ್ಸನ್ ಅವರ ಜೀವನ ಆಧಾರಿತ ಸಿನಿಮಾ ವಿಶ್ವದಾದ್ಯಂತ ಸದ್ದು ಮಾಡುತ್ತಿದ್ದು, ಪ್ರೇಕ್ಷಕರಲ್ಲಿ ಹಳೆಯ ನೆನಪುಗಳನ್ನು ಮರುಕಳಿಸುವಂತೆ ಮಾಡಿದೆ. ಈ ಬೆನ್ನಲ್ಲೇ ಸ್ಯಾಂಡಲ್‌ವುಡ್‌ನ ಜನಪ್ರಿಯ ನಟ ರಮೇಶ್ ಅರವಿಂದ್ ಅವರಿಗೂ ಮೈಕಲ್ ಜಾಕ್ಸನ್‌ಗೂ ಇರುವ ಒಂದು ಕುತೂಹಲಕಾರಿ ಕೊಂಡಿ ಬೆಳಕಿಗೆ ಬಂದಿದೆ.

ರಮೇಶ್ ಅರವಿಂದ್ ಅವರ ಆರಂಭಿಕ ದಿನಗಳ ಸಿನಿಮಾವಾದ 'ಸುಂದರ ಸ್ವಪ್ನಗಳು' ಚಿತ್ರದ 'ಕ್ಷಮಿಸಿ ನಾ ಹೇಳೋದೆಲ್ಲ' ಎಂಬ ಹಾಡಿನಲ್ಲಿ ಅವರು ಕೆಂಪು ಬಣ್ಣದ ವಿಶಿಷ್ಟ ಜಾಕೆಟ್ ಧರಿಸಿ ಕಾಣಿಸಿಕೊಂಡಿದ್ದರು. ಇದು ಮೈಕಲ್ ಜಾಕ್ಸನ್ ಅವರ ಅತಿ ದೊಡ್ಡ ಹಿಟ್ ಹಾಡಾದ 'ಥ್ರಿಲ್ಲರ್' ನಲ್ಲಿ ಜಾಕ್ಸನ್ ಧರಿಸಿದ್ದ ಐಕಾನಿಕ್ ರೆಡ್ ಜಾಕೆಟ್‌ನಿಂದ ಪ್ರೇರಿತವಾಗಿದೆ ಎಂಬ ಅಚ್ಚರಿಯ ವಿಷಯವನ್ನು ಸ್ವತಃ ರಮೇಶ್ ಅರವಿಂದ್ ಹಂಚಿಕೊಂಡಿದ್ದಾರೆ.

ತಮ್ಮ ಹಳೆಯ ನೆನಪುಗಳನ್ನು ಮೆಲುಕು ಹಾಕಿದ ರಮೇಶ್, ತಮ್ಮ ತಲೆಮಾರಿನವರು ಮೈಕಲ್ ಜಾಕ್ಸನ್ ಸಂಗೀತವನ್ನು ಕೇಳುತ್ತಲೇ ಬೆಳೆದವರು ಎಂದು ಹೇಳಿದ್ದಾರೆ. ಆ ಸಮಯದಲ್ಲಿ 'ಥ್ರಿಲ್ಲರ್' ಅಲ್ಬಮ್ ದೊಡ್ಡ ಸಂಚಲನ ಸೃಷ್ಟಿಸಿತ್ತು ಮತ್ತು ಜಾಕ್ಸನ್ ಧರಿಸುತ್ತಿದ್ದ ಆ ಕೆಂಪು ಜಾಕೆಟ್ ಅಂದಿನ ಯುವಕರ ಫ್ಯಾಷನ್ ಸಂಕೇತವಾಗಿತ್ತು. ಇದೇ ಕಾರಣಕ್ಕೆ ತಮ್ಮ ಚಿತ್ರದ ಹಾಡಿಗೂ ಅಂತಹದ್ದೇ ಲುಕ್ ನೀಡಲು ನಿರ್ಧರಿಸಿದ್ದಾಗಿ ಅವರು ತಿಳಿಸಿದ್ದಾರೆ. ಅಷ್ಟೇ ಅಲ್ಲದೆ, ಆ ಹಾಡಿನಲ್ಲಿ ಅವರು ಪೂರ್ಣ ಪ್ರಮಾಣದ ನೃತ್ಯದ ಹೆಜ್ಜೆಗಳನ್ನು ಹಾಕಿದ್ದು ತಮಗೆ ವಿಶೇಷ ಖುಷಿ ನೀಡಿತ್ತು ಎಂದೂ ಅವರು ನೆನಪಿಸಿಕೊಂಡಿದ್ದಾರೆ.

ಸದ್ಯ ರಮೇಶ್ ಅರವಿಂದ್ ಅವರು 'ಕೆಡಿ' ಚಿತ್ರದ ತಮ್ಮ ಪಾತ್ರಕ್ಕಾಗಿ ಮೆಚ್ಚುಗೆ ಪಡೆಯುತ್ತಿದ್ದು, 'ಯುವರ್ಸ್ ಸಿನ್ಸಿಯರ್ಲಿ ರಾಮ್' ಚಿತ್ರದ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ. ಇದರ ನಡುವೆಯೂ ಪುಸ್ತಕ ಓದುವ ಹವ್ಯಾಸವನ್ನು ಮುಂದುವರಿಸಿರುವ ಅವರು, ಓದು ತಮ್ಮ ಆಲೋಚನೆಗಳಿಗೆ ಮತ್ತು ಭಾಷಣಗಳಿಗೆ ಹೊಸ ರೂಪ ನೀಡುತ್ತದೆ ಎಂದು ಹೇಳಿದ್ದಾರೆ.