‘ರಣಬಾಲಿ’ ಮೊದಲ ಹಾಡು ರಿಲೀಸ್- ವಿಜಯ್-ರಶ್ಮಿಕಾ ಜೋಡಿಯ ಮೋಡಿಗೆ ಫ್ಯಾನ್ಸ್‌ ಫಿದಾ

‘ರಣಬಾಲಿ’ ಚಿತ್ರದ ಮೊದಲ ಹಾಡು ‘ಎಂಧಯ್ಯ ಸಾಮಿ’ ಬಿಡುಗಡೆಯಾಗಿದ್ದು, ವಿಜಯ್ ದೇವರಕೊಂಡ ಮತ್ತು ರಶ್ಮಿಕಾ ಮಂದಣ್ಣ ಅವರ ನಡುವಿನ ಮಧುರ ಪ್ರೇಮಕಥೆಯನ್ನು ಪರಿಚಯಿಸಿದೆ. ಐತಿಹಾಸಿಕ ಹಿನ್ನೆಲೆಯ ಆ್ಯಕ್ಷನ್ ಡ್ರಾಮಾ ಆಗಿರುವ ಈ ಸಿನಿಮಾದಲ್ಲಿ ವಿಜಯ್ ದೇವರಕೊಂಡ ಅವರು ಯೋಧ ರಣಬಾಲಿ ಪಾತ್ರದಲ್ಲಿ ಕಾಣಿಸಿಕೊಂಡರೆ, ರಶ್ಮಿಕಾ ಮಂದಣ್ಣ ಅವರು ಅವರ ಪತ್ನಿ ಜಯಮ್ಮನ ಪಾತ್ರದಲ್ಲಿ ನಟಿಸಿದ್ದಾರೆ.

ಅಜಯ್-ಅತುಲ್ ಸಂಗೀತ ಸಂಯೋಜಿಸಿರುವ ‘ಎಂಧಯ್ಯ ಸಾಮಿ’ ಹಾಡಿಗೆ ಅಜಯ್ ಗೊಗವಲೆ ಮತ್ತು ಶ್ವೇತಾ ಮೋಹನ್ ಧ್ವನಿ ನೀಡಿದ್ದಾರೆ. ಹಾಡಿನಲ್ಲಿ ರಣಬಾಲಿ ಹಾಗೂ ಜಯಮ್ಮ ನಡುವಿನ ಆತ್ಮೀಯತೆ, ಪ್ರೀತಿ ಮತ್ತು ಭಾವನಾತ್ಮಕ ಬಾಂಧವ್ಯವನ್ನು ಸೊಗಸಾಗಿ ಕಟ್ಟಿಕೊಡಲಾಗಿದೆ.

ಜಯಮ್ಮ-ರಣಬಾಲಿಯ ಶಾಶ್ವತ ಪ್ರೀತಿಗೆ ವಿಜಯ್ ಮೆಚ್ಚುಗೆ

ಹಾಡಿನ ಕುರಿತು ವಿಜಯ್ ದೇವರಕೊಂಡ ಅವರು ರಣಬಾಲಿ ಮತ್ತು ಜಯಮ್ಮನ ‘ಶಾಶ್ವತ ಪ್ರೀತಿ’ಯನ್ನು ಈ ಹಾಡು ಪ್ರತಿಬಿಂಬಿಸುತ್ತದೆ ಎಂದು ಹೇಳಿದ್ದಾರೆ. ಹಾಡಿನ ಭಾವನೆಗಳು ಪ್ರೇಕ್ಷಕರ ಮನದಲ್ಲಿ ದೀರ್ಘಕಾಲ ಉಳಿಯಲಿವೆ ಎಂಬ ವಿಶ್ವಾಸವನ್ನೂ ಅವರು ವ್ಯಕ್ತಪಡಿಸಿದ್ದಾರೆ.

ಹಾಡಿನಲ್ಲಿ ವಿಜಯ್ ದೇವರಕೊಂಡ ಮತ್ತು ರಶ್ಮಿಕಾ ಮಂದಣ್ಣ ಅವರ ಜೋಡಿಯ ಕೆಮಿಸ್ಟ್ರಿ ಹಾಗೂ ಭಾವನಾತ್ಮಕ ಅಭಿನಯಕ್ಕೆ ಅಭಿಮಾನಿಗಳಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಐತಿಹಾಸಿಕ ಪ್ರೇಮಕಥೆ ಮತ್ತು ಆ್ಯಕ್ಷನ್‌ ಅನ್ನು ಒಳಗೊಂಡಿರುವ ‘ರಣಬಾಲಿ’ ಚಿತ್ರವು ಅಕ್ಟೋಬರ್ 16ರಂದು ಬಿಡುಗಡೆಯಾಗಲಿದೆ.