ಯಶ್ ರಾವಣನಾಗಿ ಅಬ್ಬರಿಸಿದ್ದು, ವಿಎಫ್ಎಕ್ಸ್ ವೈಭವ ಗಮನಸೆಳೆದಿದೆ.
ಬಹುನಿರೀಕ್ಷಿತ ರಾಮಾಯಣ ಟ್ರೇಲರ್ ರಿಲೀಸ್: ರಾವಣನಾಗಿ ಯಶ್ ಅಬ್ಬರಕ್ಕೆ ಫ್ಯಾನ್ಸ್ ಫಿದಾ
ನಿತೇಶ್ ತಿವಾರಿ ನಿರ್ದೇಶನದ 'ರಾಮಾಯಣ' ಟ್ರೇಲರ್ ಬಿಡುಗಡೆಯಾಗಿದೆ. ರಣಬೀರ್ ರಾಮನಾಗಿ, ಯಶ್ ರಾವಣನಾಗಿ ಮಿಂಚಿದ್ದು, ಭವ್ಯ ವಿಎಫ್ಎಕ್ಸ್ ಹಾಗೂ ಸಂಗೀತ ಗಮನ ಸೆಳೆದಿದೆ.
ನಿತೇಶ್ ತಿವಾರಿ ನಿರ್ದೇಶನದ ಬಹುನಿರೀಕ್ಷಿತ 'ರಾಮಾಯಣ' ಚಿತ್ರದ ಮೊದಲ ಟ್ರೇಲರ್ ಬಿಡುಗಡೆಯಾಗಿದೆ. ಹಲವು ತಿಂಗಳ ನಿರೀಕ್ಷೆ, ಲೀಕ್ ಆದ ದೃಶ್ಯಗಳು ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ನಡೆದ ಚರ್ಚೆಗಳ ಬಳಿಕ ಇಂದು ಬ್ರಾಹ್ಮಿ ಮುಹೂರ್ತದಲ್ಲಿ ಟ್ರೇಲರ್ ಅನಾವರಣಗೊಂಡಿದೆ. ಬೆಳಗ್ಗೆ 4.15ಕ್ಕೆ ಚಿತ್ರದ ಅಧಿಕೃತ ಯೂಟ್ಯೂಬ್ ಚಾನೆಲ್ನಲ್ಲಿ ಟ್ರೈಲರ್ ಬಿಡುಗಡೆಯಾಗಿದ್ದು, "The Ramayana Trailer. This is where the EPIC BEGINS" ಎಂಬ ಟ್ಯಾಗ್ಲೈನ್ನೊಂದಿಗೆ ಚಿತ್ರತಂಡ ಹಂಚಿಕೊಂಡಿದೆ.
ಧರ್ಮ ಮತ್ತು ಅಧರ್ಮದ ನಡುವಿನ ಮಹಾಸಂಗ್ರಾಮದ ಝಲಕ್
ಸುಮಾರು ನಾಲ್ಕು ನಿಮಿಷಗಳ ಈ ಟ್ರೇಲರ್, ಧರ್ಮ ಮತ್ತು ಅಧರ್ಮದ ನಡುವಿನ ಮಹಾಸಂಗ್ರಾಮವನ್ನು ಅದ್ಭುತ ದೃಶ್ಯ ವೈಭವದೊಂದಿಗೆ ಪರಿಚಯಿಸುತ್ತದೆ. ಭವ್ಯ ಸೆಟ್ಗಳು, ಅತ್ಯಾಧುನಿಕ ವಿಎಫ್ಎಕ್ಸ್, ಭಾವನಾತ್ಮಕ ಕ್ಷಣಗಳು ಹಾಗೂ ಅದ್ದೂರಿ ಹಿನ್ನೆಲೆ ಸಂಗೀತ ಟ್ರೈಲರ್ನ ಪ್ರಮುಖ ಆಕರ್ಷಣೆಯಾಗಿವೆ.
ರಾಮನಾಗಿ ರಣಬೀರ್, ಸೀತೆಯಾಗಿ ಸಾಯಿ ಪಲ್ಲವಿ
ಟ್ರೇಲರ್ ಆರಂಭದಲ್ಲೇ ನೆರಳಿನಿಂದ ಹೊರಬರುವ ರಾವಣನ ಭವ್ಯ ರೂಪ ಗಮನ ಸೆಳೆಯುತ್ತದೆ. ಬಳಿಕ ಅಯೋಧ್ಯೆಯ ಭವ್ಯ ದೃಶ್ಯಗಳ ನಡುವೆ ಕಥೆ ಮುಂದುವರಿಯುತ್ತದೆ. ಕೇಸರಿ ವಸ್ತ್ರದಲ್ಲಿ ಸರಳವಾಗಿ ಕಾಣಿಸಿಕೊಳ್ಳುವ ರಣಬೀರ್ ಕಪೂರ್, ನಂತರ ಯೋಧ ರಾಜಕುಮಾರ ರಾಮನಾಗಿ ಕಾಣಿಸಿಕೊಳ್ಳುತ್ತಾರೆ. ಸಾಯಿ ಪಲ್ಲವಿ ಸೀತೆಯಾಗಿ ರಾಮನೊಂದಿಗೆ ಭಾವನಾತ್ಮಕ ದೃಶ್ಯಗಳಲ್ಲಿ ಕಾಣಿಸಿಕೊಂಡಿದ್ದು, ಅರಣ್ಯವಾಸದ ದೃಶ್ಯಗಳೂ ಟ್ರೈಲರ್ನಲ್ಲಿ ಸ್ಥಾನ ಪಡೆದಿವೆ. ರವಿ ದುಬೆ ಲಕ್ಷ್ಮಣನಾಗಿ ರಾಮನೊಂದಿಗೆ ದೃಢವಾಗಿ ನಿಂತಿರುವುದು ಕಾಣಿಸುತ್ತದೆ.
ರಾವಣನಾಗಿ ಯಶ್ ಅಬ್ಬರ
ಟ್ರೇಲರ್ನ ದೊಡ್ಡ ಹೈಲೈಟ್ ಎಂದರೆ ಯಶ್ ಅವರ ರಾವಣನ ಪಾತ್ರ. ಚಿನ್ನದ ಭವ್ಯ ಕವಚ, ವೈಭವದ ಉಡುಪು, ಗಂಭೀರ ಮುಖಭಾವ ಮತ್ತು ಪ್ರಭಾವಿ ವ್ಯಕ್ತಿತ್ವದ ಮೂಲಕ ರಾವಣನನ್ನು ಅತ್ಯಂತ ಶಕ್ತಿಶಾಲಿ ಹಾಗೂ ಭಯಾನಕವಾಗಿ ಚಿತ್ರಿಸಲಾಗಿದೆ. ಟ್ರೇಲರ್ನಲ್ಲಿ ಯಶ್ ಅವರ ಎಂಟ್ರಿ ಮತ್ತು ಅವರ ಪರದೆ ಮೇಲಿನ ಪ್ರಭಾವವೇ ಹೆಚ್ಚು ಚರ್ಚೆಗೆ ಗ್ರಾಸವಾಗಿದೆ.
ಹಾನ್ಸ್ ಝಿಮ್ಮರ್ ಮತ್ತು ಎ.ಆರ್. ರೆಹಮಾನ್ ಸಂಗೀತದ ಮೋಡಿ
ಆಸ್ಕರ್ ಪ್ರಶಸ್ತಿ ವಿಜೇತರಾದ ಹಾನ್ಸ್ ಝಿಮ್ಮರ್ ಹಾಗೂ ಎ.ಆರ್. ರೆಹಮಾನ್ ಅವರ ಸಂಗೀತ ಟ್ರೇಲರ್ಗೆ ಮತ್ತಷ್ಟು ಜೀವ ತುಂಬಿದೆ. ಹಿನ್ನೆಲೆ ಸಂಗೀತವು ಭಾವನಾತ್ಮಕ ಮತ್ತು ಯುದ್ಧದ ದೃಶ್ಯಗಳಿಗೆ ಭವ್ಯತೆ ನೀಡಿದ್ದು, ಡಿಎನ್ಇಜಿ ಸಂಸ್ಥೆಯ ವಿಎಫ್ಎಕ್ಸ್ ಕೆಲಸವೂ ಚಿತ್ರದ ಮಟ್ಟವನ್ನು ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ದಿದೆ.
ಬೃಹತ್ ತಾರಾಗಣದ 'ರಾಮಾಯಣ'
ಚಿತ್ರದಲ್ಲಿ ರಣಬೀರ್ ಕಪೂರ್ ರಾಮನಾಗಿ, ಸಾಯಿ ಪಲ್ಲವಿ ಸೀತೆಯಾಗಿ, ಯಶ್ ರಾವಣನಾಗಿ, ಸನ್ನಿ ಡಿಯೋಲ್ ಹನುಮಂತನಾಗಿ ಹಾಗೂ ರವಿ ದುಬೆ ಲಕ್ಷ್ಮಣನಾಗಿ ನಟಿಸಿದ್ದಾರೆ. ಇದರ ಜೊತೆಗೆ ಲಾರಾ ದತ್ತಾ ಕೈಕೇಯಿಯಾಗಿ, ರಕುಲ್ ಪ್ರೀತ್ ಸಿಂಗ್ ಶೂರ್ಪಣಖೆಯಾಗಿ, ಕಾಜಲ್ ಅಗರ್ವಾಲ್ ಮಂದೋದರಿಯಾಗಿ, ಅರುಣ್ ಗೋವಿಲ್ ದಶರಥನಾಗಿ, ವಿವೇಕ್ ಒಬೆರಾಯ್ ವಿದ್ಯುಜ್ಜಿಹ್ವನಾಗಿ, ಕುನಾಲ್ ಕಪೂರ್ ಇಂದ್ರನಾಗಿ, ಆದಿನಾಥ್ ಕೊಠಾರೆ ಭರತನಾಗಿ ನಟಿಸಿದ್ದು, ಜಟಾಯು ಪಾತ್ರಕ್ಕೆ ಅನುಪಮ್ ಖೇರ್ ಧ್ವನಿ ನೀಡಿದ್ದಾರೆ.
ದೀಪಾವಳಿಗೆ ಬಿಡುಗಡೆ
ಸುಮಾರು 4,000 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗಿರುವ 'ರಾಮಾಯಣ' ಭಾರತೀಯ ಸಿನಿರಂಗದ ಅತಿ ದುಬಾರಿ ಹಾಗೂ ಮಹತ್ವಾಕಾಂಕ್ಷೆಯ ಚಿತ್ರಗಳಲ್ಲಿ ಒಂದಾಗಿದೆ. ಈ ದೀಪಾವಳಿಗೆ ಬಿಡುಗಡೆಯಾಗಲಿರುವ ಚಿತ್ರವು ಭಾರತೀಯ ಪೌರಾಣಿಕ ಚಿತ್ರಗಳ ನಿರೂಪಣೆಗೆ ಹೊಸ ಆಯಾಮ ನೀಡುವ ನಿರೀಕ್ಷೆಯಿದೆ.
