ಗದ್ದಿ ಹೈ ತೋ ಹಮ್ ಹೈ: ತೆರೆಗೆ ಬರಲಿದೆ 'ಮಿರ್ಜಾಪುರ' ಸಿನಿಮಾ

ಬಾಲಿವುಡ್‌ನ ಅತ್ಯಂತ ಜನಪ್ರಿಯ ಮತ್ತು ಬಹುನಿರೀಕ್ಷಿತ ಕ್ರೈಮ್ ಡ್ರಾಮಾ ಸರಣಿ 'ಮಿರ್ಜಾಪುರ' ಈಗ ದೊಡ್ಡ ಪದೆಗೆ ಅಪ್ಪಳಿಸಲು ಸಜ್ಜಾಗಿದೆ. 'ಮಿರ್ಜಾಪುರ: ದಿ ಮೂವಿ' ಚಿತ್ರದ ಹೊಸ ಕ್ಯಾರೆಕ್ಟರ್ ಪೋಸ್ಟರ್ ಇಂದು ಬಿಡುಗಡೆಯಾಗಿದ್ದು, ಚಿತ್ರದ ಅಧಿಕೃತ ಟೀಸರ್ ನಾಳೆ (ಜೂನ್ 25) ಮಧ್ಯಾಹ್ನ 12 ಗಂಟೆಗೆ ಅನಾವರಣಗೊಳ್ಳಲಿದೆ ಎಂದು ಚಿತ್ರತಂಡ ಘೋಷಿಸಿದೆ.

ನಿರ್ಮಾಪಕ ಫರ್ಹಾನ್ ಅಖ್ತರ್ ಮತ್ತು ಎಕ್ಸೆಲ್ ಮೂವೀಸ್ ತಮ್ಮ ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಷಯವನ್ನು ಖಚಿತಪಡಿಸಿದ್ದು, "ಯಾರು ಬಂದಿದ್ದಾರೋ ಅವರು ಹೋಗಲೇಬೇಕು, ಆದರೆ ಅದು ಕಾಲೀನ್ ಭಯ್ಯಾ ಅವರ ಇಷ್ಟದಂತೆ ಮಾತ್ರ ನಡೆಯುತ್ತದೆ. ದೊಡ್ಡ ಪದೆಗೆ ನಿಮಗೆ ಸ್ವಾಗತ" ಎಂದು ಬರೆದುಕೊಂಡಿದ್ದಾರೆ.

ಬುಧವಾರ ಬಿಡುಗಡೆಯಾಗಿರುವ ಹೊಸ ಪೋಸ್ಟರ್‌ನಲ್ಲಿ ಪಂಕಜ್ ತ್ರಿಪಾಠಿ ಅವರು ತಮ್ಮ ಐಕಾನಿಕ್ ಪಾತ್ರವಾದ 'ಕಾಲೀನ್ ಭಯ್ಯಾ' ಆಗಿ ಅಬ್ಬರಿಸಿದ್ದಾರೆ. ಬೆಂಕಿ ಉರಿಯುತ್ತಿರುವ ಹಿನ್ನೆಲೆಯಲ್ಲಿ ಅವರ ಕ್ರೂರವಾದ ಲುಕ್ ಸಿನಿಮಾದ ಮೇಲಿನ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದೆ. ಮತ್ತೊಂದು ಪೋಸ್ಟರ್‌ನಲ್ಲಿ ಬಂದೂಕುಗಳು ಮತ್ತು ಶಸ್ತ್ರಾಸ್ತ್ರಗಳ ನಡುವೆ ಇಡಲಾದ ಭವ್ಯವಾದ ಖಾಲಿ ರಾಜಸಿಂಹಾಸನದ ಚಿತ್ರವಿದ್ದು, ಅದರಲ್ಲಿ "ಗದ್ದಿ ಹೈ ತೋ ಹಮ್ ಹೈ" (ಸಿಂಹಾಸನವಿದ್ದರೆ ನಾವಿದ್ದೇವೆ) ಎಂಬ ಅಡಿಬರಹವಿದೆ. ಇದು ಮಿರ್ಜಾಪುರ ಸಾಮ್ರಾಜ್ಯದ ಅಧಿಕಾರದ ರಣಕಳಕಳಿಯನ್ನು ಸೂಕ್ಷ್ಮವಾಗಿ ಬಿಂಬಿಸುತ್ತದೆ.

ಈಗಾಗಲೇ 2026ರ ಫೆಬ್ರವರಿಯಲ್ಲಿ ಚಿತ್ರದ ಚಿತ್ರೀಕರಣ ಯಶಸ್ವಿಯಾಗಿ ಪೂರ್ಣಗೊಂಡಿದ್ದು, ಮುಖ್ಯ ಭೂಮಿಕೆಯಲ್ಲಿರುವ ಶ್ವೇತಾ ತ್ರಿಪಾಠಿ ಮತ್ತು ಅಲಿ ಫಜಲ್ ಇದನ್ನು ಖಚಿತಪಡಿಸಿದ್ದರು. ವಿಶೇಷವೆಂದರೆ, ಸರಣಿಯ ಎರಡನೇ ಸೀಸನ್‌ನಲ್ಲಿ ಸಾವನ್ನಪ್ಪಿದ್ದಂತೆ ತೋರಿಸಲಾಗಿದ್ದ ಮುನ್ನಾ ಭಯ್ಯಾ ಪಾತ್ರದಲ್ಲಿ ದಿವ್ಯೇಂದು ಮತ್ತೆ ಮರಳುತ್ತಿರುವುದು ಅಭಿಮಾನಿಗಳಿಗೆ ದೊಡ್ಡ ಸರ್ಪ್ರೈಸ್ ನೀಡಿದೆ. ಅವರೊಂದಿಗೆ ಗುಡ್ಡು ಪಂಡಿತ್ ಆಗಿ ಅಲಿ ಫಜಲ್, ಗೋಲು ಗುಪ್ತಾ ಆಗಿ ಶ್ವೇತಾ ತ್ರಿಪಾಠಿ ಮತ್ತು ಕಾಂಪೌಂಡರ್ ಪಾತ್ರದಲ್ಲಿ ಅಭಿಷೇಕ್ ಬ್ಯಾನರ್ಜಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಒರಿಜಿನಲ್ ಸರಣಿಯ ಪ್ರಮುಖ ಸಂಚಿಕೆಗಳನ್ನು ನಿರ್ದೇಶಿಸಿದ್ದ ಗುರುಮೀತ್ ಸಿಂಗ್ ಅವರೇ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದು, ಎಕ್ಸೆಲ್ ಎಂಟರ್‌ಟೈನ್‌ಮೆಂಟ್ ಬ್ಯಾನರ್ ಅಡಿಯಲ್ಲಿ ಫರ್ಹಾನ್ ಅಖ್ತರ್ ಮತ್ತು ರಿತೇಶ್ ಸಿಧ್ವಾನಿ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಈ ಬಿಗ್ ಸ್ಕ್ರೀನ್ ಸಿನಿಮಾ ಮುಂಬರುವ ಸೆಪ್ಟೆಂಬರ್ 4, 2026 ರಂದು ಚಿತ್ರಮಂದಿರಗಳಲ್ಲಿ ವಿಶ್ವಾದ್ಯಂತ ಬಿಡುಗಡೆಯಾಗಲಿದೆ.