‘ಜೈಲರ್ 2’ನ ‘ಅಲ ಬೊಲೋಲೊ’ ಹಾಡು ರಿಲೀಸ್

ಸೂಪರ್‌ಸ್ಟಾರ್ ರಜನಿಕಾಂತ್ ಅಭಿನಯದ ಬಹುನಿರೀಕ್ಷಿತ ‘ಜೈಲರ್ 2’ ಸಿನಿಮಾದ ಮೊದಲ ಹಾಡು ‘ಅಲ ಬೊಲೋಲೊ’ ಬಿಡುಗಡೆಯಾಗಿದೆ. ನೆಲ್ಸನ್ ದಿಲೀಪ್‌ಕುಮಾರ್ ನಿರ್ದೇಶನದ ಈ ಸಿನಿಮಾದ ಹಾಡು ಓಣಂ ಹಬ್ಬದ ಸಂಭ್ರಮಕ್ಕೆ ತಕ್ಕಂತಹ ಕೇರಳದ ಸೊಗಡಿನೊಂದಿಗೆ ಮೂಡಿಬಂದಿದೆ.

ಅನಿರುದ್ಧ್ ರವಿಚಂದರ್ ಸಂಗೀತ ಸಂಯೋಜಿಸಿ ಹಾಡಿರುವ ‘ಅಲ ಬೊಲೋಲೊ’ ಹಾಡಿಗೆ ಅರುಣರಾಜಾ ಕಾಮರಾಜ್ ಸಾಹಿತ್ಯ ಬರೆದಿದ್ದಾರೆ. ಸುಮಾರು ನಾಲ್ಕು ನಿಮಿಷಗಳ ಲಿರಿಕಲ್ ವಿಡಿಯೋದಲ್ಲಿ ನಟಿ ಶಮ್ನಾ ಕಾಸಿಂ ಸಾಂಪ್ರದಾಯಿಕ ಕಸವು ಸೀರೆಯಲ್ಲಿ ನೃತ್ಯ ಮಾಡಿದ್ದು ಗಮನ ಸೆಳೆದಿದೆ. ಹಾಡಿನ ಕೊನೆಯ ಭಾಗದಲ್ಲಿ ರಜನಿಕಾಂತ್ ಕೂಡ ಕಾಣಿಸಿಕೊಂಡು ಶಮ್ನಾ ಅವರ ನೃತ್ಯವನ್ನು ಮೆಚ್ಚುತ್ತಾರೆ.

‘ಕಾವಾಲಾ’ ರೀತಿಯ ಕ್ರೇಜ್ ಸೃಷ್ಟಿಸುತ್ತಾ?

2023ರಲ್ಲಿ ಬಿಡುಗಡೆಯಾದ ‘ಜೈಲರ್’ ಚಿತ್ರದ ‘ಕಾವಾಲಾ’ ಹಾಡು ರಜನಿಕಾಂತ್ ಮತ್ತು ತಮನ್ನಾ ಭಾಟಿಯಾ ಅವರ ನೃತ್ಯದಿಂದ ದೇಶಾದ್ಯಂತ ಭಾರೀ ಕ್ರೇಜ್ ಸೃಷ್ಟಿಸಿತ್ತು. ಸಾಮಾಜಿಕ ಜಾಲತಾಣಗಳಲ್ಲಿ ಹಾಡಿನ ಹುಕ್ ಸ್ಟೆಪ್ ವೈರಲ್ ಆಗಿದ್ದಲ್ಲದೆ, ಮ್ಯೂಸಿಕ್ ಚಾರ್ಟ್‌ಗಳಲ್ಲೂ ದೊಡ್ಡ ಮಟ್ಟದ ಸದ್ದು ಮಾಡಿತ್ತು. ಇದೀಗ ‘ಅಲ ಬೊಲೋಲೊ’ ಕೂಡ ಅದೇ ರೀತಿಯ ಸಂಚಲನ ಸೃಷ್ಟಿಸಲಿದೆಯೇ ಎಂಬ ಕುತೂಹಲ ಮೂಡಿದೆ.

ಓಣಂ ಸೀಸನ್‌ಗೆ ತಕ್ಕ ಹಾಡು

‘ಕಾವಾಲಾ’ಗೆ ಹೋಲಿಸಿದರೆ ‘ಅಲ ಬೊಲೋಲೊ’ ವಿಭಿನ್ನ ಶೈಲಿಯಲ್ಲಿ ಮೂಡಿಬಂದಿದೆ. ಗ್ಲಾಮರ್‌ಗಿಂತ ಕೇರಳದ ಸಾಂಪ್ರದಾಯಿಕ ಹಿನ್ನೆಲೆ ಮತ್ತು ಹಬ್ಬದ ವಾತಾವರಣಕ್ಕೆ ಹಾಡು ಹೆಚ್ಚಿನ ಒತ್ತು ನೀಡಿದೆ. ಹಾಡಿನ ಮಲಯಾಳಂ ಭಾಗಗಳು ಹಾಗೂ ಶಮ್ನಾ ಕಾಸಿಂ ಅವರ ನೃತ್ಯ ಈಗಾಗಲೇ ಅಭಿಮಾನಿಗಳ ಗಮನ ಸೆಳೆಯುತ್ತಿವೆ.

ದೊಡ್ಡ ತಾರಾಗಣ ಹೊಂದಿರುವ ‘ಜೈಲರ್ 2’

ರಜನಿಕಾಂತ್ ಜೊತೆ ರಮ್ಯಾ ಕೃಷ್ಣನ್, ಯೋಗಿ ಬಾಬು, ಮಿರ್ನಾ ಮತ್ತು ರಿತ್ವಿಕ್ ಸೇರಿದಂತೆ ಮೊದಲ ಭಾಗದ ಹಲವು ಕಲಾವಿದರು ಮುಂದುವರಿದಿದ್ದಾರೆ. ಮೋಹನ್‌ಲಾಲ್, ಶಿವರಾಜ್‌ಕುಮಾರ್ ಮತ್ತು ಜಾಕಿ ಶ್ರಾಫ್ ಕೂಡ ಕಾಣಿಸಿಕೊಳ್ಳುವ ನಿರೀಕ್ಷೆಯಿದೆ. ಎಸ್‌ಜೆ ಸೂರ್ಯ, ಮಿಥುನ್ ಚಕ್ರವರ್ತಿ, ವಿದ್ಯಾ ಬಾಲನ್, ಸುರಜ್ ವೆಂಜಾರಮೂಡು, ಅನ್ನಾ ರಾಜನ್ ಮತ್ತು ಜತಿನ್ ಸರ್ನಾ ಹೊಸ ಸೇರ್ಪಡೆಗಳಾಗಿದ್ದಾರೆ. ಹೃತಿಕ್ ರೋಷನ್ ಹಾಗೂ ವಿಜಯ್ ಸೇತುಪತಿ ಕೂಡ ಅತಿಥಿ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಅಕ್ಟೋಬರ್ 15ಕ್ಕೆ ಸಿನಿಮಾ ಬಿಡುಗಡೆ

ಸನ್ ಪಿಕ್ಚರ್ಸ್ ಬ್ಯಾನರ್‌ನಲ್ಲಿ ಕಲಾನಿಧಿ ಮಾರನ್ ನಿರ್ಮಿಸಿರುವ ‘ಜೈಲರ್ 2’ ಸಿನಿಮಾ ಅಕ್ಟೋಬರ್ 15ರಂದು ವಿಶ್ವಾದ್ಯಂತ ಬಿಡುಗಡೆಯಾಗಲು ಸಜ್ಜಾಗಿದೆ. ಮೊದಲ ಭಾಗದ ಯಶಸ್ಸಿನ ಬಳಿಕ ಸೀಕ್ವೆಲ್ ಮೇಲೂ ಭಾರೀ ನಿರೀಕ್ಷೆ ಇದ್ದು, ‘ಅಲ ಬೊಲೋಲೊ’ ಹಾಡು ಚಿತ್ರದ ಮೇಲಿನ ಕ್ರೇಜ್ ಮತ್ತಷ್ಟು ಹೆಚ್ಚಿಸಲಿದೆಯೇ ಎಂಬುದು ಮುಂದಿನ ದಿನಗಳಲ್ಲಿ ಸ್ಪಷ್ಟವಾಗಲಿದೆ.