ರೋರಿಂಗ್ ಸ್ಟಾರ್ ಶ್ರೀಮುರಳಿ ನಟನೆಯ 'ಪರಾಕ್' ಚಿತ್ರದ ಗ್ಲಿಂಪ್ಸ್ ಬಿಡುಗಡೆಯಾಗಿದೆ.
ಶ್ರೀಮುರಳಿ ವಿಂಟೇಜ್ ಅವತಾರ: 'ಪರಾಕ್' ಟೀಸರ್ ವೈರಲ್
ರೋರಿಂಗ್ ಸ್ಟಾರ್ ಶ್ರೀಮುರಳಿ ನಟನೆಯ 'ಪರಾಕ್' ಚಿತ್ರದ ಗ್ಲಿಂಪ್ಸ್ ಬಿಡುಗಡೆಯಾಗಿದ್ದು, ಉದ್ದನೆಯ ಸುರುಳಿ ಕೂದಲು ಹಾಗೂ ಮೈತುಂಬಾ ಗಾಯದ ಕಲೆಗಳಿರುವ ಅವರ ರಗಡ್ ಆಕ್ಷನ್ ಲುಕ್ ಸೆನ್ಸೇಷನ್ ಸೃಷ್ಟಿಸಿದೆ.
ಕಳೆದ ಕೆಲವು ತಿಂಗಳುಗಳಿಂದ ಶ್ರೀಮುರಳಿ ಅವರು ಉದ್ದನೆಯ ಸುರುಳಿ ಕೂದಲಿನ ವಿಭಿನ್ನ ಶೈಲಿಯಲ್ಲಿ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುತ್ತಿದ್ದರು. ಇದು ಅವರ ಮತ್ತೊಂದು ಚಿತ್ರ 'ಉಗ್ರಾಯುಧಂ' ಸಿನಿಮಾದ ಲುಕ್ ಇರಬಹುದು ಎಂದು ಅಭಿಮಾನಿಗಳು ಅಂದಾಜಿಸಿದ್ದರು. ಆದರೆ, ಈ ವಿಶಿಷ್ಟ ಮೇಕ್ ಓವರ್ 'ಪರಾಕ್' ಚಿತ್ರದ್ದೇ ಎಂಬ ರಹಸ್ಯ ಈಗ ಅಧಿಕೃತವಾಗಿ ಹೊರಬಿದ್ದಿದೆ. ಈ ಲುಕ್ ಪಾತ್ರದ ಗಾಂಭೀರ್ಯತೆಯನ್ನು ಮತ್ತಷ್ಟು ಹೆಚ್ಚಿಸಿದೆ.
ನಿರ್ದೇಶಕ ಹಾಲೇಶ್ ಕೊಗುಂಡಿ ಅವರು ಶ್ರೀಮುರಳಿ ಅವರಿಗಾಗಿ ಒಂದು ಅದ್ಭುತವಾದ ಮಾಸ್ ಹಾಗೂ ಎಮೋಷನಲ್ ಪಾತ್ರವನ್ನು ಸೃಷ್ಟಿಸಿದ್ದಾರೆ. ರಕ್ತಸಿಕ್ತ ಲೋಕದಲ್ಲಿ ಬದುಕುವ ನಾಯಕನ ದಿನಚರಿ ಹೇಗಿರುತ್ತದೆ ಎಂಬುದನ್ನು ಟೀಸರ್ನಲ್ಲಿ ಅತ್ಯಂತ ಪರಿಣಾಮಕಾರಿಯಾಗಿ ತೋರಿಸಲಾಗಿದೆ. ಹರಿತವಾದ ಆಯುಧಗಳ ಝಳಪಿಸುವಿಕೆ ಹಾಗೂ ಹಿಂಸಾತ್ಮಕ ಜಗತ್ತಿನ ನಡುವೆಯೂ ಈ ಪಾತ್ರಕ್ಕೊಂದು ವಿಭಿನ್ನ ಆಯಾಮವಿದೆ ಎಂಬ ಸೂಚನೆ ಸಿಕ್ಕಿದೆ.
ಆ್ಯಕ್ಷನ್ ಅಬ್ಬರದ ನಡುವೆ ಮೆಲೋಡಿ ನೀಡುವ 'ಟೇಪ್ ರೆಕಾರ್ಡರ್'
ಈ ಚಿತ್ರದ ಟೀಸರ್ನಲ್ಲಿ ಗಮನ ಸೆಳೆಯುವ ಮತ್ತೊಂದು ಮುಖ್ಯ ಅಂಶವೆಂದರೆ ಅದು ಹಳೆಯ 'ಟೇಪ್ ರೆಕಾರ್ಡರ್'. ರಗಡ್ ಲುಕ್ನ ನಾಯಕ ಇಲ್ಲಿ ಸಂಗೀತ ಪ್ರೇಮಿಯಾಗಿಯೂ ಕಾಣಿಸಿಕೊಂಡಿದ್ದಾನೆ. ಹಿಂಸಾತ್ಮಕ ಆಕ್ಷನ್ ದೃಶ್ಯಗಳ ಹಿನ್ನೆಲೆಯಲ್ಲಿ "ಏತಕೆ ಈ ಬಿಗುಮಾನ..." ಎಂಬ ಅತ್ಯಂತ ಮಧುರವಾದ ಹಳೆಯ ಶೈಲಿಯ ಹಾಡು ಪ್ಲೇ ಆಗುತ್ತದೆ. ಈ ವಿಭಿನ್ನ ಪ್ರಯೋಗವು ಇಡೀ ಆಕ್ಷನ್ ಸೀಕ್ವೆನ್ಸ್ಗೆ ಒಂದು ರೀತಿಯ ಶಾಂತ ಹಾಗೂ ವಿಶಿಷ್ಟ ಅನುಭೂತಿಯನ್ನು ನೀಡುತ್ತದೆ.
ಚರಣ್ ರಾಜ್ ಸಂಗೀತದ ಮ್ಯಾಜಿಕ್
'ಸಪ್ತ ಸಾಗರದಾಚೆ ಎಲ್ಲೋ' ಚಿತ್ರದ ಮೂಲಕ ಸಂಗೀತದ ಅಲೆ ಎಬ್ಬಿಸಿದ್ದ ಪ್ರತಿಭಾವಂತ ಸಂಗೀತ ನಿರ್ದೇಶಕ ಚರಣ್ ರಾಜ್ ಈ ಚಿತ್ರಕ್ಕೂ ಟ್ಯೂನ್ ಹಾಕಿದ್ದಾರೆ. ಟೀಸರ್ನಲ್ಲಿ ಬರುವ ಟೇಪ್ ರೆಕಾರ್ಡರ್ ಮತ್ತು ಹಿನ್ನೆಲೆ ಸಂಗೀತ ಅವರ ವಿಶಿಷ್ಟ ಶೈಲಿಯನ್ನು ನೆನಪಿಸುತ್ತದೆ.
ಶ್ರೀಮುರಳಿ ಅವರ ಈ ಹೊಸ ಹೇರ್ಸ್ಟೈಲ್ ಕಿಚ್ಚ ಸುದೀಪ್ ಅವರ 'ಮ್ಯಾಕ್ಸ್' ಚಿತ್ರದ ಲುಕ್ ಅನ್ನು ನೆನಪಿಸುವಂತಿದ್ದರೂ, 'ಪರಾಕ್' ಸಿನಿಮಾದ ಕಥೆ ಮತ್ತು ಪ್ರೆಸೆಂಟೇಷನ್ ಸಂಪೂರ್ಣ ಹೊಸತನದಿಂದ ಕೂಡಿದೆ. ಸದ್ಯಕ್ಕೆ ಈ ಟೀಸರ್ ಸ್ಯಾಂಡಲ್ವುಡ್ನಲ್ಲಿ ದೊಡ್ಡ ಮಟ್ಟದ ನಿರೀಕ್ಷೆಯನ್ನು ಹುಟ್ಟುಹಾಕಿದೆ.
