ರಾಖ್ ಸರಣಿಯ ಪಾತ್ರ ಮನೆವರೆಗೂ ಬೆನ್ನಟ್ಟಿ ಭಯ ಹುಟ್ಟಿಸಿತ್ತು: ಸೋನಾಲಿ ಬೇಂದ್ರೆ

ಪ್ರೈಮ್ ವಿಡಿಯೋದಲ್ಲಿ ಇತ್ತೀಚೆಗೆ ಬಿಡುಗಡೆಯಾಗಿರುವ ಕ್ರೈಮ್ ಥ್ರಿಲ್ಲರ್ ವೆಬ್ ಸರಣಿ 'ರಾಖ್'ನಲ್ಲಿನ ತಮ್ಮ ಮೌನ ಮತ್ತು ಸಂಭಾಷಣೆ ರಹಿತ ನಟನೆಯು ತಮಗೆ ಎದುರಿಸಿದ ಭಾವನಾತ್ಮಕ ಸವಾಲುಗಳ ಬಗ್ಗೆ ಬಾಲಿವುಡ್ ನಟಿ ಸೋನಾಲಿ ಬೇಂದ್ರೆ ಮುಕ್ತವಾಗಿ ಮಾತನಾಡಿದ್ದಾರೆ.

ಈ ಸರಣಿಯಲ್ಲಿ ಅವರು 'ಮೋನಾ' ಎಂಬ ಪಾತ್ರವನ್ನು ನಿರ್ವಹಿಸಿದ್ದು, ಯಾವುದೇ ದೊಡ್ಡ ಸಂಭಾಷಣೆಗಳಿಲ್ಲದೆ ಕೇವಲ ಹಾವಭಾವ ಹಾಗೂ ಮೌನದ ಮೂಲಕವೇ ಪಾತ್ರದ ತೀವ್ರತೆಯನ್ನು ಪ್ರೇಕ್ಷಕರಿಗೆ ತಲುಪಿಸಬೇಕಾದ ಪರಿಸ್ಥಿತಿ ಇತ್ತು. ಇಂತಹ ಗಂಭೀರ ಪಾತ್ರದಲ್ಲಿ ಸಂಪೂರ್ಣವಾಗಿ ಲೀನವಾಗುವುದು ಮತ್ತು ಶೂಟಿಂಗ್ ಮುಗಿದ ನಂತರ ಆ ಪಾತ್ರದಿಂದ ಹೊರಬರುವುದು ತಮಗೆ ತೀವ್ರ ಮಾನಸಿಕ ಒತ್ತಡ ಹಾಗೂ ಭಯವನ್ನು ಉಂಟುಮಾಡಿತ್ತು ಎಂದು ಅವರು ಹೇಳಿಕೊಂಡಿದ್ದಾರೆ.

ಸುದ್ದಿ ಸಂಸ್ಥೆ ಐಎಎನ್‌ಎಸ್ ಜೊತೆ ಮಾತನಾಡಿದ ಸೋನಾಲಿ, ಈ ವೆಬ್ ಸರಣಿಯ ಅತ್ಯುತ್ತಮ ಬರವಣಿಗೆ ಮತ್ತು ಚಿತ್ರತಂಡ ನೀಡಿದ ಪೂರ್ವಸಿದ್ಧತೆಯು ತಮಗೆ ಅಭಿನಯಿಸಲು ದೊಡ್ಡ ಬಲ ನೀಡಿತು ಎಂದು ಶ್ಲಾಘಿಸಿದ್ದಾರೆ.

ಸುದೀರ್ಘವಾದ ಸಂಭಾಷಣೆಗಳನ್ನು ನೆನಪಿಟ್ಟುಕೊಂಡು ಮಾತನಾಡುವುದಕ್ಕಿಂತ, ಮೌನದ ಮೂಲಕವೇ ಪಾತ್ರದ ದುಃಖ ಮತ್ತು ಭಾವನೆಗಳನ್ನು ಅಭಿವ್ಯಕ್ತಪಡಿಸುವುದು ತಮಗೆ ಸುಲಭವಾಯಿತು ಎಂದಿದ್ದಾರೆ. ಆದರೆ ನಿಜವಾದ ಸವಾಲು ಎದುರಾಗಿದ್ದು ಶೂಟಿಂಗ್ ಮುಗಿದ ನಂತರ. ಚಿತ್ರೀಕರಣದ ಸಮಯದಲ್ಲಿ ಕ್ಯಾಮೆರಾ ಆಫ್ ಆದ ಮೇಲೂ ಮೋನಾ ಪಾತ್ರದ ಆ ಆಳವಾದ ನೋವು ಮತ್ತು ತೀವ್ರತೆಯು ತಮ್ಮನ್ನು ಕಾಡುತ್ತಿತ್ತು. ಈ ಪಾತ್ರವನ್ನು ಸೆಟ್‌ನಲ್ಲೇ ಬಿಟ್ಟು ಬರಲು ತಾವು ಸಾಕಷ್ಟು ಕಷ್ಟಪಟ್ಟಿದ್ದಾಗಿ ಹಾಗೂ ಹಲವು ಬಾರಿ ಆ ಭಾವನೆಗಳು ತಮ್ಮ ಮನೆವರೆಗೂ ಬೆನ್ನಟ್ಟಿ ಬರುತ್ತಿದ್ದವು ಎಂದು ಸೋನಾಲಿ ಬೇಂದ್ರೆ ವಿವರಿಸಿದ್ದಾರೆ. ದಿನದ ಕೊನೆಯಲ್ಲಿ ಪಾತ್ರದಿಂದ ಹೊರಬರಲು ಸಾಧ್ಯವಾಗದ ಆ ಕ್ಷಣಗಳು ತಮಗೆ ನಿಜಕ್ಕೂ ಭಯ ಹುಟ್ಟಿಸಿದ್ದವು ಎಂದು ಅವರು ನೆನಪಿಸಿಕೊಂಡಿದ್ದಾರೆ.

ಪ್ರೊಸಿತ್ ರಾಯ್ ನಿರ್ದೇಶನದ 'ರಾಖ್' ವೆಬ್ ಸರಣಿಯು 1970ರ ದಶಕದ ಕೊನೆಯಲ್ಲಿ ದೆಹಲಿಯಲ್ಲಿ ನಡೆದಿದ್ದ ರಂಗಾ-ಬಿಲ್ಲಾ ಎಂಬ ಸುಪ್ರಸಿದ್ಧ ಅಪಹರಣ ಮತ್ತು ಕೊಲೆ ಪ್ರಕರಣದಿಂದ ಪ್ರೇರಿತಗೊಂಡು ಸಿದ್ಧವಾಗಿರುವ ಕಾಲ್ಪನಿಕ ತನಿಖಾ ಥ್ರಿಲ್ಲರ್ ಆಗಿದೆ. ಅಪರಾಧ ಮತ್ತು ನ್ಯಾಯದ ನಡುವಿನ ಸಂಘರ್ಷವನ್ನು ಅನಾವರಣಗೊಳಿಸುವ ಈ ಸರಣಿಯಲ್ಲಿ ಸೋನಾಲಿ ಬೇಂದ್ರೆ ಅವರೊಂದಿಗೆ ಅಲಿ ಫಜಲ್, ಅಮೀರ್ ಬಶೀರ್, ಆಕಾಶ್ ಮಖಿಜಾ ಮತ್ತು ರಮಣ್‌ದೀಪ್ ಯಾದವ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದು, ಪ್ರಸ್ತುತ ಪ್ರೈಮ್ ವಿಡಿಯೋದಲ್ಲಿ ಸ್ಟ್ರೀಮಿಂಗ್ ಆಗುತ್ತಿದೆ.