ವಯಸ್ಸು, ಶಿಸ್ತು ಹಾಗೂ ಡಿಜಿಟಲ್ ಯುಗದ ಪೋಷಣೆಯ ಬಗ್ಗೆ ಶಿಲ್ಪಾ ಶೆಟ್ಟಿ ಮಾತು

ಬಾಲಿವುಡ್‌ನ ಹಿರಿಯ ನಟಿ ಹಾಗೂ ಉದ್ಯಮಿ ಶಿಲ್ಪಾ ಶೆಟ್ಟಿ ಕುಂದ್ರಾ ಅವರು ಇತ್ತೀಚಿನ ಸಂದರ್ಶನವೊಂದರಲ್ಲಿ ವಯಸ್ಸು, ಜೀವನದ ಶಿಸ್ತು ಮತ್ತು ಡಿಜಿಟಲ್ ಯುಗದಲ್ಲಿ ಮಕ್ಕಳನ್ನು ಬೆಳೆಸುವ ಪೋಷಕರ ಜವಾಬ್ದಾರಿಗಳ ಕುರಿತು ಮನಬಿಚ್ಚಿ ಮಾತನಾಡಿದ್ದಾರೆ. ಮನರಂಜನಾ ಜಗತ್ತಿನಲ್ಲಿ ಮೂರು ದಶಕಗಳಿಗೂ ಹೆಚ್ಚು ಕಾಲ ನಟಿ, ಉದ್ಯಮಿ, ಕಿರುತೆರೆ ನಿರೂಪಕಿ ಹಾಗೂ ತಾಯಿಯಾಗಿ ವಿವಿಧ ಜವಾಬ್ದಾರಿಗಳನ್ನು ನಿಭಾಯಿಸುತ್ತಿರುವ ಅವರು, ಸಮಾಜದಲ್ಲಿ ವಯಸ್ಸಿಗೆ ನೀಡಲಾಗುವ ಅತಿಯಾದ ಪ್ರಾಮುಖ್ಯತೆ ಮತ್ತು ಇಂದಿನ ತಲೆಮಾರಿನ ಪೋಷಕರ ಸವಾಲುಗಳ ಬಗ್ಗೆ ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡಿದ್ದಾರೆ.

ಶೀಘ್ರದಲ್ಲೇ 51ನೇ ವರ್ಷಕ್ಕೆ ಕಾಲಿಡಲಿರುವ ಶಿಲ್ಪಾ ಶೆಟ್ಟಿ, ನಮ್ಮ ದೇಶದಲ್ಲಿ ವಯಸ್ಸಿಗೆ ಅತಿಯಾದ ಪ್ರಾಮುಖ್ಯತೆ ನೀಡಲಾಗುತ್ತದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಹಾಲಿವುಡ್‌ನ ಪ್ರಸಿದ್ಧ ನಟಿಯರಾದ ಮೆರಿಲ್ ಸ್ಟ್ರೀಪ್ ಅಥವಾ ಜೆನ್ನಿಫರ್ ಲೋಪೆಜ್ ಅವರ ಅಭಿನಯ ಹಾಗೂ ಪ್ರದರ್ಶನವನ್ನು ನೋಡುವಾಗ ಯಾರೂ ಅವರ ವಯಸ್ಸಿನ ಬಗ್ಗೆ ಯೋಚಿಸುವುದಿಲ್ಲ ಎಂದು ಉದಾಹರಿಸಿದ ಅವರು, ತಮಗೆ ವಯಸ್ಸಾಗುವುದು ಮುಖ್ಯವಲ್ಲ, ಬದಲಿಗೆ ಜೀವನವನ್ನು ಹೇಗೆ ಬದುಕುತ್ತೇವೆ ಎಂಬುದು ಮುಖ್ಯ ಎಂದು ಹೇಳಿದ್ದಾರೆ. ತಮ್ಮ ದೇಹ ಮತ್ತು ಮನಸ್ಸಿಗೆ ಶಿಸ್ತು, ಕಾಳಜಿ ಹಾಗೂ ಸಮಯವನ್ನು ನೀಡುವುದಾಗಿ ಮತ್ತು ಅದೇ ಶಿಸ್ತು ತಮ್ಮ ಬಾಹ್ಯ ಸೌಂದರ್ಯದಲ್ಲಿ ಪ್ರತಿಫಲಿಸುತ್ತದೆ ಎಂದು ಅವರು ತಿಳಿಸಿದ್ದಾರೆ.

ತಮ್ಮ ವೈಯಕ್ತಿಕ ಜೀವನದ ಏರುಪೇರುಗಳು ಮತ್ತು ಪತಿ ರಾಜ್ ಕುಂದ್ರಾ ಅವರಿಗೆ ಸಂಬಂಧಿಸಿದ ವಿವಾದಗಳ ಬಗ್ಗೆಯೂ ಮಾತನಾಡಿರುವ ಶಿಲ್ಪಾ, ಪ್ರತಿಯೊಬ್ಬರ ಜೀವನದಲ್ಲೂ ಏರಿಳಿತಗಳು ಸಹಜ ಎಂದಿದ್ದಾರೆ. ತಾವು ಒಬ್ಬ ನಟಿಯಾಗಿದ್ದು, ವೈಯಕ್ತಿಕವಾಗಿ ಎಷ್ಟೇ ತೊಂದರೆಗಳಿದ್ದರೂ ಕೆಲಸದ ಸ್ಥಳದಲ್ಲಿ ಅದನ್ನು ಮುಖದಲ್ಲಿ ತೋರಿಸಿಕೊಳ್ಳಲು ತಮಗೆ ಹಣ ನೀಡುವುದಿಲ್ಲ ಎಂದು ಮಾರ್ಮಿಕವಾಗಿ ನುಡಿದಿದ್ದಾರೆ. ವೈಯಕ್ತಿಕ ಸಮಸ್ಯೆಗಳು ತಮ್ಮ ಖಾಸಗಿ ಜಾಗಕ್ಕೆ ಮಾತ್ರ ಸೀಮಿತವಾಗಿದ್ದು, ಕೆಲಸದ ವಿಷಯದಲ್ಲಿ ಯಾವಾಗಲೂ ಧನಾತ್ಮಕ ಮನೋಭಾವವನ್ನು ಹೊಂದಿರುವುದಾಗಿ ಸ್ಪಷ್ಟಪಡಿಸಿದ್ದಾರೆ. ಈ ರೀತಿಯ ವೃತ್ತಿಪರ ಶಿಸ್ತು ತಮಗೆ ತಮ್ಮ ಪೋಷಕರಿಂದ ಬಂದಿದೆ ಎಂದು ನೆನೆದಿದ್ದಾರೆ. ಜೊತೆಗೆ, ತಮಗೆ ಅತಿಯಾಗಿ ಯೋಚಿಸುವ ಅಭ್ಯಾಸವಿತ್ತೆಂದು, ಆದರೆ ಯೋಗವು ತಮ್ಮ ಜೀವನ ಮತ್ತು ಆಲೋಚನಾ ಶೈಲಿಯನ್ನು ಸಂಪೂರ್ಣವಾಗಿ ಬದಲಾಯಿಸಿ ಜಾಗೃತಿಯನ್ನು ಮೂಡಿಸಿದೆ ಎಂದು ಹೇಳಿದ್ದಾರೆ.

ಮುಂಬರುವ ರಿಯಾಲಿಟಿ ಶೋ 'ಮಾ ಹೈ ನಾ' ಹಿನ್ನೆಲೆಯಲ್ಲಿ ತಾಯ್ತನದ ಕುರಿತು ಮಾತನಾಡಿದ ಶಿಲ್ಪಾ, ತಮ್ಮ ತಾಯಿ ಸುನಂದಾ ಶೆಟ್ಟಿ ಅವರೇ ತಮಗೆ ದೊಡ್ಡ ಪ್ರೇರಣೆ ಎಂದಿದ್ದಾರೆ. ಚಿತ್ರರಂಗದ ಆರಂಭದ ದಿನಗಳಲ್ಲಿ ಯಾರಾದರೂ ತಮ್ಮ ಜೊತೆ ಕಿರಿಕ್ ಮಾಡಿಕೊಳ್ಳಬೇಕೆಂದರೆ ಮೊದಲು ತಮ್ಮ ತಾಯಿಯನ್ನು ಎದುರಿಸಬೇಕಾಗಿತ್ತು ಎಂದು ನೆನಪಿಸಿಕೊಂಡಿದ್ದಾರೆ. ತಾಯಿ ಉದ್ಯೋಗಿಯಾಗಿದ್ದರೂ ಕುಟುಂಬ ಮತ್ತು ವೃತ್ತಿಜೀವನವನ್ನು ಅದ್ಭುತವಾಗಿ ನಿಭಾಯಿಸಿದ್ದನ್ನು ನೋಡಿ ಬೆಳೆದ ತಮಗೆ ಮತ್ತು ಸಹೋದರಿ ಶಮಿತಾಗೆ ಅವರೇ ಧೈರ್ಯ ತುಂಬಿದ ಶಕ್ತಿ ಎಂದು ಕೃತಜ್ಞತೆ ಸಲ್ಲಿಸಿದ್ದಾರೆ.

ಇದೇ ವೇಳೆ, ಇಂದಿನ ಡಿಜಿಟಲ್ ಯುಗದಲ್ಲಿ ಮಕ್ಕಳನ್ನು ಬೆಳೆಸುವ ಸವಾಲುಗಳ ಬಗ್ಗೆ ಮಾತನಾಡಿದ ಅವರು, ತಮ್ಮ ಬಾಲ್ಯದ ದಿನಗಳಿಗೂ ಇಂದಿನ ದಿನಗಳಿಗೂ ಭಾರಿ ವ್ಯತ್ಯಾಸವಿದೆ ಎಂದಿದ್ದಾರೆ. ತಮ್ಮ ಬಾಲ್ಯದಲ್ಲಿ ಏನಾದರೂ ಮಾಹಿತಿ ಬೇಕಿದ್ದರೆ ಪೋಷಕರನ್ನು ಕೇಳುತ್ತಿದ್ದೆವು, ಆದರೆ ಇಂದಿನ ಮಕ್ಕಳಿಗೆ ಗೂಗಲ್ ಮತ್ತು ಕೃತಕ ಬುದ್ಧಿಮತ್ತೆಯ (AI) ನೆರವಿದೆ ಎಂದು ಹೇಳಿದ್ದಾರೆ. ಇಂದಿನ ತಲೆಮಾರಿನ ಮಕ್ಕಳು ಅತ್ಯಂತ ಜಾಗರೂಕರಾಗಿದ್ದು, ಅವರ ಗ್ರಹಿಕೆ ಮತ್ತು ಅಭಿಪ್ರಾಯಗಳು ಹೆಚ್ಚು ಪ್ರಬುದ್ಧವಾಗಿವೆ ಎಂದು ಆಶ್ಚರ್ಯ ಹಾಗೂ ಆತಂಕವನ್ನು ವ್ಯಕ್ತಪಡಿಸಿದ್ದಾರೆ. ತಮ್ಮ 14 ವರ್ಷದ ಮಗ ವಿವಿಧ ವಿಷಯಗಳ ಬಗ್ಗೆ ಸುದೀರ್ಘವಾಗಿ ಮಾತನಾಡಬಲ್ಲ ಸಾಮರ್ಥ್ಯ ಹೊಂದಿದ್ದಾನೆ ಎಂದು ಹೆಮ್ಮೆಯಿಂದ ಹೇಳಿದ ಅವರು, ಇಂದಿನ ಪೋಷಕರು ಮಕ್ಕಳಿಗೆ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಲು ಸೂಕ್ತ ಸ್ವಾತಂತ್ರ್ಯ ನೀಡುತ್ತಿರುವುದೇ ಹಿಂದಿನ ಮತ್ತು ಇಂದಿನ ಪೋಷಣೆಯ ನಡುವೆ ಇರುವ ಅತಿ ದೊಡ್ಡ ಬದಲಾವಣೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.