ಖಲ್‌ನಾಯಕ್ ರಿಟರ್ನ್ಸ್ ಟೀಸರ್: ಬಾಲು ಪಾತ್ರದಲ್ಲಿ ಸಂಜಯ್ ದತ್ ಭರ್ಜರಿ ಕಮ್‌ಬ್ಯಾಕ್

ಬಾಲಿವುಡ್‌ನ ಎವರ್‌ಗ್ರೀನ್ ನಟ ಸಂಜಯ್ ದತ್ ತಮ್ಮ ಐಕಾನಿಕ್ ಪಾತ್ರ 'ಬಲ್ಲು' ಮೂಲಕ ಮತ್ತೊಮ್ಮೆ ತೆರೆಯ ಮೇಲೆ ಆರ್ಭಟಿಸಲು ಸಜ್ಜಾಗಿದ್ದಾರೆ. 1993ರ ಸೂಪರ್ ಹಿಟ್ ಚಿತ್ರ 'ಖಲ್‌ನಾಯಕ್'ನ ಮುಂದುವರಿದ ಭಾಗ ಎನ್ನಲಾದ 'ಖಲ್‌ನಾಯಕ್ ರಿಟರ್ನ್ಸ್' ಚಿತ್ರದ ಟೀಸರ್ ಬಿಡುಗಡೆಯಾಗಿದೆ.

ಸುಭಾಷ್ ಘಾಯ್ ನಿರ್ದೇಶನದ ಮೂಲ ಚಿತ್ರದಲ್ಲಿ ಬಲರಾಮ್ ಪ್ರಸಾದ್ ಅಲಿಯಾಸ್ ಬಲ್ಲು ಎಂಬ ನಟೋರಿಯಸ್ ಅಪರಾಧಿಯ ಪಾತ್ರ ಮಾಡಿದ್ದ ಸಂಜಯ್ ದತ್, ಈ ಬಾರಿ ಇನ್ನೂ ಭೀಕರವಾಗಿ ಕಾಣಿಸಿಕೊಂಡಿದ್ದಾರೆ.

ಈಗ ಬಿಡುಗಡೆಯಾಗಿರುವ ಟೀಸರ್‌ನಲ್ಲಿ ಸಂಜಯ್ ದತ್ ರಸ್ತೆಯ ಮಧ್ಯೆ ಗಾಯಗೊಂಡ ವ್ಯಕ್ತಿಯ ಮುಂದೆ ಕುಳಿತು ಅಗ್ನಿಯನ್ನು ಸೃಷ್ಟಿಸಿ ಸಿಗರೇಟ್ ಹಚ್ಚುವ ದೃಶ್ಯವಿದ್ದು, ಅವರ ವಿಲನ್ ಅವತಾರ ಅಭಿಮಾನಿಗಳಲ್ಲಿ ರೋಮಾಂಚನ ಉಂಟುಮಾಡಿದೆ.

ಮೂಲ ಚಿತ್ರದಲ್ಲಿ ಜೈಲು ಪಾಲಾಗಿದ್ದ ಬಲ್ಲು, ದಶಕಗಳ ನಂತರ ಜೈಲಿನಿಂದ ಹೊರಬಂದು ಮತ್ತೆ ತನ್ನ ಕ್ರೌರ್ಯವನ್ನು ಮುಂದುವರಿಸುವ ಮುನ್ಸೂಚನೆಯನ್ನು ಈ ಟೀಸರ್ ನೀಡಿದೆ. ಹಿನ್ನೆಲೆಯಲ್ಲಿ "ನಾಯಕ್ ನಹಿ ಖಲ್‌ನಾಯಕ್ ಹೂ ಮೇ" ಎಂಬ ಹಳೆಯ ಪ್ರಸಿದ್ಧ ಗೀತೆಯ ಸಾಲುಗಳು ಮತ್ತು ದತ್ ಅವರ ವಿಶಿಷ್ಟ ನಗು 90ರ ದಶಕದ ಸಿನಿಪ್ರಿಯರಿಗೆ ಮರುಳನ್ನುಂಟು ಮಾಡಿದೆ.

ಈ ಚಿತ್ರವು ಮೂಲ 'ಖಲ್‌ನಾಯಕ್' ಚಿತ್ರದ ನೇರ ಮುಂದುವರಿಕೆಯೋ ಅಥವಾ ಅದೇ ಹೆಸರಿನ ವಿಭಿನ್ನ ಕಥೆಯೋ ಎಂಬ ಬಗ್ಗೆ ಅಧಿಕೃತ ಮಾಹಿತಿ ಲಭ್ಯವಾಗಿಲ್ಲದಿದ್ದರೂ, ಟೀಸರ್‌ನಲ್ಲಿ 'ಅಕ್ಟೋಬರ್ 10' ಎಂಬ ದಿನಾಂಕವನ್ನು ಉಲ್ಲೇಖಿಸಲಾಗಿದೆ. ಇದು ಚಿತ್ರದ ಬಿಡುಗಡೆಯ ದಿನಾಂಕವಿರಬಹುದು ಎಂದು ಅಂದಾಜಿಸಲಾಗಿದೆ.

ಚಿತ್ರದಲ್ಲಿ ಮಾಧುರಿ ದೀಕ್ಷಿತ್ ಮತ್ತು ಜಾಕಿ ಶ್ರಾಫ್‌ ಕೂಡ ಕಾಣಿಸಿಕೊಳ್ಳಲಿದ್ದಾರೆಯೇ ಎಂಬ ಬಗ್ಗೆ ಅಭಿಮಾನಿಗಳಲ್ಲಿ ಹೆಚ್ಚಿನ ಆಸೆ ಇದೆ. ಸದ್ಯಕ್ಕೆ ತಾರಾಬಳಗದ ಬಗ್ಗೆ ಹೆಚ್ಚಿನ ವಿವರಗಳು ಹೊರಬೀಳಬೇಕಿದ್ದು, ಒಟ್ಟಿನಲ್ಲಿ ಸಂಜಯ್ ದತ್ ಮತ್ತೊಮ್ಮೆ ವಿಲನ್ ರೂಪದಲ್ಲಿ ಬಾಕ್ಸ್ ಆಫೀಸ್ ಧೂಳೀಪಟ ಮಾಡಲು ಸಿದ್ಧರಾಗಿದ್ದಾರೆ ಎಂಬುದು ಸ್ಪಷ್ಟವಾಗಿದೆ.

ಶೀಘ್ರದಲ್ಲೇ ತಾರಾಗಣದ ಅಧಿಕೃತ ಘೋಷಣೆ

ಮೂರು ದಶಕಗಳ ಬಳಿಕ ಸಿದ್ಧವಾಗುತ್ತಿರುವ ಈ ಸೀಕ್ವೆಲ್ ಬಾಲಿವುಡ್ ಚಿತ್ರರಂಗದಲ್ಲಿ ಸಹಜವಾಗಿಯೇ ದೊಡ್ಡ ಮಟ್ಟದ ಸಂಚಲನ ಸೃಷ್ಟಿಸಿದೆ. ಈಗಾಗಲೇ ಚಿತ್ರದ ಸಂಪೂರ್ಣ ಹಕ್ಕುಗಳನ್ನು ಪಡೆದುಕೊಂಡಿರುವ ನಿರ್ಮಾಣ ಸಂಸ್ಥೆಯು, ಪ್ರೀ-ಪ್ರೊಡಕ್ಷನ್ ಕೆಲಸಗಳಲ್ಲಿ ನಿರತವಾಗಿದೆ. ಮುಂದಿನ ದಿನಗಳಲ್ಲಿ ಚಿತ್ರದ ನಿರ್ದೇಶಕರು ಯಾರು ಹಾಗೂ ಬಲ್ಲು ಬಲರಾಮ್ ಎದುರು ಅಬ್ಬರಿಸುವ ಇತರ ಪ್ರಮುಖ ತಾರಾಗಣದಲ್ಲಿ ಯಾರಿರಲಿದ್ದಾರೆ ಎಂಬ ರೋಚಕ ವಿವರಗಳನ್ನು ಶೀಘ್ರದಲ್ಲೇ ಅಧಿಕೃತವಾಗಿ ಹಂಚಿಕೊಳ್ಳುವ ನಿರೀಕ್ಷೆಯಿದೆ.