ಸೈಫ್ ಅಲಿ ಖಾನ್ ಅಭಿನಯದ 'ಕರ್ತವ್ಯ' ಮೇ 15ಕ್ಕೆ ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆ

ಬಾಲಿವುಡ್‌ನ ಖ್ಯಾತ ನಟ ಸೈಫ್ ಅಲಿ ಖಾನ್ ಅಭಿನಯದ ಬಹುನಿರೀಕ್ಷಿತ ಥ್ರಿಲ್ಲರ್ ಸಿನಿಮಾ 'ಕರ್ತವ್ಯ' ಬಿಡುಗಡೆಗೆ ಸಜ್ಜಾಗಿದೆ. ಪುಲ್ಕಿತ್ ನಿರ್ದೇಶನದ ಈ ಚಿತ್ರವು ಮೇ 15ರಂದು ನೇರವಾಗಿ ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾಗಲಿದೆ ಎಂದು ಬಾಲಿವುಡ್ ಬಾದ್‌ಶಾ ಶಾರುಖ್ ಖಾನ್ ಗುರುವಾರ ಅಧಿಕೃತವಾಗಿ ಘೋಷಿಸಿದ್ದಾರೆ.

ಶಾರುಖ್ ಖಾನ್ ಅವರ ರೆಡ್ ಚಿಲ್ಲಿಸ್ ಎಂಟರ್ಟೈನ್‌ಮೆಂಟ್ ಈ ಚಿತ್ರವನ್ನು ನಿರ್ಮಿಸಿದ್ದು, ಸಾಮಾಜಿಕ ಜಾಲತಾಣದ ಮೂಲಕ ಈ ಅಪ್‌ಡೇಟ್ ಹಂಚಿಕೊಂಡಿದ್ದಾರೆ. "ಕರ್ತವ್ಯದ ಈ ಚಕ್ರವ್ಯೂಹದಲ್ಲಿ ಪ್ರತಿ ನಿರ್ಧಾರವೂ ಒಂದು ಪರೀಕ್ಷೆಯಾಗಿರುತ್ತದೆ" ಎಂಬ ಅರ್ಥಪೂರ್ಣ ಸಾಲುಗಳೊಂದಿಗೆ ಶಾರುಖ್ ಚಿತ್ರದ ಪೋಸ್ಟರ್ ಹಂಚಿಕೊಂಡಿದ್ದಾರೆ.

ಇನ್ನು ಬಿಡುಗಡೆಯಾಗಿರುವ ಪೋಸ್ಟರ್‌ನಲ್ಲಿ ಸೈಫ್ ಅಲಿ ಖಾನ್ ಗಾಯಗೊಂಡ ಮುಖದೊಂದಿಗೆ ಪೊಲೀಸ್ ಸಮವಸ್ತ್ರದಲ್ಲಿ ಕಾಣಿಸಿಕೊಂಡಿದ್ದು, ಚಿತ್ರವು ಅತ್ಯಂತ ಗಂಭೀರ ಹಾಗೂ ತೀವ್ರತೆಯಿಂದ ಕೂಡಿರಲಿದೆ ಎಂಬ ಸುಳಿವು ನೀಡಿದೆ.

ಈ ಚಿತ್ರದ ಕಥೆಯು ನೈತಿಕವಾಗಿ ಸಂಕೀರ್ಣವಾಗಿರುವ ಜಗತ್ತಿನಲ್ಲಿ ತನ್ನ ಜವಾಬ್ದಾರಿಗಳನ್ನು ನಿಭಾಯಿಸಲು ಹೆಣಗಾಡುವ ಪೊಲೀಸ್ ಅಧಿಕಾರಿಯ ಸುತ್ತ ಸಾಗುತ್ತದೆ. ಕರ್ತವ್ಯ, ವೈಯಕ್ತಿಕ ಸಂಬಂಧಗಳು ಮತ್ತು ಭಾವನಾತ್ಮಕ ಹೊರೆಗಳ ನಡುವೆ ಸಿಲುಕುವ ನಾಯಕನ ಜೀವನ, ನ್ಯಾಯ ಮತ್ತು ಅಧಿಕಾರದ ಆಟವನ್ನು ಈ ಸಿನಿಮಾ ಅನಾವರಣಗೊಳಿಸಲಿದೆ. ಗೌರಿ ಖಾನ್ ನಿರ್ಮಾಣದ ಈ ಚಿತ್ರದಲ್ಲಿ ಸೈಫ್ ಅಲಿ ಖಾನ್ ಅವರೊಂದಿಗೆ ರಸಿಕಾ ದುಗಲ್, ಸಂಜಯ್ ಮಿಶ್ರಾ, ಝಾಕಿರ್ ಹುಸೇನ್ ಮತ್ತು ಮನೀಶ್ ಚೌಧರಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಸೈಫ್ ಅಲಿ ಖಾನ್ ಅವರು ಇತ್ತೀಚೆಗಷ್ಟೇ ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾದ 'ಜುವೆಲ್ ಥೀಫ್: ದ ಹೀಸ್ಟ್ ಬಿಗಿನ್ಸ್' ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈ 'ಕರ್ತವ್ಯ' ಚಿತ್ರದ ನಂತರ ಅವರು ಪ್ರಿಯದರ್ಶನ್ ನಿರ್ದೇಶನದ 'ಹೈವಾನ್' ಚಿತ್ರದಲ್ಲಿ ಅಕ್ಷಯ್ ಕುಮಾರ್ ಅವರೊಂದಿಗೆ ತೆರೆ ಹಂಚಿಕೊಳ್ಳಲಿದ್ದಾರೆ. ಸದ್ಯಕ್ಕೆ ಮೇ 15ರಿಂದ ಸೈಫ್ ಅಲಿ ಖಾನ್ ಅವರ ಈ ಹೊಸ ಅವತಾರವನ್ನು ವೀಕ್ಷಿಸಲು ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ.