ಡಾನ್ 3 ವಿವಾದ: ನಟ ರಣವೀರ್ ಸಿಂಗ್‌ಗೆ ಎಫ್‌ಡಬ್ಲ್ಯೂಐಸಿಇ ನಿಷೇಧ

ಖ್ಯಾತ ಬಾಲಿವುಡ್ ನಟ ರಣವೀರ್ ಸಿಂಗ್ ಅವರಿಗೆ ಫೆಡರೇಷನ್ ಆಫ್ ವೆಸ್ಟರ್ನ್ ಇಂಡಿಯಾ ಸಿನಿ ಎಂಪ್ಲಾಯೀಸ್ ಅಸಹಕಾರದ ನಿರ್ದೇಶನ ನೀಡುವ ಮೂಲಕ ಚಿತ್ರರಂಗದಿಂದ ತಾತ್ಕಾಲಿಕ ನಿಷೇಧ ಹೇರಿದೆ. ನಿರ್ದೇಶಕ ಹಾಗೂ ನಿರ್ಮಾಪಕ ಫರ್ಹಾನ್ ಅಖ್ತರ್ ಅವರ ಹೈ-ಪ್ರೊಫೈಲ್ ಸಿನಿಮಾ 'ಡಾನ್ 3' ಚಿತ್ರದಿಂದ ರಣವೀರ್ ಸಿಂಗ್ ಹಠಾತ್ ಆಗಿ ಹೊರನಡೆದ ಕಾರಣ ಈ ವಿವಾದ ಸೃಷ್ಟಿಯಾಗಿದೆ.

ಶೂಟಿಂಗ್ ಆರಂಭವಾಗಲು ಕೇವಲ ಮೂರು ವಾರಗಳು ಬಾಕಿ ಇರುವಾಗ ರಣವೀರ್ ಈ ನಿರ್ಧಾರ ಕೈಗೊಂಡಿದ್ದರಿಂದ, ತಮಗೆ ಸುಮಾರು 45 ಕೋಟಿ ರೂಪಾಯಿಗಳಷ್ಟು ಭಾರಿ ಆರ್ಥಿಕ ನಷ್ಟವಾಗಿದೆ ಎಂದು ಎಕ್ಸೆಲ್ ಎಂಟರ್ಟೈನ್‌ಮೆಂಟ್ ಪ್ರೊಡಕ್ಷನ್ ಹೌಸ್ ಆರೋಪಿಸಿದೆ. ಈ ಹಿನ್ನೆಲೆಯಲ್ಲಿ ಫರ್ಹಾನ್ ಅಖ್ತರ್ ಅವರು ನೀಡಿದ ದೂರಿನ ಮೇರೆಗೆ ಚಲನಚಿತ್ರ ಕಾರ್ಮಿಕರ ಒಕ್ಕೂಟವಾದ ಎಫ್‌ಡಬ್ಲ್ಯೂಐಸಿಇ ಈ ಕಠಿಣ ಕ್ರಮ ಕೈಗೊಂಡಿದೆ.

ವಿವಾದದ ಹಿನ್ನೆಲೆಯಲ್ಲಿ ಎಫ್‌ಡಬ್ಲ್ಯೂಐಸಿಇ ಸಂಸ್ಥೆಯು ರಣವೀರ್ ಸಿಂಗ್ ಅವರಿಗೆ ತಮ್ಮ ವಾದ ಮಂಡಿಸಲು ಸತತ ಮೂರು ಬಾರಿ ನೋಟಿಸ್ ಮತ್ತು ಜ್ಞಾಪನೆಗಳನ್ನು ಕಳುಹಿಸಿತ್ತು. ಆದರೆ, ರಣವೀರ್ ಸಿಂಗ್ ಕಡೆಯಿಂದ ಯಾವುದೇ ಸಕಾರಾತ್ಮಕ ಪ್ರತಿಕ್ರಿಯೆ ಬಂದಿರಲಿಲ್ಲ. ಬದಲಾಗಿ, ಈ ವಿವಾದವು ಒಪ್ಪಂದಕ್ಕೆ ಸಂಬಂಧಿಸಿದ್ದಾಗಿದ್ದು, ಇದನ್ನು ಬಗೆಹರಿಸಲು ಈ ಒಕ್ಕೂಟವು ಸೂಕ್ತ ವೇದಿಕೆಯಲ್ಲ, ಬದಲಿಗೆ ಕಾನೂನು ಚೌಕಟ್ಟಿನಲ್ಲಿ ಬಗೆಹರಿಸಿಕೊಳ್ಳಬೇಕು ಎಂದು ನಟನ ಪರವಾಗಿ ಇಮೇಲ್ ಮೂಲಕ ಪ್ರತಿಕ್ರಿಯಿಸಲಾಗಿತ್ತು. ನಟನ ಈ ನಡವಳಿಕೆಯನ್ನು ಗಂಭೀರವಾಗಿ ಪರಿಗಣಿಸಿದ ಒಕ್ಕೂಟವು, ತಕ್ಷಣದಿಂದ ಜಾರಿಗೆ ಬರುವಂತೆ ರಣವೀರ್ ಅವರೊಂದಿಗೆ ಯಾವುದೇ ಚಲನಚಿತ್ರ ಸಂಸ್ಥೆಗಳು ಅಥವಾ ಕಾರ್ಮಿಕರು ಸಹಕರಿಸಬಾರದು ಎಂದು ಆದೇಶಿಸಿದೆ. ಈ ನಿಷೇಧದ ನಡುವೆಯೂ, ಮಾತುಕತೆಯ ಮೂಲಕ ಸೌಹಾರ್ದಯುತವಾಗಿ ಸಮಸ್ಯೆ ಬಗೆಹರಿಸಿಕೊಳ್ಳಲು ತಾವು ಸಿದ್ಧರಿರುವುದಾಗಿ ಒಕ್ಕೂಟದ ಪದಾಧಿಕಾರಿಗಳು ತಿಳಿಸಿದ್ದಾರೆ.

ಈ ನಿಷೇಧದ ಬೆನ್ನಲ್ಲೇ ರಣವೀರ್ ಸಿಂಗ್ ಅವರ ವಕ್ತಾರರು ಅಧಿಕೃತ ಹೇಳಿಕೆಯೊಂದನ್ನು ಬಿಡುಗಡೆ ಮಾಡಿದ್ದಾರೆ. ರಣವೀರ್ ಸಿಂಗ್ ಅವರಿಗೆ ಚಿತ್ರರಂಗ ಮತ್ತು 'ಡಾನ್' ಫ್ರಾಂಚೈಸಿ ಮೇರೆಗೆ ಅಪಾರ ಗೌರವವಿದೆ ಎಂದು ಅದರಲ್ಲಿ ತಿಳಿಸಲಾಗಿದೆ. ಈ ಇಡೀ ಬೆಳವಣಿಗೆಯ ನಡುವೆ ರಣವೀರ್ ಉದ್ದೇಶಪೂರ್ವಕವಾಗಿಯೇ ಮೌನ ಕಾಯ್ದುಕೊಂಡಿದ್ದು, ವೃತ್ತಿಪರ ಚರ್ಚೆಗಳು ಮತ್ತು ವೈಯಕ್ತಿಕ ಬಾಂಧವ್ಯಗಳನ್ನು ಗೌರವ ಹಾಗೂ ಪ್ರಬುದ್ಧತೆಯಿಂದ ನಿಭಾಯಿಸಬೇಕು ಎಂಬುವುದು ಅವರ ಅಭಿಪ್ರಾಯ. ಮಾರುಕಟ್ಟೆಯಲ್ಲಿ ಹರಿದಾಡುತ್ತಿರುವ ಊಹಾಪೋಹಗಳಿಗೆ ಸಾರ್ವಜನಿಕವಾಗಿ ಪ್ರತಿಕ್ರಿಯಿಸುವುದು ಅಗತ್ಯವಿಲ್ಲ ಎಂದು ಭಾವಿಸಿರುವ ನಟ, ಪ್ರಸ್ತುತ ತಮ್ಮ ಮುಂದಿನ ಕೆಲಸಗಳು ಮತ್ತು ಬದ್ಧತೆಗಳ ಮೇಲೆ ಗಮನ ಹರಿಸಿದ್ದಾರೆ ಎಂದು ವಕ್ತಾರರು ಸ್ಪಷ್ಟಪಡಿಸಿದ್ದಾರೆ.

ಸಾಮಾನ್ಯವಾಗಿ ಎಫ್‌ಡಬ್ಲ್ಯೂಐಸಿಇ ಹೇರುವ ಇಂತಹ ಅಸಹಕಾರದ ಆದೇಶಗಳು ಬಾಲಿವುಡ್‌ನಲ್ಲಿ ನಟರ ಕೆಲಸದ ಮೇಲೆ ತೀವ್ರ ಪರಿಣಾಮ ಬೀರುತ್ತವೆ. ಏಕೆಂದರೆ ಈ ಒಕ್ಕೂಟದಲ್ಲಿ ತಂತ್ರಜ್ಞರು, ದೈನಂದಿನ ಕೂಲಿ ಕಾರ್ಮಿಕರು ಸೇರಿದಂತೆ ಸಾವಿರಾರು ಚಿತ್ರರಂಗದ ನೌಕರರು ಇರುತ್ತಾರೆ. ಇವರೆಲ್ಲರೂ ನಟನೊಂದಿಗೆ ಕೆಲಸ ಮಾಡಲು ನಿರಾಕರಿಸಿದರೆ ಚಿತ್ರೀಕರಣ ನಡೆಸುವುದು ಅಸಾಧ್ಯವಾಗುತ್ತದೆ. ಆದರೆ, ಈ ಹಿಂದೆಯೂ ದಿಲ್ಜಿತ್ ದೋಸಾಂಜ್ ಅವರಂತಹ ಕಲಾವಿದರ ಮೇಲಿನ ನಿಷೇಧವನ್ನು ಪ್ರಮುಖ ನಿರ್ಮಾಪಕರ ಮಧ್ಯಸ್ಥಿಕೆಯ ಮೂಲಕ ಹಿಂಪಡೆಯಲಾಗಿತ್ತು.

ಹಾಗಾಗಿ ಪ್ರಸ್ತುತ ವಿವಾದದಲ್ಲಿ ಪ್ರೊಡ್ಯೂಸರ್ಸ್ ಗಿಲ್ಡ್ ಆಫ್ ಇಂಡಿಯಾ ಮಧ್ಯಪ್ರವೇಶಿಸಿ, ರಣವೀರ್ ಸಿಂಗ್ ಮತ್ತು ಫರ್ಹಾನ್ ಅಖ್ತರ್ ಬಣಗಳ ನಡುವೆ ಸಂಧಾನ ಮೂಡಿಸಿ ಆರ್ಥಿಕ ನಷ್ಟದ ಇತ್ಯರ್ಥಕ್ಕೆ ದಾರಿ ಮಾಡಿಕೊಡುವ ಸಾಧ್ಯತೆಯಿದೆ. ಒಟ್ಟಾರೆಯಾಗಿ, ಈ ವಿವಾದವು ಕೋರ್ಟ್ ಮೆಟ್ಟಿಲೇರುತ್ತದೆಯೇ ಅಥವಾ ಚಿತ್ರರಂಗದ ಪ್ರಭಾವಿಗಳ ಸಮ್ಮುಖದಲ್ಲಿ ಬಗೆಹರಿಯುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.