ಅಬ್ಸೆಷನ್ ಬಾಕ್ಸ್ ಆಫೀಸ್: 300 ಮಿಲಿಯನ್ ಡಾಲರ್ ಗಳಿಕೆಯತ್ತ ಹಾರರ್ ಸಿನಿಮಾ

ಕರಿ ಬಾರ್ಕರ್ ನಿರ್ದೇಶನದ ಹಾರರ್ ಚಲನಚಿತ್ರ 'ಅಬ್ಸೆಷನ್' ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಕಲೆಕ್ಷನ್‌ ಮಾಡುವ ಮೂಲಕ ಹೊಸ ಇತಿಹಾಸ ಸೃಷ್ಟಿಸಿದೆ. ಕೇವಲ 7,50,000 ಡಾಲರ್ (ಸುಮಾರು 6 ಕೋಟಿ ರೂಪಾಯಿ) ಅತ್ಯಂತ ಕಡಿಮೆ ಬಜೆಟ್‌ನಲ್ಲಿ ತಯಾರಾದ ಈ ಸಿನಿಮಾ ಈಗ ಜಾಗತಿಕವಾಗಿ ಬರೋಬ್ಬರಿ 286.5 ಮಿಲಿಯನ್ ಡಾಲರ್ (ಅಂದಾಜು 2,400 ಕೋಟಿ ರೂಪಾಯಿಗೂ ಹೆಚ್ಚು) ಗಳಿಕೆ ಮಾಡಿದ್ದು, 300 ಮಿಲಿಯನ್ ಡಾಲರ್ ಕ್ಲಬ್ ಸೇರುವತ್ತ ಮುನ್ನುಗ್ಗುತ್ತಿದೆ. ಇದರೊಂದಿಗೆ ಚಲನಚಿತ್ರೋತ್ಸವವೊಂದರಲ್ಲಿ ಪ್ರದರ್ಶನ ಕಂಡು, ನಂತರ ವಿತರಕರಿಂದ ಖರೀದಿಸಲ್ಪಟ್ಟು ಅತಿ ಹೆಚ್ಚು ಗಳಿಕೆ ಮಾಡಿದ ಸಾರ್ವಕಾಲಿಕ ದಾಖಲೆಯ ಸಿನಿಮಾವಾಗಿ ಹೊರಹೊಮ್ಮಿದೆ.

ಈ ಹಿಂದೆ 1999ರಲ್ಲಿ ಸನ್‌ಡ್ಯಾನ್ಸ್ ಫಿಲ್ಮ್ ಫೆಸ್ಟಿವಲ್‌ನಲ್ಲಿ ಖರೀದಿಯಾಗಿದ್ದ 'ದಿ ಬ್ಲೇರ್ ವಿಚ್ ಪ್ರಾಜೆಕ್ಟ್' ಸಿನಿಮಾ 248.6 ಮಿಲಿಯನ್ ಡಾಲರ್ ಗಳಿಸಿ ಸೃಷ್ಟಿಸಿದ್ದ ದಾಖಲೆಯನ್ನು 'ಅಬ್ಸೆಷನ್' ಈಗ ಅಧಿಕೃತವಾಗಿ ಮುರಿದಿದೆ. ಅಷ್ಟೇ ಅಲ್ಲದೆ, ಈ ಹಿಂದೆ ಆಸ್ಕರ್ ಪ್ರಶಸ್ತಿ ಗೆದ್ದಿದ್ದ ಬ್ಲಮ್‌ಹೌಸ್ ಸಂಸ್ಥೆಯದ್ದೇ ಆದ 'ಗೆಟ್ ಔಟ್' ಸಿನಿಮಾದ ಜಾಗತಿಕ ಗಳಿಕೆಯನ್ನು ಸಹ ಇದು ಹಿಂದಿಕ್ಕಿದೆ.

ಪ್ರೇಕ್ಷಕರು ಚಿತ್ರದ ಮುಖ್ಯ ಪಾತ್ರಗಳಾದ ನಿಕ್ಕಿ ಮತ್ತು ಬೇರ್ ನಡುವಿನ ಭಯಾನಕ ಸಂಬಂಧದ ಕಥೆಗೆ ಮಾರುಹೋಗಿದ್ದು, ಚಿತ್ರಮಂದಿರಗಳತ್ತ ಲಗ್ಗೆ ಇಡುತ್ತಿದ್ದಾರೆ. ಸಾಮಾನ್ಯವಾಗಿ ಹಾರರ್ ಸಿನಿಮಾಗಳು ಬಿಡುಗಡೆಯಾದ ಮೊದಲ ವಾರದ ನಂತರ ಗಳಿಕೆಯಲ್ಲಿ ಕುಸಿತ ಕಾಣುತ್ತವೆ, ಆದರೆ ಈ ಸಿನಿಮಾ ಮಾತ್ರ ಸತತ ನಾಲ್ಕು ವಾರಗಳ ಕಾಲ ತನ್ನ ಆರಂಭಿಕ ವಾರದ ಗಳಿಕೆಗಿಂತಲೂ ಹೆಚ್ಚು ಕಲೆಕ್ಷನ್‌ ಮಾಡುವ ಮೂಲಕ ಅಚ್ಚರಿ ಮೂಡಿಸಿದೆ.

ಟೊರೊಂಟೊ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ ಮಿಡ್‌ನೈಟ್ ವಿಭಾಗದಲ್ಲಿ ಪ್ರೀಮಿಯರ್ ಪ್ರದರ್ಶನ ಕಂಡಿದ್ದ ಈ ಚಿತ್ರವನ್ನು ಫೋಕಸ್ ಫೀಚರ್ಸ್ ಸಂಸ್ಥೆಯು 15 ಮಿಲಿಯನ್ ಡಾಲರ್‌ಗೆ ಖರೀದಿಸಿತ್ತು. ಚಿತ್ರದ ಪ್ರಚಾರಕ್ಕಾಗಿ ಖ್ಯಾತ ನಿರ್ಮಾಪಕ ಜೇಸನ್ ಬ್ಲಮ್ ಅವರ ಬ್ಲಮ್‌ಹೌಸ್ ಅಟಾಮಿಕ್ ಸಂಸ್ಥೆ ಕೈಜೋಡಿಸಿತ್ತು. ಸಿನಿಮಾ ಯಶಸ್ವಿಯಾದ ಹಿನ್ನೆಲೆಯಲ್ಲಿ ಬ್ಲಮ್‌ಹೌಸ್ ಸಂಸ್ಥೆಯು ಬಾಕ್ಸ್ ಆಫೀಸ್ ಬೋನಸ್ ರೂಪದಲ್ಲೇ ಸುಮಾರು 17 ಮಿಲಿಯನ್ ಡಾಲರ್ ಗಳಿಸಿದೆ ಎಂದು ಮೂಲಗಳು ತಿಳಿಸಿವೆ. ಚಿತ್ರವನ್ನು ನಿರ್ಮಿಸಿದ ಕ್ಯಾಪ್‌ಸ್ಟೋನ್ ಪಿಕ್ಚರ್ಸ್ ಸಂಸ್ಥೆಗೆ 45 ರಿಂದ 50 ಮಿಲಿಯನ್ ಡಾಲರ್ ಲಾಭ ಸಿಗಲಿದ್ದು, ಇದನ್ನು ನಿರ್ದೇಶಕ ಕರಿ ಬಾರ್ಕರ್ ಸೇರಿದಂತೆ ತಾಂತ್ರಿಕ ತಂಡದೊಂದಿಗೆ ಹಂಚಿಕೊಳ್ಳಲಾಗುವುದು. ಇನ್ನು ಚಿತ್ರದ ವಿತರಣೆ ಮಾಡಿರುವ ಫೋಕಸ್ ಫೀಚರ್ಸ್ ಸಂಸ್ಥೆಯು ಈ ಸಿನಿಮಾದಿಂದ ಬರೋಬ್ಬರಿ 125 ಮಿಲಿಯನ್ ಡಾಲರ್ ಲಾಭ ಗಳಿಸುವ ನಿರೀಕ್ಷೆಯಿದೆ.