Mrunal Thakur| ಧನುಷ್ ಜೊತೆಗಿನ ಮದುವೆ: ಮೌನ ಮುರಿದ ಮೃಣಾಲ್ ಠಾಕೂರ್

ಮೃಣಾಲ್ ಠಾಕೂರ್ ಮತ್ತು ತಮಿಳು ನಟ ಧನುಷ್ ಮದುವೆಯಾಗಲಿದ್ದಾರೆ ಎಂಬ ವದಂತಿಗಳು ಕಳೆದ ಕೆಲವು ತಿಂಗಳುಗಳಿಂದ ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ಸದ್ದು ಮಾಡುತ್ತಿದ್ದವು. ಈ ಹಿಂದೆ ಈ ಸುದ್ದಿಯನ್ನು ನಿರಾಕರಿಸಿದ್ದ ಮೃಣಾಲ್, ಈಗ ತಮ್ಮ ಸಿನಿಮಾಗಳ ಬಿಡುಗಡೆಯ ಸಮಯದಲ್ಲಿ ಇಂತಹ ಗಾಸಿಪ್‌ಗಳು ಹರಡುವುದರಿಂದ ಉಂಟಾಗುವ ಬೇಸರವನ್ನು ಹೊರಹಾಕಿದ್ದಾರೆ.

ಇತ್ತೀಚೆಗಷ್ಟೇ ಅಡಿವಿ ಶೇಷ್ ಜೊತೆಗಿನ 'ಡಕಾಯಿತ' ಸಿನಿಮಾ ಬಿಡುಗಡೆಯಾದ ಸಂದರ್ಭದಲ್ಲಿ ಸಂದರ್ಶನವೊಂದರಲ್ಲಿ ಮಾತನಾಡಿದ ಅವರು, ವೈಯಕ್ತಿಕ ಬದುಕು ಸುದ್ದಿಯಾಗುವುದಕ್ಕಿಂತ ತಮ್ಮ ಕೆಲಸದ ಮೂಲಕ ಗುರುತಿಸಿಕೊಳ್ಳಲು ಬಯಸುವುದಾಗಿ ತಿಳಿಸಿದ್ದಾರೆ.

ತಮಗೆ ಡೇಟಿಂಗ್ ಮಾಡಲು ಸಮಯವೇ ಇಲ್ಲ ಎಂದು ಸ್ಪಷ್ಟಪಡಿಸಿದ ನಟಿ, ಕಾಲಿನ ಲಿಗಮೆಂಟ್ ನೋವಿನಿಂದ ಬಳಲುತ್ತಿದ್ದರೂ ಎಕ್ಸ್‌-ರೇ ಮಾಡಿಸಿಕೊಂಡ ನಂತರ ಚಿಕಿತ್ಸೆ ಪಡೆಯಲು ಪುರಸೊತ್ತಿಲ್ಲದಷ್ಟು ಕೆಲಸದಲ್ಲಿ ಮಗ್ನರಾಗಿರುವುದಾಗಿ ಹೇಳಿದ್ದಾರೆ. ತಮ್ಮ ಸಿನಿಮಾ ಬಿಡುಗಡೆಯ ಹಂತದಲ್ಲಿದ್ದಾಗ ಇಂತಹ ವದಂತಿಗಳು ಹರಡುವುದು ಕೆಲಸದ ಮೇಲೆ ಪರಿಣಾಮ ಬೀರುತ್ತದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ. ಈ ರೀತಿಯ ಸುದ್ದಿಗಳು ಹರಿದಾಡುವಾಗ ಜನರು ಇದನ್ನು ಪ್ರಚಾರದ ತಂತ್ರ ಎಂದು ಭಾವಿಸುತ್ತಾರೆ, ಆದರೆ ಅಂತಹ ಪರಿಸ್ಥಿತಿಯಿಂದ ರಕ್ಷಿಸಿಕೊಳ್ಳಲು ತಾನು ಪ್ರತ್ಯೇಕ ತಂಡವನ್ನೇ ನೇಮಿಸಿಕೊಳ್ಳಬೇಕಾಯಿತು ಎಂದು ಅವರು ವಿವರಿಸಿದ್ದಾರೆ.

ತಮ್ಮ ಪ್ರೀತಿಯ ವಿಷಯದಲ್ಲಿ ತಾವು ಅತ್ಯಂತ ಮುಕ್ತ ಎಂದು ಹೇಳಿಕೊಂಡಿರುವ ಮೃಣಾಲ್, ಜೀವನದಲ್ಲಿ ಯಾರಾದರೂ ಬಂದರೆ ಖಂಡಿತವಾಗಿಯೂ ಇಡೀ ಜಗತ್ತಿಗೆ ತಿಳಿಸುವುದಾಗಿ ಭರವಸೆ ನೀಡಿದ್ದಾರೆ. ಈ ಹಿಂದೆ 'ದೋ ದೀವಾನೇ ಶಹರ್ ಮೇ' ಚಿತ್ರದ ಬಿಡುಗಡೆ ವೇಳೆ ಮತ್ತು 'ಸನ್ ಆಫ್ ಸರ್ದಾರ್ 2' ಪ್ರೀಮಿಯರ್‌ನಲ್ಲಿ ಧನುಷ್ ಅವರನ್ನು ಭೇಟಿಯಾದ ವಿಡಿಯೋ ವೈರಲ್ ಆದಾಗಿನಿಂದ ಇವರಿಬ್ಬರ ಮದುವೆಯ ಕುರಿತು ಚರ್ಚೆಗಳು ಶುರುವಾಗಿದ್ದವು. 'ತೇರೆ ಇಷ್ಕ್ ಮೇ' ಚಿತ್ರದ ಶೂಟಿಂಗ್ ಮುಕ್ತಾಯದ ಪಾರ್ಟಿಯಲ್ಲೂ ಮೃಣಾಲ್ ಕಾಣಿಸಿಕೊಂಡಿದ್ದು ಈ ಅನುಮಾನಗಳಿಗೆ ಪುಷ್ಠಿ ನೀಡಿತ್ತು. ಆದರೆ ಈಗ ಮೃಣಾಲ್ ಈ ಎಲ್ಲಾ ಗಾಳಿ ಸುದ್ದಿಗಳಿಗೆ ಪೂರ್ಣವಿರಾಮ ಇಟ್ಟಿದ್ದಾರೆ.