Michael Jackson Biopic| ಮೈಕಲ್ ಜಾಕ್ಸನ್ ಬಯೋಪಿಕ್‌ನಲ್ಲಿ ಲೈಂಗಿಕ ಕಿರುಕುಳದ ಆರೋಪಗಳು ಯಾಕಿಲ್ಲ?

ಖ್ಯಾತ ಪಾಪ್ ಗಾಯಕ ಮೈಕಲ್ ಜಾಕ್ಸನ್ ಅವರ ಜೀವನದ ಆಧಾರಿತ 'ಮೈಕಲ್' ಸಿನಿಮಾ ಸದ್ಯ ವಿಶ್ವದಾದ್ಯಂತ ಚಿತ್ರಮಂದಿರಗಳಲ್ಲಿ ಯಶಸ್ವಿಯಾಗಿ ಪ್ರದರ್ಶನಗೊಳ್ಳುತ್ತಿದೆ. ಈ ಚಿತ್ರವು ಗಲ್ಲಾಪೆಟ್ಟಿಗೆಯಲ್ಲಿ ಉತ್ತಮ ಗಳಿಕೆ ಮಾಡುತ್ತಿದ್ದರೂ ಸಹ, ವಿಮರ್ಶಕರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಮುಖ್ಯವಾಗಿ ಮೈಕಲ್ ಜಾಕ್ಸನ್ ಅವರ ಜೀವನದ ಕರಾಳ ಅಧ್ಯಾಯವೆಂದೇ ಪರಿಗಣಿಸಲಾದ ಲೈಂಗಿಕ ಕಿರುಕುಳದ ಆರೋಪಗಳನ್ನು ಸಿನಿಮಾದಲ್ಲಿ ಎಲ್ಲಿಯೂ ಉಲ್ಲೇಖಿಸದಿರುವುದು ದೊಡ್ಡ ಮಟ್ಟದ ಚರ್ಚೆಗೆ ಗ್ರಾಸವಾಗಿದೆ.

ಚಿತ್ರದ ಈ ನಿರ್ಧಾರದ ಹಿಂದೆ ಒಂದು ಬಲವಾದ ಕಾನೂನು ಕಾರಣವಿದೆ ಎಂಬ ವಿಷಯ ಈಗ ಹೊರಬಂದಿದೆ. ಮೈಕಲ್ ಜಾಕ್ಸನ್ ಅವರ ಆಸ್ತಿ ನಿರ್ವಹಣಾ ಸಂಸ್ಥೆ (ಎಸ್ಟೇಟ್) ಈ ಹಿಂದೆ ದೂರುದಾರರೊಬ್ಬರ ಜೊತೆ ಮಾಡಿಕೊಂಡಿದ್ದ ಹಳೆಯ ಒಪ್ಪಂದವೊಂದು ಈ ವಿವಾದಕ್ಕೆ ಕಾರಣವಾಗಿದೆ. ಈ ಒಪ್ಪಂದದ ಪ್ರಕಾರ, ಮೈಕಲ್ ವಿರುದ್ಧದ ಆರೋಪಗಳನ್ನು ವಾಣಿಜ್ಯ ಉದ್ದೇಶಗಳಿಗಾಗಿ ಬಳಸುವಂತಿಲ್ಲ ಎಂಬ ನಿಯಮವಿತ್ತು. ಸಿನಿಮಾ ಚಿತ್ರೀಕರಣ ಮುಗಿದ ನಂತರ ಈ ಕಾನೂನು ತೊಡಕು ನಿರ್ಮಾಪಕರ ಗಮನಕ್ಕೆ ಬಂದಿದ್ದರಿಂದ, ಲೈಂಗಿಕ ಕಿರುಕುಳಕ್ಕೆ ಸಂಬಂಧಿಸಿದ ದೃಶ್ಯಗಳನ್ನು ಕತ್ತರಿಸಿ ಚಿತ್ರವನ್ನು ಮರುಚಿತ್ರೀಕರಣ ಮಾಡಬೇಕಾಯಿತು. ಈ ಆಕಸ್ಮಿಕ ಬದಲಾವಣೆಯಿಂದಾಗಿ ಸಿನಿಮಾದ ಬಜೆಟ್ ಸುಮಾರು 200 ಮಿಲಿಯನ್ ಡಾಲರ್‌ಗಳಿಗೆ ಏರಿಕೆಯಾಗಿದೆ.

ಸಿನಿಮಾದ ಅಂತ್ಯದಲ್ಲಿ 'ಕಥೆ ಮುಂದುವರಿಯುತ್ತದೆ' ಎಂಬ ಸಂದೇಶವಿರುವುದರಿಂದ ಇದರ ಎರಡನೇ ಭಾಗದ ಬಗ್ಗೆಯೂ ಕುತೂಹಲ ಮೂಡಿದೆ. ಚಿತ್ರದ ನಿರ್ಮಾಪಕರು 2027 ರಲ್ಲಿ ಇದರ ಮುಂದುವರಿದ ಭಾಗವನ್ನು ಬಿಡುಗಡೆ ಮಾಡುವ ಇಚ್ಛೆ ಹೊಂದಿದ್ದಾರೆ. ಎರಡನೇ ಭಾಗದಲ್ಲಿ ಜಾಕ್ಸನ್ ಅವರ ಜೀವನದ ಮುಂದಿನ ಹಂತಗಳು, ಅಂದರೆ 90ರ ದಶಕದಲ್ಲಿ ಅವರು ಎದುರಿಸಿದ ಕಾನೂನು ಹೋರಾಟಗಳು ಮತ್ತು ಅವರ ಆರೋಗ್ಯದ ಏರುಪೇರುಗಳ ಮೇಲೆ ಬೆಳಕು ಚೆಲ್ಲುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಮೈಕಲ್ ಜಾಕ್ಸನ್ ಅವರ ಮೇಲಿದ್ದ ಲೈಂಗಿಕ ಕಿರುಕುಳದ ಆರೋಪಗಳೇನು?

ಜಾಕ್ಸನ್ ವಿರುದ್ಧ ಮೊದಲ ಬಾರಿಗೆ ಲೈಂಗಿಕ ಕಿರುಕುಳದ ಆರೋಪ ಕೇಳಿಬಂದಿದ್ದು 1993ರಲ್ಲಿ. 13 ವರ್ಷದ ಜೋರ್ಡಾನ್ ಚಾಂಡ್ಲರ್ ಎಂಬ ಬಾಲಕನ ತಂದೆ ಈ ದೂರನ್ನು ನೀಡಿದ್ದರು. ಆಗ ಜಾಕ್ಸನ್ ಅವರು ಬಾಲಕನ ಕುಟುಂಬದೊಂದಿಗೆ ನ್ಯಾಯಾಲಯದ ಹೊರಗೆ ಸುಮಾರು23 ಮಿಲಿಯನ್ ಡಾಲರ್ ಹಣ ನೀಡಿ ರಾಜಿ ಮಾಡಿಕೊಂಡಿದ್ದರು. ಇದು ಅವರ ಇಮೇಜ್‌ಗೆ ಮೊದಲ ದೊಡ್ಡ ಹೊಡೆತ ನೀಡಿತು.

2003ರಲ್ಲಿ 'ಲಿವಿಂಗ್ ವಿತ್ ಮೈಕಲ್ ಜಾಕ್ಸನ್' ಎಂಬ ಸಾಕ್ಷ್ಯಚಿತ್ರ ಬಿಡುಗಡೆಯಾದ ನಂತರ, ಗೇವಿನ್ ಅರ್ವಿಜೋ ಎಂಬ ಬಾಲಕನಿಗೆ ಕಿರುಕುಳ ನೀಡಿದ ಆರೋಪದ ಮೇಲೆ ಜಾಕ್ಸನ್ ಅವರ ಮೇಲೆ ಮೊಕದ್ದಮೆ ದಾಖಲಾಯಿತು. ಈ ಪ್ರಕರಣ ಇಡೀ ವಿಶ್ವದ ಗಮನ ಸೆಳೆದಿತ್ತು. ದೀರ್ಘಕಾಲದ ವಿಚಾರಣೆಯ ನಂತರ, 2005ರಲ್ಲಿ ನ್ಯಾಯಾಲಯವು ಜಾಕ್ಸನ್ ಅವರನ್ನು ನಿರ್ದೋಷಿ ಎಂದು ಘೋಷಿಸಿತು. ಬಳಿಕ ಮೈಕಲ್ ಜಾಕ್ಸನ್ ಅವರ ಐಷಾರಾಮಿ ನಿವಾಸವಾದ 'ನೆವರ್‌ಲ್ಯಾಂಡ್'ನಲ್ಲಿ ಅವರು ಮಕ್ಕಳಿಗೆ ಲೈಂಗಿಕ ಕಿರುಕುಳ ನೀಡುತ್ತಿದ್ದರು ಎಂಬುದು ಪ್ರಮುಖ ಆರೋಪವಾಗಿತ್ತು. ಅಲ್ಲಿನ ಸೌಲಭ್ಯಗಳು ಮತ್ತು ಮಕ್ಕಳಿಗೆ ನೀಡುತ್ತಿದ್ದ ಅತಿಯಾದ ಸ್ವಾತಂತ್ರ್ಯವನ್ನು ಸಂಶಯದಿಂದ ನೋಡಲಾಗುತ್ತಿತ್ತು. ಜಾಕ್ಸನ್ ಮರಣದ (2009) ಹತ್ತು ವರ್ಷಗಳ ನಂತರ, ಅಂದರೆ 2019ರಲ್ಲಿ ಬಿಡುಗಡೆಯಾದ ಈ ಸಾಕ್ಷ್ಯಚಿತ್ರವು ಮತ್ತೆ ವಿವಾದವನ್ನು ಸ್ಫೋಟಿಸಿತು. ವೇಡ್ ರಾಬ್ಸನ್ ಮತ್ತು ಜೇಮ್ಸ್ ಸೇಫ್‌ಚಕ್ ಎಂಬ ಇಬ್ಬರು ವ್ಯಕ್ತಿಗಳು, ತಾವು ಚಿಕ್ಕವರಿದ್ದಾಗ ಜಾಕ್ಸನ್ ತಮ್ಮ ಮೇಲೆ ವರ್ಷಗಳ ಕಾಲ ಲೈಂಗಿಕ ದೌರ್ಜನ್ಯ ಎಸಗಿದ್ದರು ಎಂದು ಈ ಚಿತ್ರದಲ್ಲಿ ವಿವರಿಸಿದ್ದರು.

ಮೈಕಲ್‌ ನಿಧನದ ನಂತರವೂ ಕೇಳಿಬಂತು ಆರೋಪ

ಪಾಪ್ ಲೋಕದ ದಿವಂಗತ ತಾರೆ ಮೈಕಲ್ ಜಾಕ್ಸನ್ ಅವರ ಅತ್ಯಂತ ಆಪ್ತ ವಲಯದ ಭಾಗವೆಂದು ಗುರುತಿಸಲ್ಪಟ್ಟಿದ್ದ ಕ್ಯಾಸಿಯೊ ಕುಟುಂಬದ ನಾಲ್ವರು ಸದಸ್ಯರು ಈಗ ಗಾಯಕನ ವಿರುದ್ಧ ಗಂಭೀರ ಲೈಂಗಿಕ ದೌರ್ಜನ್ಯದ ಆರೋಪಗಳನ್ನು ಮಾಡಿದ್ದಾರೆ. ಜಾಕ್ಸನ್ ಅವರ "ಎರಡನೇ ಕುಟುಂಬ" ಎಂದೇ ಕರೆಯಲ್ಪಡುತ್ತಿದ್ದ ಈ ಕುಟುಂಬದ ಆಲ್ಡೋ, ಎಡ್ಡೀ, ಡೊಮಿನಿಕ್ ಮತ್ತು ಮೇರಿ ನಿಕೋಲ್ ಕ್ಯಾಸಿಯೊ, ತಮ್ಮ ಬಾಲ್ಯದಲ್ಲಿ ಜಾಕ್ಸನ್ ಅವರಿಂದ ಶೋಷಣೆಗೆ ಒಳಗಾಗಿದ್ದಾಗಿ ಬಹಿರಂಗಪಡಿಸಿದ್ದಾರೆ. ಅಷ್ಟೇ ಅಲ್ಲದೆ, ಈ ಹಿಂದೆ ಕೇಳಿಬಂದಿದ್ದ ಆರೋಪಗಳ ವಿರುದ್ಧ ಜಾಕ್ಸನ್ ಪರವಾಗಿ ಸಾರ್ವಜನಿಕವಾಗಿ ವಾದಿಸಲು ತಮ್ಮನ್ನು ವ್ಯವಸ್ಥಿತವಾಗಿ ಸಿದ್ಧಪಡಿಸಲಾಗಿತ್ತು ಎಂದು ಅವರು ದೂರಿದ್ದಾರೆ.

ದ ನ್ಯೂಯಾರ್ಕ್ ಟೈಮ್ಸ್‌ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಈ ನಾಲ್ವರು ಒಡಹುಟ್ಟಿದವರು ತಮ್ಮ ಕರಾಳ ಅನುಭವಗಳನ್ನು ಹಂಚಿಕೊಂಡಿದ್ದಾರೆ. ಜಾಕ್ಸನ್ ಜೊತೆಗಿನ ತಮ್ಮ ದಶಕಗಳ ಕಾಲದ ಸಂಬಂಧವು ಕೇವಲ ಸ್ನೇಹವಾಗಿರದೆ, ಅದು ಸಂಪೂರ್ಣವಾಗಿ ಕುತಂತ್ರ ಮತ್ತು ಮಾನಸಿಕ ನಿಯಂತ್ರಣದಿಂದ ಕೂಡಿತ್ತು ಎಂದು ಅವರು ಆರೋಪಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಅವರು ಈಗ ಜಾಕ್ಸನ್ ಅವರ ಆಸ್ತಿ ನಿರ್ವಹಣಾ ಮಂಡಳಿಯ (ಎಸ್ಟೇಟ್) ವಿರುದ್ಧ ಕಾನೂನು ಸಮರಕ್ಕೆ ಮುಂದಾಗಿದ್ದಾರೆ. ಇದು ದಶಕಗಳಿಂದ ಜಾಕ್ಸನ್ ಅವರ ನಿಷ್ಠಾವಂತ ಬೆಂಬಲಿಗರಾಗಿದ್ದ ಈ ಕುಟುಂಬದ ನಿಲುವಿನಲ್ಲಿ ಕಂಡುಬಂದಿರುವ ಬಹುದೊಡ್ಡ ಬದಲಾವಣೆಯಾಗಿದೆ.

ಸಂದರ್ಶನದ ವೇಳೆ ಎಡ್ಡೀ ಕ್ಯಾಸಿಯೊ ಮಾತನಾಡಿ, ಜಾಕ್ಸನ್ ನಮ್ಮನ್ನು ಸಂಪೂರ್ಣವಾಗಿ ಬ್ರೈನ್‌ವಾಶ್ ಮಾಡಿದ್ದರು ಎಂದು ತಿಳಿಸಿದ್ದಾರೆ. "ನಾವು ಅವರ ವಿರುದ್ಧ ಎಂದಿಗೂ ದನಿ ಎತ್ತದಂತೆ ಮತ್ತು ಆರೋಪಗಳು ಕೇಳಿಬಂದಾಗ ಅವರನ್ನು ರಕ್ಷಿಸುವಂತೆ ನಮಗೆ ತರಬೇತಿ ನೀಡಲಾಗಿತ್ತು. ಆ ಸಮಯದಲ್ಲಿ ಅದು ನಮಗೆ ನಮ್ಮ ಕರ್ತವ್ಯ ಎಂಬಂತೆ ಬಿಂಬಿಸಲಾಗಿತ್ತು," ಎಂದು ಅವರು ವಿವರಿಸಿದ್ದಾರೆ. ಈ ಕುಟುಂಬಕ್ಕೂ ಜಾಕ್ಸನ್ ಅವರಿಗೂ ಇದ್ದ ಸಂಬಂಧವು 1980ರ ದಶಕದಲ್ಲಿ ಆರಂಭವಾಗಿತ್ತು. ಆಗ ನ್ಯೂಯಾರ್ಕ್‌ನ ಐಷಾರಾಮಿ ಹೋಟೆಲೊಂದರಲ್ಲಿ ಮ್ಯಾನೇಜರ್ ಆಗಿದ್ದ ಡೊಮಿನಿಕ್ ಕ್ಯಾಸಿಯೊ ಅವರ ಪರಿಚಯದಿಂದ ಜಾಕ್ಸನ್ ಮಕ್ಕಳೊಂದಿಗೆ ನಿಕಟ ಸಂಪರ್ಕ ಬೆಳೆಸಿದ್ದರು.

ಆದರೆ ಈ ಕಾನೂನು ಪ್ರಕ್ರಿಯೆಯಲ್ಲಿ ಕುಟುಂಬದ ಎಲ್ಲಾ ಸದಸ್ಯರು ಭಾಗಿಯಾಗಿಲ್ಲ ಎಂಬುದು ಗಮನಾರ್ಹ. ಈ ಹಿಂದೆ ಜಾಕ್ಸನ್ ಕುರಿತು ಸಕಾರಾತ್ಮಕ ಪುಸ್ತಕ ಬರೆದಿದ್ದ ಫ್ರಾಂಕ್ ಕ್ಯಾಸಿಯೊ ಅವರು ಈ ಮೊಕದ್ದಮೆಯಿಂದ ದೂರ ಉಳಿದಿದ್ದಾರೆ. ತಮ್ಮ 2011ರ ಆತ್ಮಚರಿತ್ರೆಯಲ್ಲಿ ಅವರು ಜಾಕ್ಸನ್ ಎಂದಿಗೂ ಮಕ್ಕಳೊಂದಿಗೆ ಅಸಭ್ಯವಾಗಿ ವರ್ತಿಸಿಲ್ಲ ಎಂದು ಬರೆದುಕೊಂಡಿದ್ದರು. ಇದೇ ವೇಳೆ, ದೂರುದಾರ ಒಡಹುಟ್ಟಿದವರು ಮಾತನಾಡಿ, 2019ರ 'ಲೀವಿಂಗ್ ನೆವರ್‌ಲ್ಯಾಂಡ್' ಸಾಕ್ಷ್ಯಚಿತ್ರವನ್ನು ನೋಡಿದ ನಂತರ ತಮಗೆ ಆದ ಅನ್ಯಾಯದ ಅರಿವಾಯಿತು ಮತ್ತು ತಮ್ಮ ಮೌನವನ್ನು ಮುರಿಯಲು ನಿರ್ಧರಿಸಿದೆವು ಎಂದು ಹೇಳಿದ್ದಾರೆ.

ಮೈಕಲ್ ಜಾಕ್ಸನ್ ಅವರು ತಮ್ಮ ಜೀವಿತಾವಧಿಯಲ್ಲಿ ಇಂತಹ ಎಲ್ಲಾ ಆರೋಪಗಳನ್ನು ಸತತವಾಗಿ ನಿರಾಕರಿಸುತ್ತಾ ಬಂದಿದ್ದರು. 2005ರಲ್ಲಿ ನಡೆದ ಸುದೀರ್ಘ ಕ್ರಿಮಿನಲ್ ವಿಚಾರಣೆಯ ನಂತರ ನ್ಯಾಯಾಲಯವು ಅವರನ್ನು ನಿರ್ದೋಷಿ ಎಂದು ಬಿಡುಗಡೆ ಮಾಡಿತ್ತು. ಜಾಕ್ಸನ್ ಅವರ ನಿಧನದ ನಂತರವೂ ಕೇಳಿಬರುತ್ತಿರುವ ಇಂತಹ ಹೊಸ ಆರೋಪಗಳನ್ನು ಅವರ ಎಸ್ಟೇಟ್ ನಿರ್ವಾಹಕರು ತಳ್ಳಿಹಾಕುತ್ತಿದ್ದಾರೆ.