ಗರ್ಭಿಣಿಯಾಗಿದ್ದರೂ 13 ಗಂಟೆ ನೃತ್ಯ ರಿಹರ್ಸಲ್ ನಡೆಸಿದ್ದ ಮಾಧುರಿ ದೀಕ್ಷಿತ್

ಬಾಲಿವುಡ್‌ನ ಸಾರ್ವಕಾಲಿಕ ಹಿಟ್ ಸಿನಿಮಾಗಳಲ್ಲೊಂದಾದ 'ದೇವದಾಸ್' ಚಿತ್ರದ ಐಕಾನಿಕ್ ಹಾಡು 'ಡೋಲಾ ರೇ ಡೋಲಾ' ಚಿತ್ರೀಕರಣದ ಸಮಯದ ಅತ್ಯಂತ ರೋಚಕ ಮತ್ತು ಆಶ್ಚರ್ಯಕರ ವಿಷಯವೊಂದು ಈಗ ಹೊರಬಿದ್ದಿದೆ. ಈ ಹಾಡಿನಲ್ಲಿ ಬಾಲಿವುಡ್‌ನ ಇಬ್ಬರು ಮುಂಚೂಣಿಯ ನಟಿಯರಾದ ಮಾಧುರಿ ದೀಕ್ಷಿತ್ ಮತ್ತು ಐಶ್ವರ್ಯಾ ರೈ ಒಟ್ಟಿಗೆ ಹೆಜ್ಜೆ ಹಾಕಿದ್ದು, ಇಂದಿಗೂ ಇದು ಪ್ರೇಕ್ಷಕರ ನೆಚ್ಚಿನ ನೃತ್ಯಗಳಲ್ಲೊಂದಾಗಿದೆ. ಆದರೆ, ಈ ಅದ್ಭುತ ಹಾಡಿನ ಚಿತ್ರೀಕರಣದ ಹಿಂದೆ ನಟಿ ಮಾಧುರಿ ದೀಕ್ಷಿತ್ ಪಟ್ಟ ಶ್ರಮ ಮತ್ತು ಅವರ ವೃತ್ತಿಪರತೆ ಈಗ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.

ದಿವಂಗತ ಖ್ಯಾತ ನೃತ್ಯ ನಿರ್ದೇಶಕಿ ಸರೋಜ್ ಖಾನ್ ಅವರ ತಂಡದಲ್ಲಿದ್ದ ನೃತ್ಯಗಾರ್ತಿ ರುಬೀನಾ ಖಾನ್ ಇತ್ತೀಚಿನ ಸಂದರ್ಶನವೊಂದರಲ್ಲಿ ಈ ಕುರಿತು ಮಾಹಿತಿ ಹಂಚಿಕೊಂಡಿದ್ದಾರೆ. 'ಡೋಲಾ ರೇ ಡೋಲಾ' ಹಾಡಿನ ಶೂಟಿಂಗ್ ನಡೆಯುತ್ತಿದ್ದಾಗ ಮಾಧುರಿ ದೀಕ್ಷಿತ್ ಅವರು ನಾಲ್ಕು ತಿಂಗಳ ಗರ್ಭಿಣಿಯಾಗಿದ್ದರು. ಅಷ್ಟೇ ಅಲ್ಲದೆ, ಚಿತ್ರೀಕರಣದ ಸಮಯದಲ್ಲಿ ಅವರಿಗೆ ತೀವ್ರ ಜ್ವರ ಇತ್ತು ಮತ್ತು ತಲೆಸುತ್ತು ಬರುತ್ತಿತ್ತು.

ಹಾಡಿನಲ್ಲಿ ಮಾಧುರಿ ದೀಕ್ಷಿತ್ ಅವರು ವೇಗವಾಗಿ ತಿರುಗಿ ಕೆಳಗೆ ಕುಳಿತುಕೊಳ್ಳಬೇಕಾದ ಒಂದು ಕಠಿಣವಾದ ಸ್ಟೆಪ್ ಇತ್ತು. ಗರ್ಭಾವಸ್ಥೆಯ ಕಾರಣದಿಂದಾಗಿ ಅವರಿಗೆ ಆ ಸ್ಟೆಪ್ ಮಾಡಲು ತುಂಬಾ ಕಷ್ಟವಾಗುತ್ತಿತ್ತು. ಆದರೂ ಸಹ, ಆ ಒಂದು ನಿರ್ದಿಷ್ಟ ಹೆಜ್ಜೆಯನ್ನು ಪರಿಪೂರ್ಣವಾಗಿ ಮಾಡಲು ಅವರು ಬೆಳಗ್ಗೆ 9 ಗಂಟೆಯಿಂದ ರಾತ್ರಿ 10 ಗಂಟೆಯವರೆಗೆ ಸತತ 13 ಗಂಟೆಗಳ ಕಾಲ ರಿಹರ್ಸಲ್ ನಡೆಸಿದ್ದರು.

ಸಾಮಾನ್ಯವಾಗಿ ಇಂತಹ ಕಷ್ಟದ ಸಂದರ್ಭಗಳಲ್ಲಿ ಕಲಾವಿದರು ನೃತ್ಯ ನಿರ್ದೇಶಕರಿಗೆ ಸ್ಟೆಪ್ ಬದಲಾಯಿಸುವಂತೆ ವಿನಂತಿಸುತ್ತಾರೆ. ಆದರೆ ಮಾಧುರಿ ದೀಕ್ಷಿತ್ ಮಾತ್ರ ತಮ್ಮ ಗುರು ಸರೋಜ್ ಖಾನ್ ಅವರಿಗೆ ಯಾವುದೇ ಕಾರಣಕ್ಕೂ ಸ್ಟೆಪ್ ಬದಲಾಯಿಸುವಂತೆ ಕೇಳಲಿಲ್ಲ. ಸರೋಜ್ ಖಾನ್ ಅವರು ಹೇಳಿದ ನೃತ್ಯದ ಹೆಜ್ಜೆಗಳನ್ನು ಅಂತಿಮ ಎಂದು ಭಾವಿಸುತ್ತಿದ್ದ ಮಾಧುರಿ, ಎಷ್ಟೇ ದೈಹಿಕ ತೊಂದರೆ ಇದ್ದರೂ ಅದೇ ಸ್ಟೆಪ್ ಅನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದರು ಎಂದು ರುಬೀನಾ ಖಾನ್ ನೆನಪಿಸಿಕೊಂಡಿದ್ದಾರೆ.