Drishyam 3| ಅಜಯ್ ದೇವಗನ್-ಮೋಹನ್ ಲಾಲ್ ನಟನೆಯ ದೃಶ್ಯಂ 3 ಕಥೆ ಬೇರೆ ಬೇರೆ

ಚಿತ್ರರಂಗದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದ್ದ 'ದೃಶ್ಯಂ' ಸರಣಿಯ ಮೂರನೇ ಭಾಗದ ಬಗ್ಗೆ ಚಿತ್ರತಂಡ ಮಹತ್ವದ ಅಪ್‌ಡೇಟ್ ಒಂದನ್ನು ನೀಡಿದೆ. ಮುಂಬರುವ 'ದೃಶ್ಯಂ 3' ಚಿತ್ರದ ಹಿಂದಿ ಹಾಗೂ ಮಲಯಾಳಂ ಆವೃತ್ತಿಗಳು ಒಂದೇ ಸಿನಿಮಾ ವಿಶ್ವದ ಭಾಗವಾಗಿದ್ದರೂ, ವಿಭಿನ್ನ ಕಥಾಹಂದರ ಹಾಗೂ ನಿರೂಪಣೆಯನ್ನು ಹೊಂದಿರಲಿವೆ ಎಂದು ನಿರ್ಮಾಪಕರಾದ ಅಭಿಷೇಕ್ ಪಾಠಕ್ ಮತ್ತು ಕುಮಾರ್ ಮಂಗತ್ ಪಾಠಕ್ ತಿಳಿಸಿದ್ದಾರೆ.

ಇದು ಪ್ರೇಕ್ಷಕರಿಗೆ ಸಂಪೂರ್ಣವಾಗಿ ಭಿನ್ನವಾದ ಸಿನಿಮಾ ಅನುಭವವನ್ನು ನೀಡಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.ಈ ಕುರಿತು ಸಂದರ್ಶನದಲ್ಲಿ ಮಾತನಾಡಿದ ಹಿಂದಿ ಆವೃತ್ತಿಯ ನಿರ್ದೇಶಕ ಮತ್ತು ಲೇಖಕ ಅಭಿಷೇಕ್ ಪಾಠಕ್, ಮಲಯಾಳಂ ಮತ್ತು ಹಿಂದಿ 'ದೃಶ್ಯಂ 3' ಚಿತ್ರಗಳ ಕಥೆಗಳು ಬೇರೆ ಬೇರೆ ದಿಕ್ಕಿನಲ್ಲಿ ಸಾಗಲಿವೆ ಎಂದು ಸ್ಪಷ್ಟಪಡಿಸಿದ್ದಾರೆ. ಮಲಯಾಳಂ ಆವೃತ್ತಿಯು ಭಾವನಾತ್ಮಕ ಕೌಟುಂಬಿಕ ಡ್ರಾಮಾವಾಗಿ ಮೂಡಿಬರಲಿದ್ದರೆ, ಹಿಂದಿ ಆವೃತ್ತಿಯು ಸಂಪೂರ್ಣ ಡ್ರಾಮಾ-ಥ್ರಿಲ್ಲರ್ ಶೈಲಿಯಲ್ಲಿ ಇರಲಿದೆ. ಎರಡು ಆವೃತ್ತಿಗಳಲ್ಲಿ ಆಗಿರುವ ಬದಲಾವಣೆಗಳನ್ನು ಮತ್ತು ಕಥೆಯ ಓಟವನ್ನು ಚಿತ್ರಮಂದಿರದಲ್ಲಿ ವೀಕ್ಷಿಸುವುದು ಪ್ರೇಕ್ಷಕರಿಗೆ ಒಂದು ಮಜಾ ನೀಡಲಿದೆ ಎಂದು ಅವರು ಹೇಳಿದ್ದಾರೆ.

ದೃಶ್ಯಂ ಸಿನಿಮಾದ ಪ್ರಯಾಣವು 2013 ರಲ್ಲಿ ಮೋಹನ್‌ಲಾಲ್ ನಟನೆಯ ಮಲಯಾಳಂ ಚಿತ್ರದ ಮೂಲಕ ಆರಂಭವಾಗಿತ್ತು. ಅದರ ಮುಂದುವರಿದ ಭಾಗವಾಗಿ 2022 ರಲ್ಲಿ ದೃಶ್ಯಂ 2 ಬಿಡುಗಡೆಯಾಗಿತ್ತು. ಇದೀಗ ಜೀತು ಜೋಸೆಫ್ ನಿರ್ದೇಶನದ ಮಲಯಾಳಂ 'ದೃಶ್ಯಂ 3' ಮೇ 21 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲು ಸಿದ್ಧವಾಗಿದೆ. ಮೊದಲ ಭಾಗದ ಭಾರಿ ಯಶಸ್ಸಿನ ನಂತರ ಈ ಚಿತ್ರವು ಕನ್ನಡ, ಹಿಂದಿ, ತಮಿಳು, ತೆಲುಗು ಸೇರಿದಂತೆ ಹಲವು ಭಾಷೆಗಳಿಗೆ ರಿಮೇಕ್ ಆಗಿತ್ತು. ಹಿಂದಿಯಲ್ಲಿ ಅಜಯ್ ದೇವಗನ್ ನಟನೆಯ 'ದೃಶ್ಯಂ' ಚಿತ್ರಗಳು ಭಾರಿ ಯಶಸ್ಸು ಕಂಡಿದ್ದವು.

ಅಜಯ್ ದೇವಗನ್ ನಟನೆಯ ಹಿಂದಿ 'ದೃಶ್ಯಂ 3' ಚಿತ್ರವು ಅಕ್ಟೋಬರ್ 2 ರಂದು ತೆರೆಕಾಣಲಿದ್ದು, ಪ್ರಸ್ತುತ ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದೆ. ಎರಡೂ ಭಾಷೆಗಳ ಚಿತ್ರಕಥೆಯನ್ನು ಸ್ವತಂತ್ರವಾಗಿ ಸಿದ್ಧಪಡಿಸಲಾಗಿದೆ ಎಂದು ತಿಳಿಸಿರುವ ನಿರ್ದೇಶಕರು, ಹಿಂದಿ ಪ್ರೇಕ್ಷಕರ ಅಭಿರುಚಿ ಮತ್ತು ವಿಜಯ್ ಸಾಳಗಾಂವ್ಕರ್ ಪಾತ್ರದಿಂದ ಅವರು ಏನನ್ನು ನಿರೀಕ್ಷಿಸುತ್ತಾರೋ ಅದಕ್ಕೆ ತಕ್ಕಂತೆ ಹಿಂದಿ ಕಥೆಯನ್ನು ಬರೆಯಲಾಗಿದೆ ಎಂದಿದ್ದಾರೆ. ಮಲಯಾಳಂ ಆವೃತ್ತಿಯು ಜೀತು ಜೋಸೆಫ್ ಅವರದೇ ಶೈಲಿಯಲ್ಲಿ ಮೂಡಿಬರಲಿದೆ. 'ದೃಶ್ಯಂ 2' ಹಿಂದಿ ಆವೃತ್ತಿಯಲ್ಲೂ ಕೆಲವು ಬದಲಾವಣೆಗಳನ್ನು ಮಾಡಲಾಗಿತ್ತು ಮತ್ತು ಅದನ್ನು ಪ್ರೇಕ್ಷಕರು ಮೆಚ್ಚಿಕೊಂಡಿದ್ದರು. ಅದೇ ರೀತಿ ಈ ಮೂರನೇ ಭಾಗದಲ್ಲೂ ಚಿತ್ರಕಥೆಯಲ್ಲಿ ಸಾಕಷ್ಟು ಪ್ರಮುಖ ಬದಲಾವಣೆಗಳನ್ನು ಮಾಡಲಾಗಿದ್ದು, ಟ್ರೈಲರ್ ಬಿಡುಗಡೆಯಾದಾಗ ಪ್ರೇಕ್ಷಕರಿಗೆ ಇದರ ವ್ಯತ್ಯಾಸ ತಿಳಿಯಲಿದೆ ಎಂದು ಚಿತ್ರತಂಡ ಹೇಳಿದೆ.