Allu Arjun| ಅಟ್ಲೀ-ಅಲ್ಲು ಅರ್ಜುನ್ ಜೋಡಿಯ 'ರಾಕಾ': ಎಐ ಪೋಸ್ಟರ್ ವೈರಲ್, ಫ್ಯಾನ್ಸ್ ಫಿದಾ !

ನಟ ಅಲ್ಲು ಅರ್ಜುನ್ ಮತ್ತು ನಿರ್ದೇಶಕ ಅಟ್ಲೀ ಕಾಂಬಿನೇಷನ್‌ನ 'ರಾಕಾ' ಚಿತ್ರದ ಫಸ್ಟ್ ಲುಕ್ ಸೋಶಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ ಆಗಿದ್ದು, ಅಭಿಮಾನಿಗಳನ್ನು ಮಂತ್ರಮುಗ್ಧಗೊಳಿಸಿದೆ. ನಟನ ಹುಟ್ಟುಹಬ್ಬದ ಅಂಗವಾಗಿ ಬಿಡುಗಡೆಯಾದ ಈ ಪೋಸ್ಟರ್‌ನಲ್ಲಿ ಅಲ್ಲು ಅರ್ಜುನ್ ಅತ್ಯಂತ ರಗಡ್ ಮತ್ತು ತೀವ್ರವಾದ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದು, ಸಿನಿಮಾ ಬಗ್ಗೆ ಭಾರೀ ಕುತೂಹಲ ಮೂಡಿಸಿದೆ.

ಮೊದಲು ಬಿಡುಗಡೆಯಾದ ಪೋಸ್ಟರ್‌ನಲ್ಲಿ ನಟನ ಮುಖ ಮತ್ತು ತೋಳಿನ ಭಾಗ ಮಾತ್ರ ಕಂಡುಬಂದಿದ್ದು, ಅಭಿಮಾನಿಗಳು ತಮ್ಮದೇ ಆದ ರೀತಿಯಲ್ಲಿ ಕಲ್ಪನೆ ಮಾಡಿಕೊಳ್ಳುತ್ತಿದ್ದರು. ಈ ನಡುವೆ ಸೆಟ್‌ನಿಂದ ಲೀಕ್ ಆಗಿದೆ ಎನ್ನಲಾದ ಕೆಲವೊಂದು ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಇದರಲ್ಲಿ ಅಲ್ಲು ಅರ್ಜುನ್ ತುಪ್ಪಳ( ಪ್ರಾಣಿಗಳ ಮೃದುವಾದ ರೋಮ) ಮತ್ತು ಉಗುರುಗಳಿರುವ ವೇಷಭೂಷಣದಲ್ಲಿ ಕಾಣಿಸಿಕೊಂಡಿದ್ದಾರೆ. ಆದರೆ ಈ ಫೋಟೋಗಳು ಕೃತಕ ಬುದ್ಧಿಮತ್ತೆ ಅಥವಾ ಎಐ ಮೂಲಕ ಸೃಷ್ಟಿಸಲಾದ ಚಿತ್ರಗಳೆಂದು ದೃಢಪಟ್ಟಿದೆ. ಈ ಚಿತ್ರಗಳನ್ನು ಹಂಚಿಕೊಂಡ ಇನ್‌ಸ್ಟಾಗ್ರಾಮ್ ಖಾತೆಯು ಇವು ಎಐ ಸೃಷ್ಟಿತ ಚಿತ್ರಗಳೆಂದು ಸ್ಪಷ್ಟಪಡಿಸಿದೆ.

ಅಲ್ಲು ಅರ್ಜುನ್ ಅವರ ಈ ವಿನೂತನ ಲುಕ್ ಅನ್ನು ಕಂಡ ಸಿನಿಪ್ರಿಯರು ಇದನ್ನು ಕಾರ್ತಿ ನಟನೆಯ 'ಕಾಶ್ಮೋರಾ' ಚಿತ್ರದ ಲುಕ್‌ಗೆ ಹೋಲಿಸುತ್ತಿದ್ದಾರೆ. ಇನ್ನು ಕೆಲವರು ಸೂರ್ಯ ಅಭಿನಯದ 'ಕಂಗುವಾ' ಚಿತ್ರದ ಕಾಸ್ಟ್ಯೂಮ್ ಮತ್ತು ಬಾಹುಬಲಿ ಚಿತ್ರದ ವಿಲನ್ ಪಾತ್ರಗಳಿಗೂ ಇದನ್ನು ಹೋಲಿಸಿ ಚರ್ಚಿಸುತ್ತಿದ್ದಾರೆ. ಇದಲ್ಲದೆ ಈ ಚಿತ್ರದಲ್ಲಿ ಬಾಲಿವುಡ್ ಬಾದ್‌ಶಾ ಶಾರುಖ್ ಖಾನ್ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಗಾಳಿ ಸುದ್ದಿಯೂ ಹಬ್ಬಿದೆ.

ನಿರ್ದೇಶಕ ಅಟ್ಲೀ ಅವರು ಈ ಚಿತ್ರದ ಬಗ್ಗೆ ಭಾವುಕವಾಗಿ ಮಾತನಾಡಿದ್ದು, 'ರಾಕಾ' ಕೇವಲ ಒಂದು ಸಿನಿಮಾವಲ್ಲ, ಇದು ನನ್ನ 18 ವರ್ಷಗಳ ಕನಸು ಎಂದು ಹೇಳಿದ್ದಾರೆ. ಈ ಚಿತ್ರದಲ್ಲಿ ನಟಿ ದೀಪಿಕಾ ಪಡುಕೋಣೆ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಳ್ಳುತ್ತಿದ್ದು, ಇದು ಅಲ್ಲು ಅರ್ಜುನ್ ಮತ್ತು ಅಟ್ಲೀ ಅವರ ಮೊದಲ ಸಿನಿಮಾವಾಗಿದೆ.