11ನೇ ತರಗತಿಯಲ್ಲೇ ಓದು ಬಿಟ್ಟಿದ್ದಕ್ಕೆ ಪಶ್ಚಾತ್ತಾಪ: ನಟಿ ಕರೀನಾ ಕಪೂರ್

ಬಾಲಿವುಡ್ ನಟಿ ಕರೀನಾ ಕಪೂರ್ ಅವರು 11ನೇ ತರಗತಿಯ ಬಳಿಕ ಶಿಕ್ಷಣ ತೊರೆದು ಚಿತ್ರರಂಗಕ್ಕೆ ಕಾಲಿಟ್ಟ ನಿರ್ಧಾರದ ಬಗ್ಗೆ ಇದೀಗ ಪಶ್ಚಾತ್ತಾಪ ವ್ಯಕ್ತಪಡಿಸಿದ್ದಾರೆ. ನಟಿಯಾಗಬೇಕೆಂಬ ಕನಸನ್ನು ಬೆನ್ಹತ್ತಲು ಶಿಕ್ಷಣವನ್ನು ಅರ್ಧದಲ್ಲೇ ನಿಲ್ಲಿಸಿದ್ದಾಗಿ ಅವರು ಹೇಳಿದ್ದಾರೆ.

ಹನುಮಾನ್ ದಾಸ್ ಅವರ ಪಾಡ್‌ಕಾಸ್ಟ್‌ನಲ್ಲಿ ಮಾತನಾಡಿದ ಕರೀನಾ, ಶಿಕ್ಷಣವನ್ನು ಪೂರ್ಣಗೊಳಿಸದಿರುವುದು ತಮ್ಮ ಜೀವನದ ಪ್ರಮುಖ ವಿಷಾದಗಳಲ್ಲಿ ಒಂದಾಗಿದೆ ಎಂದು ತಿಳಿಸಿದ್ದಾರೆ. ಅವಕಾಶವಿದ್ದರೂ ಸಿನಿಮಾಗೆ ಪ್ರವೇಶಿಸಿದ ಕಾರಣ 11ನೇ ತರಗತಿಯ ನಂತರ ಓದನ್ನು ಮುಂದುವರಿಸಲು ಸಾಧ್ಯವಾಗಲಿಲ್ಲ ಎಂದು ಅವರು ಹೇಳಿದ್ದಾರೆ.

ಮಕ್ಕಳ ಶಿಕ್ಷಣಕ್ಕೆ ಕರೀನಾ ಹೆಚ್ಚು ಒತ್ತು

ತಾವು ಶಿಕ್ಷಣ ಪೂರ್ಣಗೊಳಿಸದಿರುವ ಅನುಭವದಿಂದಾಗಿ ತಮ್ಮ ಪುತ್ರರಾದ ತೈಮೂರ್ ಮತ್ತು ಜೇಹ್ ಅವರ ಶಿಕ್ಷಣಕ್ಕೆ ಹೆಚ್ಚಿನ ಆದ್ಯತೆ ನೀಡುತ್ತಿರುವುದಾಗಿ ಕರೀನಾ ಹೇಳಿದ್ದಾರೆ. ಮಕ್ಕಳು ಮೊದಲು ತಮ್ಮ ಶಿಕ್ಷಣವನ್ನು ಪೂರ್ಣಗೊಳಿಸಿ, ಬಳಿಕ ತಮ್ಮ ಆಸಕ್ತಿಯ ಕ್ಷೇತ್ರವನ್ನು ಆಯ್ಕೆ ಮಾಡಿಕೊಳ್ಳಬೇಕು ಎಂಬುದು ತಮ್ಮ ಆಶಯ ಎಂದು ತಿಳಿಸಿದ್ದಾರೆ.

ಭಾರತದಲ್ಲಿ ಹೆಣ್ಣುಮಕ್ಕಳ ಶಿಕ್ಷಣಕ್ಕಾಗಿ ಯುನಿಸೆಫ್ ನಡೆಸುತ್ತಿರುವ ಕಾರ್ಯಗಳೊಂದಿಗೆ ತಮಗೆ ವಿಶೇಷ ನಂಟು ಇದೆ ಎಂದು ಕರೀನಾ ಹೇಳಿದ್ದಾರೆ. 2014ರಿಂದ ಯುನಿಸೆಫ್ ಇಂಡಿಯಾದೊಂದಿಗೆ ಗುರುತಿಸಿಕೊಂಡಿರುವ ಅವರು, ಹೆಣ್ಣುಮಕ್ಕಳ ಶಿಕ್ಷಣ, ಲಿಂಗ ಸಮಾನತೆ ಹಾಗೂ ಮಕ್ಕಳಿಗೆ ಗುಣಮಟ್ಟದ ಶಿಕ್ಷಣ ದೊರೆಯುವ ಕುರಿತು ಜಾಗೃತಿ ಮೂಡಿಸುತ್ತಿದ್ದಾರೆ.

‘ರೆಫ್ಯೂಜಿ’ ಮೂಲಕ ಬಾಲಿವುಡ್ ಪ್ರವೇಶ

ಕರೀನಾ ಕಪೂರ್ ಅವರು ಜೆ.ಪಿ. ದತ್ತಾ ನಿರ್ದೇಶನದ ರೆಫ್ಯೂಜಿ ಚಿತ್ರದ ಮೂಲಕ 2000ರಲ್ಲಿ ಬಾಲಿವುಡ್‌ಗೆ ಪದಾರ್ಪಣೆ ಮಾಡಿದರು. ಜೂನ್ 30, 2000ರಂದು ಬಿಡುಗಡೆಯಾದ ಈ ಚಿತ್ರದಲ್ಲಿ ಅಭಿಷೇಕ್ ಬಚ್ಚನ್ ನಾಯಕನಾಗಿ ನಟಿಸಿದ್ದರು. ಚಿತ್ರರಂಗದ ಎರಡು ಪ್ರಮುಖ ಕುಟುಂಬಗಳಾದ ಕಪೂರ್ ಮತ್ತು ಬಚ್ಚನ್ ಕುಟುಂಬಗಳ ಮುಂದಿನ ತಲೆಮಾರಿನ ಕಲಾವಿದರಾಗಿ ಇಬ್ಬರ ಚೊಚ್ಚಲ ಪ್ರವೇಶ ಭಾರಿ ಗಮನ ಸೆಳೆದಿತ್ತು.

ಸೆಪ್ಟೆಂಬರ್ 18ಕ್ಕೆ ‘ದಾಯ್ರಾ’ ಬಿಡುಗಡೆ

ಕರೀನಾ ಕಪೂರ್ ಇದೀಗ ಮೇಘನಾ ಗುಲ್ಜಾರ್ ನಿರ್ದೇಶನದ ದಾಯ್ರಾ ಚಿತ್ರದ ಮೂಲಕ ತೆರೆ ಮೇಲೆ ಬರಲು ಸಜ್ಜಾಗಿದ್ದಾರೆ. ಕ್ರೈಂ ಥ್ರಿಲ್ಲರ್ ಕಥಾಹಂದರದ ಈ ಚಿತ್ರದಲ್ಲಿ ಕರೀನಾ ಮತ್ತು ಪೃಥ್ವಿರಾಜ್ ಸುಕುಮಾರನ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ನೈಜ ಘಟನೆಗಳಿಂದ ಪ್ರೇರಿತವಾಗಿರುವ ಈ ಚಿತ್ರವನ್ನು ಜಂಗ್ಲೀ ಪಿಕ್ಚರ್ಸ್ ಮತ್ತು ಪೆನ್ ಸ್ಟುಡಿಯೋಸ್ ನಿರ್ಮಿಸಿವೆ. ಚಿತ್ರ ಸೆಪ್ಟೆಂಬರ್ 18ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.