'ಲಗಾನ್' ಚಿತ್ರಕ್ಕೆ 25 ವರ್ಷ: ಲಂಡನ್‌ನಲ್ಲಿ ಮುಖಾಮುಖಿಯಾದ ಆಮೀರ್ ಖಾನ್‌–ರೇಚಲ್ ಶೆಲ್ಲಿ

ಭಾರತೀಯ ಚಿತ್ರರಂಗದ ಇತಿಹಾಸದಲ್ಲಿ ಮೈಲಿಗಲ್ಲು ಸೃಷ್ಟಿಸಿದ್ದ ‘ಲಗಾನ್’ ಸಿನಿಮಾ ಬಿಡುಗಡೆಯಾಗಿ 25 ವರ್ಷಗಳು ಪೂರೈಸಿರುವ ಹಿನ್ನೆಲೆಯಲ್ಲಿ, ಚಿತ್ರದ ಪ್ರಮುಖ ಪಾತ್ರಧಾರಿಗಳಾದ ಬಾಲಿವುಡ್ ನಟ ಆಮೀರ್ ಖಾನ್ ಮತ್ತು ಬ್ರಿಟಿಷ್ ನಟಿ ರೇಚಲ್ ಶೆಲ್ಲಿ ಲಂಡನ್‌ನಲ್ಲಿ ಭೇಟಿಯಾಗಿದ್ದಾರೆ.

ಲಂಡನ್ ಇಂಡಿಯನ್ ಫಿಲ್ಮ್ ಫೆಸ್ಟಿವಲ್ (LIFF) ಸಂದರ್ಭದಲ್ಲಿ ನಡೆದ ವಿಶೇಷ ಪ್ರದರ್ಶನದ ವೇಳೆ ಈ ಅಪೂರ್ವ ಪುನರ್ಮಿಲನ ನಡೆದಿದೆ.

25 ವರ್ಷಗಳ ಬಳಿಕ ಭೇಟಿ

ಆಶುತೋಷ್ ಗೋವಾರಿಕರ್ ನಿರ್ದೇಶನದಲ್ಲಿ 2001ರಲ್ಲಿ ತೆರೆಕಂಡಿದ್ದ ‘ಲಗಾನ್’ ಕ್ರೀಡಾ ಆಧಾರಿತ ಐತಿಹಾಸಿಕ ಕಥಾಹಂದರ ಹೊಂದಿತ್ತು. ಚಿತ್ರದಲ್ಲಿ ಬ್ರಿಟಿಷ್ ಅಧಿಕಾರಿ ಕ್ಯಾಪ್ಟನ್ ರಸೆಲ್ ಸಹೋದರಿ ‘ಎಲಿಜಬೆತ್ ರಸೆಲ್’ ಪಾತ್ರದಲ್ಲಿ ರೇಚಲ್ ಶೆಲ್ಲಿ ನಟಿಸಿದ್ದರು. ಭಾರತದ ಗ್ರಾಮಸ್ಥರಿಗೆ ಕ್ರಿಕೆಟ್ ನಿಯಮಗಳನ್ನು ಕಲಿಸಿಕೊಡುವ ಹಾಗೂ ನಾಯಕ ಭುವನ್ (ಆಮೀರ್ ಖಾನ್) ಮೇಲೆ ಮೂಕ ಪ್ರೀತಿ ಹೊಂದುವ ಅವರ ಪಾತ್ರ ಭಾರತೀಯ ಪ್ರೇಕ್ಷಕರ ಮನಗೆದ್ದಿತ್ತು. ಸಿನಿಮಾ ಬಿಡುಗಡೆಯಾದ ಕಾಲು ಶತಮಾನದ ಬಳಿಕ ಈ ಇಬ್ಬರು ಕಲಾವಿದರು ಸಾರ್ವಜನಿಕ ವೇದಿಕೆಯಲ್ಲಿ ಒಂದಾಗಿ ಕಾಣಿಸಿಕೊಂಡಿದ್ದಾರೆ.

ಸೋಶಿಯಲ್ ಮೀಡಿಯಾದಲ್ಲಿ ಚಿತ್ರಗಳು ವೈರಲ್

ತಮ್ಮ ಭೇಟಿಯ ಕುರಿತು ನಟಿ ರೇಚಲ್ ಶೆಲ್ಲಿ ಇನ್‌ಸ್ಟಾಗ್ರಾಮ್‌ನಲ್ಲಿ ಫೋಟೊಗಳನ್ನು ಹಂಚಿಕೊಂಡಿದ್ದಾರೆ. ಕೆಂಪು ಹಾಸಿನ ಮೇಲೆ ಆಮೀರ್ ಖಾನ್ ಅವರನ್ನು ಆಲಂಗಿಸಿಕೊಂಡು ಪೋಸ್ ನೀಡಿದ್ದ ಫೋಟೊಗಳನ್ನು ಹಂಚಿಕೊಂಡಿರುವ ಅವರು, "ಲಗಾನ್‌ಗೆ 25 ವರ್ಷಗಳ ಸಂಭ್ರಮ. ಭಾನುವಾರ ಬೆಳಗಿನ ಈ ಸುಂದರ ಆಚರಣೆಗಾಗಿ ಆಮೀರ್ ಖಾನ್ ಪ್ರೊಡಕ್ಷನ್ಸ್‌ಗೆ ಧನ್ಯವಾದಗಳು" ಎಂದು ಬರೆದುಕೊಂಡಿದ್ದಾರೆ.

ಕಾರ್ಯಕ್ರಮದಲ್ಲಿ ಆಮೀರ್ ಖಾನ್ ನೀಲಿ ಬಣ್ಣದ ಟಿ-ಶರ್ಟ್ ಮತ್ತು ಜೀನ್ಸ್ ಧರಿಸಿ ಸರಳವಾಗಿ ಕಾಣಿಸಿಕೊಂಡರೆ, ರೇಚಲ್ ಬಿಳಿ ಬಣ್ಣದ ಗೌನ್‌ನಲ್ಲಿ ಮಿಂಚಿದರು. ಚಿತ್ರದ ವಿಶೇಷ ಪ್ರದರ್ಶನದ ನಂತರ ನಡೆದ ಸಂವಾದದಲ್ಲೂ ಆಮೀರ್ ಖಾನ್ ಭಾಗವಹಿಸಿದ್ದರು.

ಭಾರತದ ಮರುಮಿಲನಕ್ಕೆ ಗೈರಾಗಿದ್ದ ರೇಚಲ್

ಕಳೆದ ತಿಂಗಳು ಮುಂಬೈನಲ್ಲಿ ಚಿತ್ರತಂಡ ಹಮ್ಮಿಕೊಂಡಿದ್ದ 25ನೇ ವರ್ಷದ ಬೆಳ್ಳಿ ಹಬ್ಬದ ಸಂಭ್ರಮಾಚರಣೆಗೆ ರೇಚಲ್ ಶೆಲ್ಲಿ ಅವರಿಗೆ ಬರಲು ಸಾಧ್ಯವಾಗಿರಲಿಲ್ಲ. ಆದರೆ, ಲಂಡನ್‌ನಲ್ಲಿ ನಡೆದ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಆಮೀರ್ ಖಾನ್ ಅವರನ್ನು ಭೇಟಿಯಾಗುವ ಮೂಲಕ ಆ ಕೊರತೆಯನ್ನು ನೀಗಿಸಿಕೊಂಡಿದ್ದಾರೆ.

ಈ ಫೋಟೊಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಸಿನಿಮಾ ಪ್ರೇಕ್ಷಕರಲ್ಲಿ ಹಳೆಯ ನೆನಪುಗಳನ್ನು ಮರುಕಳಿಸುವಂತೆ ಮಾಡಿದೆ.