32 ವರ್ಷಗಳ ಬಳಿಕ ಮತ್ತೆ ತೆರೆಗೆ '1942: ಎ ಲವ್ ಸ್ಟೋರಿ'- ಆಗಸ್ಟ್ 21ಕ್ಕೆ ರೀ-ರಿಲೀಸ್

ಬಾಲಿವುಡ್‌ನ ನಿರ್ದೇಶಕ ವಿಧು ವಿನೋದ್ ಚೋಪ್ರಾ ಅವರ ನಿರ್ದೇಶನದ ಸೂಪರ್‌ಹಿಟ್ ಚಿತ್ರ '1942: ಎ ಲವ್ ಸ್ಟೋರಿ' ಮತ್ತೆ ದೊಡ್ಡ ಪರದೆಗೆ ಮರಳುತ್ತಿದೆ. 1994ರಲ್ಲಿ ಬಿಡುಗಡೆಯಾಗಿ ಪ್ರೇಕ್ಷಕರ ಮನಗೆದ್ದ ಈ ಕ್ಲಾಸಿಕ್ ಸಿನಿಮಾ ಆಗಸ್ಟ್ 21ರಂದು ದೇಶಾದ್ಯಂತ ಮರುಬಿಡುಗಡೆಯಾಗಲಿದೆ. ಚಿತ್ರವನ್ನು ಅತ್ಯಾಧುನಿಕ 8K ರೆಸ್ಟೋರೇಷನ್ ಹಾಗೂ ರಿಮಾಸ್ಟರ್ಡ್ 5.1 ಸರೌಂಡ್ ಸೌಂಡ್ ತಂತ್ರಜ್ಞಾನದೊಂದಿಗೆ ಪ್ರೇಕ್ಷಕರ ಮುಂದೆ ತರಲಾಗುತ್ತಿದೆ. ಪಿವಿಆರ್-ಐನಾಕ್ಸ್ ಹಾಗೂ ವಿನೋದ್ ಚೋಪ್ರಾ ಫಿಲ್ಮ್ಸ್ ಈ ವಿಶೇಷ ಮರುಬಿಡುಗಡೆಯನ್ನು ಆಯೋಜಿಸುತ್ತಿವೆ.

ಅನಿಲ್ ಕಪೂರ್, ಮನೀಷಾ ಕೊಯಿರಾಲಾ ಹಾಗೂ ಜಾಕಿ ಶ್ರಾಫ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಈ ಸಿನಿಮಾ ಭಾರತದ ಸ್ವಾತಂತ್ರ್ಯ ಹೋರಾಟದ ಹಿನ್ನೆಲೆಯಲ್ಲಿನ ಪ್ರೇಮಕಥೆಯನ್ನು ತೆರೆದಿಡುತ್ತದೆ. ಪ್ರೇಮ, ತ್ಯಾಗ, ದೇಶಭಕ್ತಿ ಮತ್ತು ಬಂಡಾಯದ ಭಾವನೆಗಳನ್ನು ಒಂದೇ ಕಥೆಯಲ್ಲಿ ಮನಮುಟ್ಟುವಂತೆ ಕಟ್ಟಿಕೊಟ್ಟಿರುವ ಈ ಚಿತ್ರ ಭಾರತೀಯ ಸಿನಿ ಇತಿಹಾಸದಲ್ಲಿ ವಿಶೇಷ ಸ್ಥಾನ ಪಡೆದಿದೆ.

8K ರೆಸ್ಟೋರೇಷನ್‌ಗೆ ಅಂತರರಾಷ್ಟ್ರೀಯ ಸಹಕಾರ

ಚಿತ್ರದ ಮರುಸ್ಥಾಪನೆ (ರೆಸ್ಟೋರೇಷನ್) ಕಾರ್ಯವನ್ನು ಭಾರತದ ಪ್ರಸಾದ್ ಲ್ಯಾಬ್ಸ್ ಹಾಗೂ ಇಟಲಿಯ ಬೊಲೊನಿಯಾದ ವಿಶ್ವಪ್ರಸಿದ್ಧ L'Immagine Ritrovata ಸಂಸ್ಥೆಯ ಸಹಯೋಗದಲ್ಲಿ ಪೂರ್ಣಗೊಳಿಸಲಾಗಿದೆ. ಚಿತ್ರದ ದೃಶ್ಯ ಗುಣಮಟ್ಟವನ್ನು 8Kಗೆ ಮೇಲ್ದರ್ಜೆಗೇರಿಸಲಾಗಿದ್ದು, ಧ್ವನಿ ಅನುಭವವನ್ನು 5.1 ಸರೌಂಡ್ ಸಿಸ್ಟಮ್‌ನಲ್ಲಿ ಮರುರೂಪಿಸಲಾಗಿದೆ.

'ಅಂದು ಡಾಲ್ಬಿ ವ್ಯವಸ್ಥೆಯೇ ಇರಲಿಲ್ಲ' ಎಂದ ವಿಧು ವಿನೋದ್ ಚೋಪ್ರಾ

ಚಿತ್ರದ ಮರುಬಿಡುಗಡೆ ಕುರಿತು ಮಾತನಾಡಿದ ವಿಧು ವಿನೋದ್ ಚೋಪ್ರಾ, 1994ರಲ್ಲಿ ಭಾರತದಲ್ಲಿ ಡಾಲ್ಬಿ ಸೌಂಡ್ ವ್ಯವಸ್ಥೆ ಸರಿಯಾಗಿ ಲಭ್ಯವಿರಲಿಲ್ಲ ಎಂದು ನೆನಪಿಸಿಕೊಂಡಿದ್ದಾರೆ. ಈ ಚಿತ್ರವೇ ಭಾರತದಲ್ಲಿ ಡಾಲ್ಬಿ ಸ್ಟೀರಿಯೋ ಸೌಂಡ್ ಬಳಕೆ ಮಾಡಿದ ಮೊದಲ ಹಿಂದಿ ಸಿನಿಮಾ ಎಂದು ಅವರು ತಿಳಿಸಿದ್ದಾರೆ.

ಲಂಡನ್‌ನಲ್ಲಿ ಚಿತ್ರದ ಸೌಂಡ್ ಮಿಕ್ಸಿಂಗ್ ಮಾಡಿಸಿದ್ದರೂ, ಭಾರತದಲ್ಲಿ ಯಾವುದೇ ಚಿತ್ರಮಂದಿರ ಡಾಲ್ಬಿ ತಂತ್ರಜ್ಞಾನಕ್ಕೆ ಸಿದ್ಧವಾಗಿರಲಿಲ್ಲ. ವಿಶೇಷ ಕೇಬಲ್‌ಗಳು ಮತ್ತು ಸರೌಂಡ್ ಸ್ಪೀಕರ್‌ಗಳನ್ನು ಅಳವಡಿಸಿ ಮುಂಬೈನ ಮೆಟ್ರೋ ಚಿತ್ರಮಂದಿರದಲ್ಲಿ ಮೊದಲ ಬಾರಿಗೆ ಡಾಲ್ಬಿ ಸೌಂಡ್‌ನಲ್ಲಿ ಸಿನಿಮಾ ಪ್ರದರ್ಶಿಸಲಾಗಿತ್ತು ಎಂದು ಅವರು ಹೇಳಿದ್ದಾರೆ. ಈಗ ಚಿತ್ರವನ್ನು ತಾವು ಮೂಲತಃ ಕಲ್ಪಿಸಿಕೊಂಡಿದ್ದ ದೃಶ್ಯ ಮತ್ತು ಧ್ವನಿ ಗುಣಮಟ್ಟದಲ್ಲೇ ಪ್ರೇಕ್ಷಕರು ಅನುಭವಿಸಬಹುದು ಎಂದು ಚೋಪ್ರಾ ಹೇಳಿದ್ದಾರೆ.

ಆರ್‌.ಡಿ. ಬರ್ಮನ್ ಅವರ ಕೊನೆಯ ಅಮರ ಸಂಗೀತ

ಈ ಸಿನಿಮಾ ದಿಗ್ಗಜ ಸಂಗೀತ ನಿರ್ದೇಶಕ ಆರ್‌.ಡಿ. ಬರ್ಮನ್ ಅವರ ಕೊನೆಯ ಚಿತ್ರವಾಗಿದ್ದು, ಸಿನಿಮಾ ಬಿಡುಗಡೆಯಾಗುವ ಕೆಲ ತಿಂಗಳ ಮುನ್ನವೇ ಅವರು ನಿಧನರಾಗಿದ್ದರು. ಜಾವೇದ್ ಅಖ್ತರ್ ಸಾಹಿತ್ಯ ಬರೆದ ಹಾಡುಗಳು ಇಂದಿಗೂ ಸಂಗೀತಪ್ರಿಯರ ಮನಸ್ಸಿನಲ್ಲಿ ಉಳಿದಿವೆ.

ಚಿತ್ರದಲ್ಲಿ ಅನುಪಮ್ ಖೇರ್, ಡ್ಯಾನಿ ಡೆಂಜೋಂಗ್ಪಾ ಸೇರಿದಂತೆ ಹಲವು ಪ್ರಮುಖ ಕಲಾವಿದರು ಅಭಿನಯಿಸಿದ್ದಾರೆ. ಕಥೆಯನ್ನು ಕಾಮ್ನಾ ಚಂದ್ರಾ, ಶಿವ್ ಕುಮಾರ್ ಸುಬ್ರಹ್ಮಣ್ಯಂ ಹಾಗೂ ವಿಧು ವಿನೋದ್ ಚೋಪ್ರಾ ಬರೆದಿದ್ದು, ಚಿತ್ರಕಥೆಯನ್ನು ಸಂಜಯ್ ಲೀಲಾ ಬನ್ಸಾಲಿ, ಶಿವ್ ಕುಮಾರ್ ಸುಬ್ರಹ್ಮಣ್ಯಂ ಮತ್ತು ವಿಧು ವಿನೋದ್ ಚೋಪ್ರಾ ರಚಿಸಿದ್ದಾರೆ.

ಹೊಸ ತಲೆಮಾರಿಗೆ ಅಪರೂಪದ ಅವಕಾಶ

ಪಿವಿಆರ್-ಐನಾಕ್ಸ್‌ನ ಲೀಡ್ ಸ್ಟ್ರಾಟಜಿಸ್ಟ್ ನಿಹಾರಿಕಾ ಬಿಜ್ಲಿ ಮಾತನಾಡಿ, '1942: ಎ ಲವ್ ಸ್ಟೋರಿ' ಭಾರತೀಯ ಸಿನಿಮಾದ ಅತ್ಯಂತ ಮಹತ್ವದ ಸಂಗೀತ ಹಾಗೂ ಸಿನಿ ಮೈಲಿಗಲ್ಲುಗಳಲ್ಲಿ ಒಂದಾಗಿದೆ. ಚಿತ್ರಮಂದಿರದಲ್ಲಿ ಈ ಸಿನಿಮಾವನ್ನು ನೋಡಲು ಅವಕಾಶ ಸಿಗದ ಯುವ ಪ್ರೇಕ್ಷಕರಿಗೆ ಇದೀಗ ಅದನ್ನು ಅತ್ಯುತ್ತಮ ಗುಣಮಟ್ಟದಲ್ಲಿ ಅನುಭವಿಸುವ ಅಪರೂಪದ ಅವಕಾಶ ಸಿಗಲಿದೆ ಎಂದು ಹೇಳಿದ್ದಾರೆ.