ಬೆಂಗಳೂರಿನ ಉದ್ಯಮಿಯೊಬ್ಬರು ವಾಟ್ಸಾಪ್ನಲ್ಲಿ ಬಂದ ಮದುವೆ ಆಮಂತ್ರಣದ APK ಫೈಲ್ ಡೌನ್ಲೋಡ್ ಮಾಡಿ 5 ಲಕ್ಷ ರೂ. ಕಳೆದುಕೊಂಡಿದ್ದಾರೆ.
ವಾಟ್ಸಾಪ್ನಲ್ಲಿ ಬಂದ ಮದುವೆ ಕಾರ್ಡ್ ಡೌನ್ಲೋಡ್ ಮಾಡಿ 5 ಲಕ್ಷ ಕಳೆದುಕೊಂಡ ಉದ್ಯಮಿ
ಬೆಂಗಳೂರಿನ ಉದ್ಯಮಿಯೊಬ್ಬರು ವಾಟ್ಸಾಪ್ನಲ್ಲಿ ಬಂದ ಮದುವೆ ಆಮಂತ್ರಣದ APK ಫೈಲ್ ಡೌನ್ಲೋಡ್ ಮಾಡಿ 5 ಲಕ್ಷ ರೂ. ಕಳೆದುಕೊಂಡಿದ್ದಾರೆ. ಸೈಬರ್ ವಂಚನೆಯ ಈ ಹೊಸ ಜಾಲದ ಬಗ್ಗೆ ಎಚ್ಚರದಿಂದಿರಿ.
ಸಿಲಿಕಾನ್ ಸಿಟಿಯಲ್ಲಿ ಸೈಬರ್ ವಂಚಕರು ಹೊಸ ಮಾದರಿಯ ಸ್ಕ್ಯಾಮ್ ಮೂಲಕ ಅಮಾಯಕರನ್ನು ಬಲೆಗೆ ಬೀಳಿಸುತ್ತಿದ್ದಾರೆ. ಇತ್ತೀಚೆಗೆ ನಗರದ ಉದ್ಯಮಿಯೊಬ್ಬರು ವಾಟ್ಸಾಪ್ನಲ್ಲಿ ಬಂದ ಮದುವೆಯ ಆಮಂತ್ರಣ ಪತ್ರಿಕೆಯ ಫೈಲ್ ಡೌನ್ಲೋಡ್ ಮಾಡಿ ಬರೋಬ್ಬರಿ 5 ಲಕ್ಷ ರೂಪಾಯಿ ಹಣವನ್ನು ಕಳೆದುಕೊಂಡಿರುವ ಘಟನೆ ಬೆಳಕಿಗೆ ಬಂದಿದೆ.
ನಗರದ 42 ವರ್ಷದ ಉದ್ಯಮಿ ನೂರ್ ನಹಿದ್ ಖಾನ್ ಅವರಿಗೆ ಪರಿಚಯವಿಲ್ಲದ ನಂಬರ್ನಿಂದ ವಾಟ್ಸಾಪ್ ಸಂದೇಶವೊಂದು ಬಂದಿತ್ತು. ಆ ಸಂದೇಶದಲ್ಲಿ ಮದುವೆಗೆ ಪ್ರೀತಿಯ ಆಮಂತ್ರಣ ನೀಡುವ ಬರಹದೊಂದಿಗೆ ಕೆಳಗೆ ಒಂದು ಫೈಲ್ ಇತ್ತು. ಅದನ್ನು ಮದುವೆಯ ಇ-ಕಾರ್ಡ್ ಎಂದು ಭಾವಿಸಿದ ಖಾನ್, ವಿವರಗಳನ್ನು ತಿಳಿಯಲು ಆ ಫೈಲ್ ಮೇಲೆ ಕ್ಲಿಕ್ ಮಾಡಿ ಡೌನ್ಲೋಡ್ ಮಾಡಿಕೊಂಡಿದ್ದಾರೆ. ಆದರೆ ಅದು ಫೋಟೋ ಅಥವಾ ಪಿಡಿಎಫ್ ಫೈಲ್ ಆಗಿರದೆ, ಒಂದು ಎಪಿಕೆ (APK) ಫೈಲ್ ಆಗಿತ್ತು. ಈ ಫೈಲ್ ಡೌನ್ಲೋಡ್ ಆದ ಬೆನ್ನಲ್ಲೇ ಅವರ ಫೋನ್ನಲ್ಲಿ ಸೈಬರ್ ಕಳ್ಳರು ರಹಸ್ಯವಾಗಿ ಆಪ್ ಒಂದನ್ನು ಇನ್ಸ್ಟಾಲ್ ಮಾಡಿದ್ದಾರೆ.
ಇದಾದ ಕೆಲವೇ ಗಂಟೆಗಳಲ್ಲಿ, ಅಂದರೆ ಏಪ್ರಿಲ್ 16 ರ ಮುಂಜಾನೆ ಕೇವಲ ಒಂಬತ್ತು ನಿಮಿಷಗಳ ಅಂತರದಲ್ಲಿ ಅವರ ಬ್ಯಾಂಕ್ ಖಾತೆಯಿಂದ ಹಂತ ಹಂತವಾಗಿ ಒಟ್ಟು 5,00,440 ರೂಪಾಯಿ ಹಣ ಬೇರೆ ಖಾತೆಗಳಿಗೆ ವರ್ಗಾವಣೆಯಾಗಿದೆ. ಫೋನ್ನಲ್ಲಿದ್ದ ಯುಪಿಐ ಅಪ್ಲಿಕೇಶನ್ಗಳ ಮೇಲೆ ವಂಚಕರು ಹಿಡಿತ ಸಾಧಿಸಿ ಈ ಕೃತ್ಯ ಎಸಗಿರುವುದು ಪೊಲೀಸರ ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ.
ಪೊಲೀಸರ ಪ್ರಕಾರ, ಈ ಎಪಿಕೆ ಫೈಲ್ ಮೂಲಕ ವಂಚಕರು ಮೊಬೈಲ್ನ ಕ್ಯಾಮೆರಾ, ಸಂದೇಶಗಳು ಮತ್ತು ಬ್ಯಾಂಕ್ ಮಾಹಿತಿಯನ್ನು ಪ್ರವೇಶಿಸುವ ಅನುಮತಿಯನ್ನು ಪಡೆದುಕೊಳ್ಳುತ್ತಾರೆ. ಈ ಬಗ್ಗೆ ಸೈಬರ್ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ಅಪರಿಚಿತರಿಂದ ಬರುವ ಇಂತಹ ಅನುಮಾನಾಸ್ಪದ ಫೈಲ್ಗಳ ಬಗ್ಗೆ ಎಚ್ಚರದಿಂದಿರುವಂತೆ ಸಾರ್ವಜನಿಕರಿಗೆ ಸೂಚನೆ ನೀಡಿದ್ದಾರೆ.
