ಎಐ ಆಧಾರಿತ ಚಿತ್ರ
ಭಾರತ- ಸಿಂಗಾಪುರ, ಮಲೇಷ್ಯಾ ಕಡಲಾಳದ ಕೇಬಲ್; ಮೈಕ್ರೋಸಾಫ್ಟ್, ಟಾಟಾ ನಡುವೆ ಒಪ್ಪಂದ
ಜಾಗತಿಕ ಒಕ್ಕೂಟವು, ಭಾರತ, ಮಲೇಷ್ಯಾ ಮತ್ತು ಸಿಂಗಾಪುರ ದೇಶಗಳನ್ನು ನೇರವಾಗಿ ಸಂಪರ್ಕಿಸುವ ಅತ್ಯಾಧುನಿಕ ಸಬ್ಮರೀನ್ ಕೇಬಲ್ ವ್ಯವಸ್ಥೆಯನ್ನು ನಿರ್ಮಿಸುವುದಾಗಿ ಪ್ರಕಟಿಸಿದೆ.
ಭಾರತ ಮತ್ತು ಆಗ್ನೇಯ ಏಷ್ಯಾ ವಲಯದ ನಡುವೆ ಕೃತಕ ಬುದ್ಧಿಮತ್ತೆ (AI) ಹಾಗೂ ಕ್ಲೌಡ್ ತಂತ್ರಜ್ಞಾನದ ಕಾರ್ಯಾಚರಣೆಗೆ ಹೊಸ ವೇಗ ನೀಡಲು ಜಾಗತಿಕ ತಂತ್ರಜ್ಞಾನ ದೈತ್ಯ ಸಂಸ್ಥೆಗಳು ಕೈಜೋಡಿಸಿವೆ. ಮೈಕ್ರೋಸಾಫ್ಟ್, ಸಿಂಗ್ಟೆಲ್, ಟಾಟಾ ಕಮ್ಯುನಿಕೇಷನ್ಸ್ ಮತ್ತು ಲೈಟ್ಸ್ಟಾರ್ಮ್ ಒಳಗೊಂಡಿರುವ ಪ್ರಭಾವಿ ಜಾಗತಿಕ ಒಕ್ಕೂಟವು, ಭಾರತ, ಮಲೇಷ್ಯಾ ಮತ್ತು ಸಿಂಗಾಪುರ ದೇಶಗಳನ್ನು ನೇರವಾಗಿ ಸಂಪರ್ಕಿಸುವ ಅತ್ಯಾಧುನಿಕ ಸಬ್ಮರೀನ್ ಕೇಬಲ್ ವ್ಯವಸ್ಥೆಯನ್ನು ನಿರ್ಮಿಸುವುದಾಗಿ ಪ್ರಕಟಿಸಿದೆ.
'ಐ-2ಎಸ್ಇಎ' ಎಂದು ಹೆಸರಿಸಲಾದ ಈ ಮಹತ್ವಾಕಾಂಕ್ಷೆಯ ಯೋಜನೆಯ ಅಧಿಕೃತ ಕಾಮಗಾರಿಗೆ ಅಗತ್ಯವಿರುವ ಜಂಟಿ ಒಪ್ಪಂದಗಳಿಗೆ ಒಕ್ಕೂಟವು ಈಗಾಗಲೇ ಸಹಿ ಹಾಕಿದೆ. ಆದರೆ, ಈ ಪ್ರತಿಷ್ಠಿತ ಯೋಜನೆಗೆ ಹೂಡಿಕೆ ಮಾಡಲಾಗುತ್ತಿರುವ ಒಟ್ಟು ಮೊತ್ತದ ವಿವರಗಳನ್ನು ಸದ್ಯಕ್ಕೆ ಬಹಿರಂಗಪಡಿಸಲಾಗಿಲ್ಲ.
ಎಐ ಜಗತ್ತಿಗೆ ಹೊಸ ಶಕ್ತಿ
"ಭಾರತ ಮತ್ತು ಆಗ್ನೇಯ ಏಷ್ಯಾ ವಲಯದ ನಡುವೆ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಹೈಪರ್ಸ್ಕೇಲರ್ಗಳು, ಜಿಪಿಯು (ಗ್ರಾಫಿಕ್ಸ್ ಪ್ರೊಸೆಸಿಂಗ್ ಯುನಿಟ್) ಮೂಲಸೌಕರ್ಯ ಪೂರೈಕೆದಾರರು ಹಾಗೂ ಕೃತಕ ಬುದ್ದಿಮತ್ತೆ ತರಬೇತಿ ಮತ್ತು ಇನ್ಫರೆನ್ಸ್ ವರ್ಕ್ಲೋಡ್ಗಳನ್ನು ನಿರ್ವಹಿಸುವ ಬೃಹತ್ ಉದ್ಯಮಗಳ ಡಿಜಿಟಲ್ ಅಗತ್ಯತೆಗಳನ್ನು ಪೂರೈಸಲು ಈ ಯೋಜನೆಯನ್ನು ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದೆ," ಎಂದು ಲೈಟ್ಸ್ಟಾರ್ಮ್ ಸಂಸ್ಥೆ ತಿಳಿಸಿದೆ.
ಆಂಧ್ರ, ತಮಿಳುನಾಡಿನಲ್ಲಿ ಭೂಸ್ಪರ್ಶ
ಈ ಕಡಲಾಳದ ಕೇಬಲ್ ವ್ಯವಸ್ಥೆಯು ಭಾರತದ ಪೂರ್ವ ಕರಾವಳಿಯನ್ನು ನೇರವಾಗಿ ಆಗ್ನೇಯ ಏಷ್ಯಾದ ಕ್ಲೌಡ್ ಇಂಟರ್ಕನೆಕ್ಟ್ ಮತ್ತು ಎಐ ಹಬ್ ಆಗಿರುವ ಸಿಂಗಾಪುರ ಹಾಗೂ ಮಲೇಷ್ಯಾದ ಕೌಲಾಲಂಪುರ್ ಡೇಟಾ ಸೆಂಟರ್ ಕಾರಿಡಾರ್ಗೆ ಸಂಪರ್ಕಿಸಲಿದೆ. ಭಾರತದಲ್ಲಿ ಈ ಕೇಬಲ್ ವ್ಯವಸ್ಥೆಯು ಎರಡು ವಿಭಿನ್ನ ಹಾಗೂ ಪ್ರಮುಖ ಕರಾವಳಿ ಕೇಂದ್ರಗಳಲ್ಲಿ ಭೂಮಿಯನ್ನು ತಲುಪಲಿದೆ. ಸಮುದ್ರದ ಮೂಲಕ ಹೈದರಾಬಾದ್ಗೆ ಅತ್ಯಂತ ಕಡಿಮೆ ಅಂತರದ ಡಿಜಿಟಲ್ ಪ್ರವೇಶವನ್ನು ಒದಗಿಸುತ್ತದೆ.ಇದು ಹೊಸ ಮತ್ತು ಸುರಕ್ಷಿತವಾದ ಲ್ಯಾಂಡಿಂಗ್ ಲೋಕೇಶನ್ ಆಗಿ ಕಾರ್ಯನಿರ್ವಹಿಸಲಿದೆ. ಈ ಮೂಲಕ ದೇಶದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಹೈದರಾಬಾದ್ ಮತ್ತು ಚೆನ್ನೈನ ಎಐ ಹಾಗೂ ಹೈಪರ್ಸ್ಕೇಲರ್ ಡೇಟಾ ಸೆಂಟರ್ ಕ್ಲಸ್ಟರ್ಗಳಿಗೆ ಭಾರಿ ಡಿಜಿಟಲ್ ಬಲ ಸಿಗಲಿದೆ.
2029 ಕ್ಕೆ ಯೋಜನೆ ಕಾರ್ಯಗತ
ಐ-2ಎಸ್ಇಎ ಒಕ್ಕೂಟವು ಜಂಟಿ ನಿರ್ಮಾಣ ಒಪ್ಪಂದದ ಅಡಿಯಲ್ಲಿ ಕಾರ್ಯನಿರ್ವಹಿಸಲಿದ್ದು, ಜಾಗತಿಕ ತಂತ್ರಜ್ಞಾನ ಸಂಸ್ಥೆ 'ಎನ್ಇಸಿ ಕಾರ್ಪೊರೇಷನ್' ಅನ್ನು ಸಿಸ್ಟಮ್ ಸಪ್ಲೈಯರ್ ಆಗಿ ಮತ್ತು 'ಆಸಿಯಾನ್ ಕೇಬಲ್ಶಿಪ್' ಅನ್ನು ಕಡಲ ಅನುಸ್ಥಾಪನಾ ಪಾಲುದಾರರನ್ನಾಗಿ ನೇಮಕ ಮಾಡಲಾಗಿದೆ. ಸದ್ಯ ಈ ಸಿಸ್ಟಮ್ನ ಬ್ಯಾಂಡ್ವಿಡ್ತ್ ಸಾಮರ್ಥ್ಯದ ಬುಕ್ಕಿಂಗ್ಗಳು ಈಗ ಮುಕ್ತವಾಗಿವೆ. ಸಿಂಗಾಪುರ, ಮಲೇಷ್ಯಾ ಮತ್ತು ಹೈದರಾಬಾದ್ ಕಾರಿಡಾರ್ ನಡುವೆ ಇದು ಅತ್ಯಂತ ವೇಗದ ಡೇಟಾ ಪ್ರಸರಣವನ್ನು ನೀಡುವ ನಿರೀಕ್ಷೆಯಿದೆ.
