ಅಕ್ಷಯ ತೃತೀಯ: 1.5 ಲಕ್ಷ ರೂ. ದಾಟಿದ ಚಿನ್ನದ ಬೆಲೆ; ಆದರೂ ತಗ್ಗದ ಆಭರಣ ಪ್ರಿಯರ ಉತ್ಸಾಹ

ಮಧ್ಯಪ್ರಾಚ್ಯದಲ್ಲಿನ ಯುದ್ಧದ ಕಾರ್ಮೋಡ ಹಾಗೂ ದಿನೇ ದಿನೇ ಗಗನಕ್ಕೇರುತ್ತಿರುವ ಚಿನ್ನದ ಬೆಲೆಯ ನಡುವೆಯೂ, ಆಭರಣ ಪ್ರಿಯರ 'ಅಕ್ಷಯ ತೃತೀಯ'ದ ಸಂಭ್ರಮಕ್ಕೇನೂ ಬ್ರೇಕ್ ಬಿದ್ದಿಲ್ಲ! 10 ಗ್ರಾಂ ಚಿನ್ನದ ಬೆಲೆ ಬರೋಬ್ಬರಿ 1.50 ಲಕ್ಷ ರೂ. ಗಡಿ ದಾಟಿದ್ದರೂ, ಶುಭ ದಿನದಂದು ಸ್ವಲ್ಪವಾದರೂ ಚಿನ್ನ ಖರೀದಿಸಲೇಬೇಕು ಎನ್ನುವ ನಂಬಿಕೆ ಮಹಿಳೆಯರ ಉತ್ಸಾಹ ಇಮ್ಮಡಿಗೊಳಿಸಿದೆ.

ವಿಶ್ವದ ಎರಡನೇ ಅತಿದೊಡ್ಡ ಚಿನ್ನದ ಗ್ರಾಹಕ ದೇಶವಾದ ಭಾರತದಲ್ಲಿ ಅಕ್ಷಯ ತೃತೀಯದಂದು ಚಿನ್ನದ ಬೇಡಿಕೆ ಗಗನಕ್ಕೇರುವುದು ವಾಡಿಕೆ. ಈ ಬಾರಿಯ ಹಬ್ಬದ ಸಂಭ್ರಮಕ್ಕೆ 'ಬೆಲೆ'ಯ ಬಿಸಿ ತಟ್ಟಿದ್ದರೂ, ಚಿಲ್ಲರೆ ವ್ಯಾಪಾರದಲ್ಲಿ ಭರ್ಜರಿ ಬೇಡಿಕೆ ನಿರೀಕ್ಷಿಸಲಾಗಿದೆ.

ಇತಿಹಾಸದಲ್ಲೇ ಅತ್ಯಂತ ದುಬಾರಿ ಹಬ್ಬ! (ಏ.18ರ ದರ ವಿವರ)

ಏಪ್ರಿಲ್ 19ರ ಅಕ್ಷಯ ತೃತೀಯಕ್ಕೆ ಕೇವಲ ಒಂದು ದಿನ ಬಾಕಿ ಇರುವಾಗಲೇ ಚಿನ್ನ ಮತ್ತು ಬೆಳ್ಳಿ ದರಗಳು ಹೊಸ ಮೈಲಿಗಲ್ಲು ತಲುಪಿವೆ:

* 24 ಕ್ಯಾರೆಟ್ ಚಿನ್ನ: ಪ್ರತಿ ಗ್ರಾಂಗೆ 15,578 ರೂ.

* 22 ಕ್ಯಾರೆಟ್ (ಆಭರಣದ ಚಿನ್ನ): 10 ಗ್ರಾಂಗೆ 1,42,800 ರೂ. (ಪ್ರತಿ ಗ್ರಾಂಗೆ 14,280 ರೂ.)

* 18 ಕ್ಯಾರೆಟ್ ಚಿನ್ನ: 10 ಗ್ರಾಂಗೆ 1,16,840 ರೂ. (ಪ್ರತಿ ಗ್ರಾಂಗೆ 11,684 ರೂ.)

* ಬೆಳ್ಳಿ ದರ: ಇತ್ತೀಚೆಗಷ್ಟೇ ಒಂದೇ ದಿನ ಕೆಜಿಗೆ 15,000 ರೂ. ಏರಿಕೆ ಕಂಡು ಆಘಾತ ಮೂಡಿಸಿದ್ದ ಬೆಳ್ಳಿ, ಇದೀಗ ಸ್ಥಿರವಾಗಿದ್ದು ಪ್ರತಿ ಕೆಜಿಗೆ 2,75,000 ರೂ. ನಂತೆ ಮಾರಾಟವಾಗುತ್ತಿದೆ.

ಗಗನಕ್ಕೇರಿದ ಬೆಲೆಗೆ ಕಾರಣವೇನು?

ಕೇವಲ ಹಬ್ಬದ ಬೇಡಿಕೆ ಮಾತ್ರ ಚಿನ್ನದ ಬೆಲೆ ಏರಿಕೆಗೆ ಕಾರಣವಲ್ಲ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಇರಾನ್ ಮತ್ತು ಅಮೆರಿಕ ನಡುವಿನ ಯುದ್ಧದ ಭೀತಿ ಚಿನ್ನದ ಬೆಲೆಯನ್ನು ತೀವ್ರವಾಗಿ ಹೆಚ್ಚಿಸಿದೆ. ಜೊತೆಗೆ ಜಾಗತಿಕ ಆರ್ಥಿಕ ಅಸ್ಥಿರತೆ ಹಾಗೂ ಡಾಲರ್ ಎದುರು ರೂಪಾಯಿ ಮೌಲ್ಯದ ಏರಿಳಿತ ಕೂಡ ಗ್ರಾಹಕರ ಜೇಬಿಗೆ ಕತ್ತರಿ ಹಾಕುತ್ತಿದೆ.

ಜೋರಾದ ಪ್ರಿ-ಬುಕ್ಕಿಂಗ್!

ಬೆಲೆ ಎಷ್ಟೇ ಏರಿಕೆಯಾದರೂ, 'ಮುಂದೆ ಇನ್ನಷ್ಟು ದುಬಾರಿಯಾಗಬಹುದು' ಎಂಬ ಆತಂಕದಲ್ಲಿ ಗ್ರಾಹಕರು ಈಗಲೇ ಆಭರಣ ಮಳಿಗೆಗಳಲ್ಲಿ ಮುಂಗಡ ಕಾಯ್ದಿರಿಸುತ್ತಿದ್ದಾರೆ (ಪ್ರಿ-ಬುಕ್ಕಿಂಗ್). ಮಾರುಕಟ್ಟೆ ಮೂಲಗಳ ಪ್ರಕಾರ ಗ್ರಾಹಕರ ಈ ಮುಂಜಾಗ್ರತಾ ಕ್ರಮದಿಂದಾಗಿ ಮಳಿಗೆಗಳಲ್ಲಿ ಪ್ರಿ-ಬುಕ್ಕಿಂಗ್ ಭರಾಟೆ ಜೋರಾಗಿದೆ.

ಜ್ಯುವೆಲ್ಲರಿ ಅಸೋಸಿಯೇಶನ್‌ ಹೇಳುವುದೇನು?

ಕರ್ನಾಟಕ ಜ್ಯುವೆಲ್ಲರಿ ಅಸೋಸಿಯೇಶನ್‌ ಅಧ್ಯಕ್ಷ ಟಿ.ಎ. ಶರವಣ ಅವರ ಪ್ರಕಾರ, "ಯುದ್ಧದ ಭೀತಿಯಿಂದ ದರ ಇಳಿಕೆಯಾಗಬಹುದೇ ಎಂಬ ಗೊಂದಲ ಗ್ರಾಹಕರಲ್ಲಿದೆ. ಆದರೆ ಸದ್ಯಕ್ಕೆ ಬೆಲೆ ಇಳಿಯುವ ಸಾಧ್ಯತೆ ಇಲ್ಲ. ಇರಾನ್ ಯುದ್ಧದ ಪರಿಣಾಮ ಮಾರುಕಟ್ಟೆಗೆ ತಟ್ಟಿದ್ದು, ಪ್ರಸ್ತುತ ಜಿಂಬಾಬ್ವೆ ಹಾಗೂ ದಕ್ಷಿಣ ಆಫ್ರಿಕಾದಿಂದ ಚಿನ್ನ ಆಮದು ಮಾಡಿಕೊಳ್ಳಲಾಗುತ್ತಿದೆ. ಇದಕ್ಕೆ ಸರ್ಕಾರ ಶೇ. 13ರಷ್ಟು ಸುಂಕ ವಿಧಿಸುತ್ತಿದೆ. ಹೀಗಾಗಿ ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ಒಟ್ಟಾರೆ ಖರೀದಿ ಪ್ರಮಾಣ ಕೊಂಚ ತಗ್ಗಬಹುದು."

"ಆದರೆ, ಗ್ರಾಹಕರ ಅನುಕೂಲಕ್ಕಾಗಿ ಈ ಬಾರಿ ವಿಶೇಷವಾಗಿ 1 ಗ್ರಾಂ ಚಿನ್ನದ ನಾಣ್ಯ ಹಾಗೂ 5 ಗ್ರಾಂನ ಆಭರಣಗಳನ್ನು ಸಿದ್ಧಪಡಿಸಲಾಗಿದೆ. ಬಜೆಟ್‌ಗೆ ತಕ್ಕಂತೆ ಆಭರಣ ಖರೀದಿಸಲು ಇದು ಸಹಕಾರಿಯಾಗಿದೆ" ಎಂದು ಅವರು ತಿಳಿಸಿದ್ದಾರೆ.